نصب نسائي

في أحد أيام الأسبوع الماضي وبينما كنت عائداً إلى المنزل ليلا أقود عربتي لوحت لي سيدة تحمل طفلا بصورة فيها كثير من الإصرار فتوقفت لها وكان ذلك في بداية كوبري (شمبات) من الناحية الشرقية ، كان إصرار السيدة يوحي بأن هنالك خطب ما، ما فتحت باب العربة وجلست على الكرسي وتحركنا حتى أخبرتني بصوت حزين بإن طفلها (محموم) ويعاني من إلتهابات وإن الطبيب قد قرر له بعض الأدوية ولكنها لا تمتلك الثمن ،

أخبرتها بأنو مافي مشكلة والقصة محلولة ، ليس لأنني أمتلك مبلغا كبيرا من المال يمكنني من شراء الدواء لها مهما كان ثمنه ولكن لأنني وبعد أن أقوم بقطع الكبري توجد الصيدلية التي أتعامل معها وأتزود منها بأدوية القلب والضغط والشرايين (يعني زبون وكدة) وممكن لو الأدوية كتيرة نشيلا (جرورة وكده) .
أوقفت العربة أما الصيدلية (نزلت معاي) ، قلت لأولادي بالصيدلية (شوفو الست دي عاوزة شنو) ؟ ، إختارت السيدة نوعين من الأدوية (غالين شوية) والحالة طبعن بطالة والدنيا أخر شهر ، المهم قلنا عمل خير وربنا يعوض .
خرجنا من الصيدلية ، سألتها وهي تجلس على الكرسي (ساكنين وين عشان أوصلكم) ، قالت لي (نحنا ساكنين الثورة لكن ختنا في موقف الشهداء وأديني حق الركشة عشان ما معاي قروش ، بالفعل نزلتها في الموقف بعد أن نفحتها الفيها النصيب .
في مساء اليوم التالي وعندما أردت تناول حقنة الأنسولين (لقيتو خلص) فقلت أتمشي على الصيدلية (ذاتا) وأشتريهو ، ما إن دخلت إلى الصيدلية حتي خاطبني ولدنا (الكاشير) :
– يا استاذ ما شفتنا الحصل أمبارح شنووو؟
– (عندما لاحظوا جميعاً إستغراشي) إنبرى أحد الصيادلة لشرح الموضوع :
– تعرف يا أستاذ إنتا بس مشيت كده بعد ربع ساعة بالضبط الزولة الأمبارح جات معاك دي جاتنا ومعاها زول كده وقالت مشت البيت لقت أبو (الطفل) جاب ليهو الأدوية و عاوزين يرجعوها ويدوهم القروش ؟
– وأديتوهم القروش ؟
– قروش شنو يا أستاذ ديل ناس نصابين ، قلنا ليها إلا يجي الأستاذ نرجعا ليهو لأنو هو الدفعا !!
– وإقتنعوا؟
– إقتنعوا بعد ما جاطو شديد !!

ما يستفاد من الحكاية :
– الشعب ضاقت بيهو الوسيعة
– الإحتيال بقى أشكال وألوان
– مهما كنت (مفتح) يمكن أن تتعرض للنصب والإحتيال

كسرة :
يعني الزولة دي بالسيناريو العجيب بتاعا ده (بالميت كده) تعمل ليها (500) ألف في اليوم !!
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)+و+و

Advertisements

16 تعليق

  1. برنجيه ستاتيه

  2. هههههههه
    احمد ربك البقت علي الدواء .. واحدات بقولن ليك جيب الفي جيبك كلللللو يا نكورك نلم فيك الناس

  3. الشافع الشايلاهو ده قطع شك لمن يكبر حيبقي مؤتمر وطني لا يشق له غبار

    1. ههههههههههه قوية ؛؛؛

  4. هي نسيت !! برنجييييه

    1. برنجيتك مبروكة ،، و كمان معاها المابعرفو شنو داك من كراون بلازا !!😜😜😜

      1. أنا بعرفو !
        أها أقولو ؟

      2. مسانيح انتو الاتنيين ومعاكم السد نفسنا هناك داك زااتو

      3. يكروكم فوق غصن شوك !

    2. هي نسيت !! برنجيتك مبروكة

  5. ما فى داعى لنشر القصة حتي لا نقتل النخوة فى الشعب السودانى الذي رغم ما يعانى لا يتاخر فى تقديم العون للمحتاج خصوصا اذا كان امراءة …

    1. نفسسسسس الفهم

    2. يخلي الناس علي عماهن يعني !!؟

      1. التبصير واجب …

  6. مسكينة !
    و يتطابق معها
    حليلك بتسرق سفنجة وملاية وغيرك بيسرق خروف السماية وفى واحد لو تصدق بيسرق ولاية ودا أصل الحكاية !!

  7. المهم قلبك الطيب يا استاذ

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: