بدل فقع مرارة

واحدة من الأشياء التي إعتدت على القيام بها عندما انتقل للكتابة في أي صحيفة هو أن أقوم بوضع رقم هاتفي (الجوال) في إستقبال الصحيفة منبهاً العاملين بها أن يعطونه لأي مواطن يطلبه ، وذلك من منطلق أن الكاتب الصحفي يجب أن يكون ملتصقاً بقضايا وهموم مجتمعه قريباً من المواطنين وفي متناول يدهم يستطيعون توصيل قضاياهم ومشكلاتهم ومعاناتهم له بسهولة ويسر من أجل طرحها للراي العام والمسؤولين خاصة .

ولقد تعلمت لاحقاً من هذه المسألة أنها (سلاح ذو حدين) حد موجب وهو تسهيل الأتصال والتواصل بيني وبين المواطنين لعرض مشكلاتهم وحد سالب (لأنو في ناس ممكن يكرهوك الكتابة ذاتا) !

مناسبة هذه الرمية كما يقو الصديق البروف (البوني) هو مهاتفة تلقيتها ظهر أمس ، ما أن رن الهاتف (الرقم غير معروف لي) حتى قمت بفتح الخط فجأني من الطرف الأخر صوت رجل يبدو أنه قد تعدي مرحلة الشباب :
– إنتا الفاتح جبرا ساخر سبيل
– معاي منو لو سمحتا
– (تجاهل السؤال ودخل طوالي في الموضوع) : عمودك الأخير بتاع النصائح ده !
– (في إستغراش) مالو عمودي؟ فيهو شنو؟
– قلتا ليا الزول الكاتب الستين نصيحة ده إسمو روبن منو؟
– (روبن شارما) ؟
– وده شغال شنو؟
– الزول ده خبير في التنمية البشرية وتطوير الذات وعمل النصائح دي عشان نحيا حياة جميلة وكده ! المشكلة وين؟
– بقيت تجيب لينا نصائح الكفار والنصارى كمان !
– يا خ ما تزعل لو ما نفعت معاك مافي زول جابرك عليها طنشا طوالي
– إنتا تجيب لينا نصائح الكفار ليه ما تجيب لينا كلام الصحابه ناس بن عباس !
– والقال ليك أنا ما بجيبو منو ؟ قاعدين نجيب كلام الرسول صلى الله عليه وسلم والصحابة والتابعين .. إنتا قريت كل الحاجات الأنا كتبتها عشان تقول كلامك ده !
– (طبعن ما عرف يرد) : – مواصلا- تجيب لينا في نصائح الكفار ؟ المسلمين ديل ما عندهم نصائح؟
– ياخي قلتا ليك كتبنا .. إنتا جاوب على سؤالي إنتا قريت كل الأنا كتبتو ولقيتني ما كتبتا !!
– (رايح تاني) : تجيب لينا النصراني الكافر ده ينصحنا ؟
بالطبع فقد قمت بقفل الخط إذ كنت خارج البيت ولم أكن أصطحب معي أدوية سيولة الدم والشرايين والسكري والقلب !
قبل أن أواصل في المقال بالله عليكم الواحد هسه يسوى شنو؟ هذا النصراني الكافر (كما تم نعته) إجتهد في مجال التنمية الذاتية وتطوير الذات وقام بتأليف 11 كتابا في هذا العلم الحديث نسبياً وها هو يقدمها للعالم أجمع (دون فرز) من أجل أن يكون المجتمع (أي مجتمع) مجتمعاً إيجابيا وناجحا ولم يدع في نصائحه (الستين) التي قمنا بترجمتها إلى معصية أو فجور أو عصيان بل أن معظم نصائحه قد دعانا إليها ديننا الحنيف فها هو ينصحنا أن نستخدم فضيلة الشكر ( كن جادا حول مفهوم الشعور بالإمتنان والشكر تجاه الآخرين) والصبر والحمل (كن صبورا) .. ويدعونا إلى البر بالوالدين (أكرم والديك وعاملهما بالحسنى) وعدم التكبر والمشي بخيلاء(كن متواضعا في مشيتك ) والكثير الكثير !!
لا أدري ما هي وجهة نظر الأخ المتصل ؟ هل يريد منا أن نرفض أي شيء لا يصدر من غير المسلمين؟
على الرغم من أنه يخاطبني (بموبايل) أخترعه مارتن كوبر المهندس الأمريكي (الكافر) ، هل يعلم (أخونا ده) إنو معظم الإختراعات البشرية في كافة مناحي الحياة (عملوها كفار) وإنو (الحقنة الطبية الوااحدة) دي أخترعها يهودي إبن ستين كافر وهو (بنجامين روبن) فهل سوف يتوقف عن أخذ الحقن إن تعرض لمرض؟
ثم إنو كل تلك النصائح التي ذكرها (روبن شارما) تتعلق بالحياة الحديثة كنصيحته التي تقول :
– (قم ببيع جهاز التلفاز الخاص بك) وهذه نصيحة لا يمكن أن يسديها لنا شخص في العصر الإسلامي الأول إذ لم يكن هنالك حينها بسوق عكاظ أجهزة (واي فاي) !

– كسرة :

– العبدلله يفكر بمطالبة إدارة الصحيفة ببدل (فقع مرارة) .. هااات الحبوب ياااا ولد !!

كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووووووووووو)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و

Advertisements

11 تعليق

  1. و دى ختفتها انا

    1. معااااااااااااااك يااااام…..لاك !

    2. هو الليله مالو مبذر كدي ؟
      تعرف برنجيتك دي قطعت فرحتي زي قبل كم يوم فقدت واحد ما بريدو وقبل افرح سمح جا راجع واحد ما بريدو برضو !!

      1. ههههههههههههههههه ,,, ماعجبنى ليك

  2. ههههههههههههههههه
    كات تفتشو في الدين شوية كنت ح تلقاهو مجرد تقصير جلابيه واطالة دقن !! مره عندنا واحد زي ده باقي لينا في رقبتنا النوع المسكوهو الدين شكلا داك .. والله العظيم مره قاعدين ومعانا الشاعر عثمان بشري عنده قصيدة كده بقراها زي الترتيل والله لما انتهي منها صاحبنا ده قال صدق الله العظيم !!!

    1. دي ..
      راحيل يا راحيل أين الفاكهة
      الباقيات الناكهة ..

      مش؟؟؟

      1. القصيدة دى شكلها ما كويسة !!

      2. ايوا يا اب احمد ياها زااتا …
        انت الزول ده وين ؟ ااخر مره لاقيتو في بيت واحد صاحبنا من اولاد امبده السبيل قبل 5 سنه .
        شمباتي .. تكوس وما تلقي

      3. يععععععع ,, دعوتك كعبة خلاس !

  3. الأستاذ الفاتح جبرا …
    معليش نكون جادين جداً جداً جداً .. إنت زول بتهبش حاجات البعض بحاول يسترها بأي طريقه .. إذن و في سبيل تلكم التغطيه قد لا يتورع في تأجيييييييييييييييييييييييييييير واحد يضرك بإسم ( الدين ) – وده الوااااااضح من مكالمة ( شيخنا ده ) – و قد يكون ضرر خفيف … بس الله يستر من الضرر التقيل ..
    عليه أرجو ثم أرجو و أرجو لو ما عشان خاطرنا عشان خاطر ( ناجي ) و اخته و أمهم علي الاقل .. أعمل حسابك ثم أعمل حسابك فأعمل حسابك .. و أي إجراء إحترازي لا ثم لا فلا تتردد في القيام به نهاااااااااااااااااااااااااائي :- بلاغ .. حراسه .. إنتباه شديد .. عدم فتح باب الشارع لأي زول ذي ما عمل الشهيد الصحفي ( محمد طه محمد أحمد ) .. المهم خلي تركيزك عالي جداً جداً جداً و بالغ في حماية نفسك و أسرتك و الباقي علي الله ..
    أنت لست ملك نفسك .. أنت ملكنا نحن .. فنرجوك و نتوسل اليك أن تحافظ علينا و علي ممتلكاتنا

  4. يا زول ها …… وانت لسه فيك مرارة

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: