يا رااااجل حرام عليك

ما أن قمت بقراءة تصريحات السيد إبراهيم محمود مساعد رئيس الجمهورية ونائب رئيس المؤتمر الوطني التي نشرتها صحف الأمس و التي قال فيها بان الحكومة الحالية عندما استلمت السلطة الناس كانت بتبيت في صف الفرن لـ4 رغيفات وتقيف في صف البنزين عشان يلقوا ليهم جالون بنزين وكنا بنقسم الصابونة وندي السكر بالوقية … ما أن قرأت (كلام المسؤول غير المسؤول ده) حتى هتفت قائلاُ (يا رااااجل) وذلك على طريقة أستاذنا المبجل (محمد سليمان) في برنامجه الشهير ذاك ( جراب الحاوي) ..عندما قام بسؤال أحد من المشاركين عن شخصية رئيس دولة أفريقي شاعر وأديب مثقف فأجابه المشارك (دا نميري) …فكان رد (محمد سليمان) بلهجته الساخرة تلك يا رااااااااااااجل حرااام عليك !

السيد إبراهيم محمود مساعد رئيس الجمهورية ونائب رئيس المؤتمر الوطني (إذن) يعتقد بأن حزبه قد قام بإنقاذنا حقيقة لا مجازاً وأخرجنا من (الفقر) إلى (الغني) ومن الضلال إلى الرشاد ومن (الصابونة) البتقاسموها إلى الصابونة (الما بتقاسموها) ومن الشنو داك للشنو ما بعرف داك !
بالله عليكم هسه جنس (التصريح) ده الزول يقول عليهو شنووو؟؟ خلاس يا (حبيبنا) الأوضاع فل الفل والشعب (طلعتوهو) من حدة الفقر تلك وخليتوهو (آخر نغنغة) والبنزين موجووود .. والرغيف الذي لا يري بالعين المجردة أبو 2 بألف جنيه (بعد حذف الأصفار) موجووود.. والمواصلات (فضييياه) والدولار بي (عشرين جنيه) !!
يا راااجل قول كلام تااااني … إنتهى الحياء والإختشاء ورب العرش العظيم … وأضحى من أجل التشبث بالسلطة يمكن للشخص أن يغالط الواقع والحقيقة (عدييييل كده) ، هل يمكن لأي عاقل بالغ رشيد أن يقارن مجرد مقارنة بين ما هو حادث الآن وما قبل أن تأتي عصبة السيد إبراهيم محمود ؟؟ هل معرفة التدهور في حياة الناس ومعاشها (الحاصل) الآن نتيجة إنفراد حزب (إبراهيم محمود) بالسلطة لأكثر من ربع قرن (عاوز ليهو دليل) وللا حتى (درس عصر)… لكنها (السلطة) التي تعمي القلوب والأبصار !
المشكلة في مثل هذه التصريحات ليست في إنها تعد سبباً مباشراً في حدوث الذبحات الصدرية وحالات الشلل الرباعي ولكن في كونها تدل دلالة قاطعة بأن (السيد مساعد الرئيس) وحزبه لا يرون أن (الشعب) يواجه أي مشكلة وإن (الدنيا لونها بمبي) وأن هنالك تحسناً واضحا في حياة الناس التي كانت (تتقاسم الصابونة) وأضحت الآن تتقاسم (حبة المضاد الحيوي) !
ويستطرد السيد إبراهيم محمود قائلاً في تصريحه (نواجه حملة شرسة تعتبرنا قتلة وفاسدين) .. ونقول لسيادته … ليه كده ياااخ .. ليه النظرة الوحشة دي .. (قتلة دي) كدي نخليها عشان (إتملصتوا منها) وقلتو العربات كانت بدون (لوحات وكده) .. لكن الفساد ده .. كمان عاوز ليهو كلام؟ .. ففي فترة حكمكم يا عزيزي (نفرين بس) يعني شخصين بس في قضية بل فضيحة (الأقطان) إستطاعوا أن ينهبو 55 مليون يورو و 15 مليون دولار … (دي عينه ساااكت) .. أما عن من هم دون ذلك فحدث ولا حرج … فهنالك الوزير الذي يصرح بأنه يستدين من إخوته (حق الملاح) وبعد أقل من عام نفاجأ به وقد إشتري منزلا بملايين الدولارات غير ذلك (التحلل) الذي أضحك العالم وهذا غيض من فيض .. فيض أن تكون السلطة مطلقة لجماعة محددة فقط .. (تعوس) فيها كما شاءت .. وهل كان هنالك شخص يعتقد (يا سيد إبراهيم) أو يظن مجرد ظن بأن الفساد سوف يطال حتي المؤسسات ذات القدسية الدينية .. الحج والعمرة ، الأوقاف ، الزكاة (يعني فضلت ليكم الصلاة بس) ، وعشان ما (نكتر الكلام) كدي يدك معانا نشوف (السرقو) خط هيثرو ديل ونرجع الخط أو القروش لأنو الموضوع ده أخد ليهو 8 سنين يا (باشمهندس) !!
كسرة :
العبد لله يرقد بالغرفة 99 مستشفى (إصابات التصريحات الحكومية) … الزيارة ممنوعة لخطورة الحالة !!!
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)+و+و

11 تعليق

  1. و أيضاً برنجية

    1. مبرووووكة
      وتستاهل التشي تشي

      1. يسلم فمّك

  2. ماااااا تتخلع ساكت من الكركبه و الدوشه اللي في الغرفة اللي جنبك رقم 100 في مستشفى (إصابات التصريحات الحكومية).. ديل باقي الشعب .. راقدين بي نفس الحاله ويمكن أخطر… وبرضو الزيارة ممنوعة ……. ( هو اللي ح يزوروا منو ذاتوووووووووووووووووو )

  3. كلامه ده يمكن قاصد في اريتريا … هو جا الخرطوم متين عشان يعرف !!؟
    قول وللاهي العزيم كلام ده حسل

  4. قبال تجونا يا (تجم) بضم التاء والجيم وتسكين النون
    كنا ناكل لحمة كل يوم
    كنا نتعالج مجانا
    كنا نتعلم مجانا
    كنا نشرب حليب كل صباح
    كانت الماهية بتكفي وبفضل منها (حرباشات)
    كنا كل عيد البيت كلو بلبس جديد والضحية كلو بيت فيهو خروف وزيادة
    كنا الحبشي نعرفو من مشيتو ….. وصلبو القصير داك …… سبحان الله بقو يحكمونا
    كانت الاندايات وبيوت الهناي مفتوحة لافي زول كتل زول لافي زول نهب زول
    كنا … ولد الجيران بوصل بنات الحلة كلها لبيوتم بعد داك برجع اخواتو من الحفلة
    كنا نمشي نمشي المسجد عشان نصلي لله…..
    ما كان في امام مسجد قبضوهو مع ولد
    ما كان في استاذ حمل- بتشديد الميم – طالبة
    ما كان في بروميد البوتاسيوم
    ما كان في تفاح صيني
    ما كان في سرقة وتحلل
    ما كان في رقيص رؤساء ونقزي وزراء
    ما كان في جمال الوالي ولا صلاح ادريس
    ما كان في سرطانات ونفايات مشعة …..
    ما كان في سدود وبرضو الكهرباء ما بتقطع
    كان في حاجة اسمها صينية الغداء – كل البيت
    كان في شاي المغربية.
    كنا …… وما كان …… وكان في

    1. قول ليهو وكان كل حلمك تركب مواصلات السحافه زلت هسي قادر الله موكبك يفضوا ليهو الزلط

    2. اكتر حاجة فى كان وكان ، اثارت فى نفوسنا لواعج الحزن والاسى ( صينية الغداء وشاى المغربية) وما ادراك ما صينية الغداء وشاى المغربية .. يااااحليلم

  5. أنت يابروف من أول ما قلت أنهم (يعلمون ويعرفون شيئاً واحداً وهو أن هنالك شعب يحكمونه لكنهم غير معنيين بمعرفة كيف يعيش هذا الشعب؟ )

  6. استاذنا الفاضل الفاتح جبرا التكبر والجبروت بيعمل اكتر من كده والمبخاف من الله الخلقو يقتل وينهب ويبيد وكانو ماعمل حاجه وانت بتنفخ في قربة مقدودة لنا الله ياجبرا

  7. استاذنا الفاضل الفاتح
    زي ما قال الجنوبي خليهم يرجعونا محل ما انقذونا ويكون كتر خيرهم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: