عرس صناعي

كثر الإحتيال في الآونة الأخيرة وتنوعت أساليبه ولعل ضيق المعايش له القسط الوافر في ذلك ، كنا جماعة نحكي لبعضنا البعض آخر ما توصلت إليه عقليات الإحتيال من إبتكارات غير ان صديقنا (خالد) قال لنا إنتو شفتو إحتيال خلوني أحكي ليكم الإحتيال العلى أصولو .. قال (خالد) بينما كنت أصالي قبل كم شهر في أحد (المساجد) بالعاصمة .. وبعد إنتهاء الصلاة تقدم شخص (خمسيني) نظيف الثياب تبدو عليه علامات التقوي والوقار وطلب من الإمام التحدث ثم أمسك بالمايكرفون قائلاً :
– يا جماعو لو سمحتو دقيقة واحدة ..

– فأنصت المصلون .. إلا بعض الهمهمات هنا وهنالك
– قال صاحبنا : يا جماعة الخير .. الحمدلله ربنا رزقني بعدد من البنات كولهم زوجتا ليهم والحمدلله على سنة الله ورسوله وفضلت ليا بت واحده عاوز أزوج ليها على سنة الله ورسوله .. يا جماعة أنا عاوز ليها عريس وما عايز منو أي حاجه بس يكون زول متدين وعلى خلق يخاف الله فيها .. والرسول صلي الله عليه وسلم قال (إذا جاءكم من ترضون دينه وخلقه فزوجوه) ..
صمت المصلون لبرهة إلا بعض الهمهمات هنا وهناك .. و(فجأتن) خرج من أحد الصفوف شاب فارع الطول بسيط الثياب ما أن إقترب حتي قال :
– أنا قبلان بيها يا شيخنا
– ويرد الشيخ فرحا : وأنا كمان زوجتك ليها .. وكمان نخلي الشيخ الإمام يعقد ليكم هسه !
وفجأتن يرتفع صوت .. يلتفت الجميع ليشاهدوا شخصا تبدو عليه علامات التقوي و (الترطيب) .. جلابية سكروتة .. وشال (بيج) مطرز وساعة دهبية (غاتسة في المعصم) وعمة (توتال سويسري) :
– بارك الله في أمثال هذه الزيجة .. والله لو الناس كولها عملت كده كان حلينا مشكلة العنوسة دي وأكيد العرسان ديل عندهم مستلزمات ضرورية محتاجين ليها فحقو نجمع ليهم حاجة (يدخل يده في جيبه الفضفاض) فيخرج (ربطة) من (العملة الورقية) فئة العشرين جنيها ويقذف بها عاليا صوب العريس .. ثم تتوالي التبرعات (والدعم السريع) ..
يواصل صديقي خالد الحكاية قائلا :
غايتو أنا كنتا آخر زول طلعتا من المسجد .. وخليت (أبو العروس) و(العريس) قاعدين يلمو في القروش (ويربطو) في الرزم !
– قلنا له (مستغرشين) وبصوت واحد : طيب وين الإحتيال هنا ؟
– يا جماعة طولو بالكم شويه .. بعد القصة دي بي شهرين تلاته جاتني مامورية لي واحدة من المدن في واحدة من الولايات .. يوم الجمعة مشيت المسجد .. بعد ما صلينا .. تقدم شخص (خمسيني) نظيف الثياب تبدو عليه علامات التقوي والوقار وطلب من الإمام التحدث ثم أمسك بالمايكرفون قائلاً : يا جماعو لو سمحتو دقيقة واحدة ..
– فأنصت المصلون .. إلا بعض الهمهمات هنا وهنالك
– قال صاحبنا : يا جماعة الخير .. الحمدلله ربنا رزقني بعدد من البنات كولهم زوجتا ليهم والحمدلله على سنة الله ورسوله وفضلت ليا بت واحده عاوز أزوج ليها على سنة الله ورسوله .. يا جماعة أنا عاوز ليها عريس وما عايز منو أي حاجه بس يكون زول متدين وعلى خلق يخاف الله فيها .. والرسول صلي الله عليه وسلم قال (إذا جاءكم من ترضون دينه وخلقه فزوجوه) ..
قال خالد مواصلا .. تعرفوا يا جماعة أنا لمن سمعتا الكلام ده طوااالي قعدتا أتذكر .. سمعتو وين؟ سمعتو وين .. قمتا إتذكرتا القصة الحصلت في مسجدنا هنا .. قمتا (جريت في الراجل نور طويل) عرفتو ليك طوااالي .. وفي اللحظة و(فجأتن) خرج من أحد الصفوف شاب فارع الطول بسيط الثياب ما أن إقترب حتي قال :
– أنا قبلان بيها يا شيخنا
– ويرد الشيخ فرحا : وأنا كمان زوجتك ليها .. وكمان نخلي الشيخ الإمام يعقد ليكم هسه !
وفجأتن يرتفع صوت .. يلتفت الجميع ليشاهدوا شخصا تبدو عليه علامات التقوي و (الترطيب) .. جلابية سكروتة .. وشال (بيج) مطرز وساعة دهبية (غاتسة في المعصم) وعمة (توتال سويسري) ..
– بارك الله في أمثال هذه الزيجة .. والله لو الناس كولها عملت كده كان حلينا مشكلة العنوسة دي وأكيد العرسان ديل عندهم مستلزمات ضرورية محتاجين ليها فحقو نجمع ليهم حاجة (يدخل يده في جيبه الفضفاض) فيخرج (ربطة) من (العملة الورقية) فئة العشرين جنيها ويقذف بها عاليا صوب العريس !
– قمتا عاينتا ليهو ألاقيهو ليك (زولنا داك) ذاااتو :
– (كلنا بصوت واحد) : أها وعملتا شنووو يا خالد إنتا؟
– أعمل شنو يعني .. كوركتا بأعلى صوت … ديل محتالين .. ديل نصابين !!
– أها والحصل شنو؟
– لحدت ما حكيت للناس القصة و(إقتنعوا) … كان الجماعة (إتخارجوا)!

كسرة :
من (العرس الجماعي) وصلنا مرحلة (العرس الصناعي) …. الله يجازي اللي كان السبب !!

كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)

Advertisements

10 تعليقات

  1. برنجية من الحاويات الجديدة

  2. ههههههههههههههه , قوييية دى ,
    انا مرة احتال على واحد فى مستشفى رفاعة عامل فيها عريس ومحننننن وممسسسسسسح واخد الفيها النصيب !
    غايتو البلد دقرت فى الحيطة تب …

    1. يا حبيب بالله بدون ذكر اسماء المناطق.. انا ذاتى قبل كده حصل موقف ألعن من ده فى جبرة (جبرة ونستبرا هييييييييكا)

      1. ههههههههههههه , انت هنا يا هريدى ؟؟

  3. زمان كنا بنقول أولاد بمبة نصابين …….والله حسه إبليس ذاتو يكون بقول علينا شعب نصاب…… وفعلا الله يجازى الكان السبب. وأنا لو بعرف أنصب كان تخصصت فى الكانوا السبب ديل ذاتم ….قروشم لذيييذة وبالعملة الحرة كمان

  4. يا اللسه حي دا صيني ولا شنو ؟ ود شمباتي نهارك سعيد ، وين أخونا في الله (جنوبي) ؟ سلااااام ..

    1. وعليكم السلام ورحمة الله ,,
      جنوبى كان فى اجازة وياداابو رجع ,,
      اما المكتول دا خليهو , نظامو براهو

  5. هو ادوهو البت مجان التبرع لزومو شنو ههههههه
    بمناسبة العقد في الجوامع دي اي زول يمشي عقد في مسجد النيلين يمشي حفيان عشان كده كده حيرجع حفيان اما مسجد سيده سنهوري يخلي قروشه في البيت ويمشي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: