توقعات العام 2016

سألنى كثير من القراء عن توقعاتي للعام الجديد (2016) .. هاكم بعضها :

• أن تختفي من تقرير المراجع العام كل حالات التعدي على المال العام (عشان ح يكون المال ذاااتو كمل)
• أن يتم العثور على (باعة) خط (هيثرو – الخرطوم) ويتم تحللهم ويا دار ما دخلك شر .
• أن يختفي الفساد واللبع والهبر من المؤسسات الدينية .. الحج والعمرة والأوقاف والزكاة إتباعا للإستعانة على قضاء الحوائج بالكتمان

• أن يلفظ آخر بص من باصات الوالي المتهالكة أنفاسه
• أن تزداد نسبة البطالة في البلاد بحيث يصل متوسطها إلى 3 (أبطال) لكل أسرة ، طالما الميزانيات كووواها ما فيها وظائف
• أن تتحول آلية (7+7) إلى (7X7) ويستمر الحوار عاماً آخر
• أن تتم زيادة المرتبات بنسبة تصل إلى%0.0002
• أن يتم ارتفاع معدل صادراتنا من طائرات (سافات 2) وسافات 3 وذلك يعد إشتداد الطلب (عالمياً) عليها .
• أن يرتفع سعر الدولار ليبلغ عشرين (ألأف) بدلا عن العشرين جنيه (ديك) !
• أن تقوم الدولة بتوفير 24 فرصة عمل للخريجين (كتيره مش؟)
• أن ينتقل عدد مقدر من المواطنين إلى الرفيق الأعلي جراء تصريحات بعض المسؤولين (فقعان مرارة وكده)
• أن تكون الليمونة بخمسة جنيه والبصلة بعشرة جنيه والطماطماية بخمستاشر والموت مجاناً !
• أن يحدث تحسن في مياه الشرب حيث يتم القضاء على البكتريا و(تفضل الطحالب) بس
• أن ننال جائزة السعفة الذهبية في مهرجان (كان) عن فيلم أبي فوق الشجرة ( شانق نفسو طبعن)
• أن ننال الأوسكارعن فيلم (تزوير في أوراق رسمية) والذي تم تصويره بالمدينة الرياضية
• أن ندخل موسوعة جنيس للأرقام القياسية بإنتاجنا لأصغر عيشة في العالم (لا ترى بالعين المجردة)
• أن تنتشر المخدرات بين طلاب المدارس بحيث يتم تطبيق شعار : (دفتر) لكل تلميذ
• أن نحرز المركز الأول في الشفافية بعد أن يتم إرتفاع البث في قضايا الفساد إلى خمسة حالات من أصل ألف وخمسمية (في الشهر)
• أن يتم إنشاء سفارة للجالية السودانية بالخرطوم
• أن تكثر أمراض نقص الفايتمينات لخلو أجساد المواطنين منها .. (يجيبوها من وين يعني .. فول طعمية عدس)
• أن يتم التزايد في أعداد الفنانين والمطربين لنصل مرحلة الإكتفاء الذاتي (فنان لكل مواطن فنان)
• أن ينتقل عدد مقدر من المواطنين إلى الرفيق الأعلي جراء تصريحات بعض المسؤولين (فقعان مرارة وكده)
• أن يأتي الخريف فجأتن زي كل مرة (يعني الجديد شنوووو)؟
• أن يتم القضاء على أزمة المواصلات بالعاصمة بعد أن تقعد الناس تماما في بيوتا (المارقين ليها شنوووو)
• أن تتزايد نسبة أعداد جرائم القتل (الناس بقت روحا محرقاها)
• أن تتحول الحيوانات الأليفة (كلاب وكدايس) إلى حيوانات نباتية … وعادي تشوف ليك كلبين متشاكلين ليهم في عجورة (نحنا لاقين لحوم؟)
• أن توقف بقية شركات الطيران رحلاتها للخرطوم و ويصبح المطار فاااضي (وأهو فرصة يبيعوهو )
• أن يتم تولي (شاب) لقيادة حزب سوداني … (طبعن بعد ما رئيسو مات وكده)
• أن يبدأ العمل بالمدينة الرياضية وكل زول يبني القطعة بتاعتو (بس يخلو لينا ميدان سلة واااااحد)
• أن تتفاقم حمى الأغنيات (الحربية) وتحطم أغنية (قطعنى بي سكينك وبيعني للجزار) الأرقام القياسية في المبيعات .
• أن يكثر (الطيارون) – الناس البتجي ساكت- في بيوت الأفراح حتى يلجأ اصحاب الفرح لدخول المعازيم إلى الصالة عن طريق الدخول بـ(البصمة)
• أن يتم شراء لعيبة محترفين بما يعادل عدد 5000 ماكينة غسيل كلي
• أن يرتاح معظم المعاشيين بفضل رحمة الله وتبديله لهم بدار أحسن من دارهم ومعاش (أحسن من معاش الحكومة)
• أن يتزايد إهتمام السودانيين بالزمن والإلتزام بالمواعيد وتنحسر أطول مدة للتأخير إلى ساعة ونصف
• أن يتم إنشاء مفوضية (عليا) للفساد وذلك لمراقبة أداء المفوضية (العامة) للفساد والتى بدورها سوف تقوم بمراقبة المفوضية الخاصة بالفساد .
• أن تزداد نسبة المتسولين بحيث يكون هنالك (شحاد) مقابل كل مواطن (شحاد)
كسرة :
التوقعات الفوق دي للعام 2016 صالحة في حالة لم يتم (رفع الدعم) وكدة !
كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)+و

13 تعليق

    1. معاااك يا…………….

      1. يسمك .. ولااا نفس

      2. يااااا… نظير السرة ! هههههههههههههههههههه

    2. آآآآآآآآآآجنوبي آآآآآآآآآآخوي كدي اتقس مثل العبد لله وارجع السودان كان تاني تلقى ليك برنجية هنا يا خوي يوم القيامة يعني السودانيين مساكين عندهم قيامتين

  1. الله يبشرك بالخير يا بروف
    يعني لحدي سنة 2016 ح يكون في حاجة اسمها السودان !!!!!!!!!!!!
    حالتنا قطعنا العشم !!

    1. قاطع من يومك انت , هع هع هع

  2. سنه ما عندك فيها نفقه ما تتوقع اياما يا بروف ..

    انتو الكلام بتاع زول الحج والعمره الفي سنجه ده صحي ؟!!
    كمان قالوا حاجي 10 مرات .. اااي ما ماخد راااحته في الحج و مملللص .. زي ده مااااا بحب الزحمه

  3. وعم (بشة) حيكون قاعد لحدت 2016 ؟؟؟

    كان حصل .. دا خبر الشوم !! ومعناتا السنة دي قطع شك كبيسة !!

    زول سنجة الحج 10 مرات … وبكابس في الغفيرات … ياربي شالوهو .. ولا قالوا ليهو إتحلل بالإغتسال سبعة مرات أولاهم بالتراب ؟؟؟

    1. غايتو حسب علمي انه اول حكموا عليهو بي غرامه الف جنيه والجلد 30 جلدة ( قدر فتشت 30 جلده دي جابوها من وين ما لقيتا .. يكون الزول ده عامل تأمين زنا عشان كده خفضوها ليهو ؟ ) وحتي التلاتين جلده زااتا قالوا اعفوهو منها عشان عندو سكري !! وربنا بقول في معني الاية الزاني والزانية يجلدوهم 100 جلدة وما نرأف بهم !!
      الغريبه انو عندو مرتين وبعد ده يكابس في الغفيرة وعنده سكري !! بركه الربنا جاب ليهو السكري لو ما كده ده كان جهجهنا نحنا زااااتنا .

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: