تهاجروا وتخلووونا؟

طقس من الطقوس اليومية التى إعتدت عليها منذ سنوات لا أعرف كم عددها .. أن أقوم صباحا بالذهاب إلى (كشك الجرائد) القريب أشتري صحيفتين سياسيتين .. ما أن أدخل إلي المنزل حتى أتوجه (للراكوبة) التى تفتح علي المطبخ حيث أضع الصحيفتين على أحد الأسرة وأدلف إلى المطبخ لأصنع كوب قهوتى الصباحية !

أثناء وجودى بالمطبخ كانت جارتنا الحاجة (صفية) التى درجت علي شرب القهوة الصباحية أحيناً معي تتصفح الصحيفتين .. تنظر إلى (الصور) إذ أنها أمية (جيل ما قبل المدارس) ،لم تتلق تعليما لكنها ذات فهم عال ومتابعة لما يدور من أحداث ، ما أن حملت فنجانى القهوة ووضعته بيننا على التربيزة الحديدية وجلست علي السرير حتى خاطبتنى (الحاجة صفية) قائلة وهى تشير إلي صورة بالصفحة الأولى :

– الزول أبو دقينة .. أب وشن صباح خير الرافع العصاية لى فوق ده مالو؟
– ده يا حاجة إسمو (الحسن)
– وموضوعو شنووو؟
– ده زعيم في الحركة الإسلامية .. بيقول إنو عندهم برنامج إسمو (الهجرة إلى الله ) يعني عاوزين يهاجرو إلى الله
– وهو لى هسه ما هاجرو مالهم السنين دي كوووولها ؟ راجين شنووو؟
– يا حاجه الظاهر كانو مشغوليين بالدنيا وكده
– والله كلامك صاح يا أستاذ .. بعد ما ظبطو روحهم وإطمأنو على مستقبل أولادهم .. بعد ده مافي مشكلة اليهاجرو .. (مواصلة) والنساوين الكتااار ديل ح يهاجرو معاهم وللا ح يخلوهم لينا !
– والله يا حاجه علمي علمك لكن أفتكر إنو هم ح يهاجرو شوية … ويرجعو ليهم شوية
– يعني ما ح يهاجرو بي وشهم ..
– ما ظنيت يا حاجة البهاجر بي وشو ده خلاس علاقتو بالدنيا بتنتهى
– والله يا أستاذ كلامك صاح الجماعة ديل علاقتهم بالدنيا شديدة خلاس
وطفقت الحاجة صفية تحدثني عن قريب لها لم يكن شيئاً مذكورا :
– والله يا استاذ كان زول عاادي أهلو (فقرانين) ذينا كده .. مأجر ليهو بيت جالوص بابو (زنك) متكول بي صفيحة ..مما خشا مع الجماعة ديل حالو إتغير .. هسه ساكن ليهو في عمارة خمسة طوابق .. الحوش مليان عربات .. شي كبار وشي سغار .. ومعرس أربعه نسوان كل مرا مسكنا في طابق .. العفش ده كووولو من إيطاليا .. والسفر ده خليهو ساااي … يوم ماليزيا ويوم الصين ويوم ما تعرف وين .. وكل ما أمشي ليهم ألاقي (الخروف) معلق في الباب والجزار بيسلخ فيهو ! .. قلتا ليهم فلان ده شغال شنوو .. قالو ليا ده (أمين) شنوو كده ما عارفة .. أها ده كلام ناس تهاجر !
– هم يا حاجه مش ح يهاجرو بالكامل يعني !
– شنو. هجرة نص نص
– عليك نووور يا حاجة .. يعني ذي ما تقولي الواحد ح يهاجر كده من صلاة الصبح لحدت العصرية كده .. ويرجع من هجرتو ويقبل على الطيبات !
– طيب ما يعملوها (إعارة) .. إنتداب .. دي هجرة شنووو ؟
بيني وبينكم .. كلام حاجه صفية معقول .. قصة (الهجرة إلى الله) الذي ينادي بها الأخوة والأبناء في تنظيم الحركة الإسلامية دي واسعة شوية .. وما أظنهم بعد هذه (التوسعة الحصلت لهم دي) بيقدروا عليها لذلك أضم صوتي إلى صوتها وأقترح عليهم أنو يقلبو القصة (إعارة) أو (إنتداب) أو حتى (ورديات) !! عشان موضوع الهجرة ده مااا بقدرو عليهو … ومتطلباتو حاااارة وكده !

كسرة :
تهاجروا تخلووونا … معقولة ياااخ

كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووووووووووو)+و +و+(و))
كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+و+(و)
كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنو؟ : (و) +(و)

7 تعليقات

  1. Brngiah

    1. اللهم إني صائم …… (:

  2. ديل يا بروف هجرتهم ما زي هجرتنا …. لا الهجرة حقت الله … ولا الهجرة لي بلاد برة … !

    نحنا بنهاجر لي الله سائلينو يرفع عننا البلاء المتمثل في وجودهم على أنفاسنا ….

    وبنهاجر لي بلاد برة بعد ما ضيقوا علينا الواسعة وبقوا لينا في العزيزة … !

    فعمرنا ما حنتلاقى في هجرة …. !

    ببركات هذا الشهر … اللهم أرنا فيهم دلائل قدرتك … وخذ بحقنا من عافيتهم وأمانهم وذرياتهم !!!!

    1. آمييييييييييييين

  3. اللهم عليك بهم قبل أن ينزلوا من راحلاتهم أللهم أنت تعلم أن راحلاتهم ليست نوق و جياد يهاجرون بها فى سبيل الله بل هى كروزرات لهم و كامري للسيداتتهم أو طائرات فيرست كلاس لهم ولهن ،،،،، ولهن هنا ليست لما حلل الله لهم من الاربعه ، لا بل لخليلاتهن وانت اعلم العالمين
    اللهم عليك بهم دمر كروزراوتهم اهوي و طائراتهم و إغرق سفن كونتينراتهم التى لاتجلب إلا الدمار لشبابناهم
    اللهم بعد تخلص منهم تعال قبل على الإتنين الكبار الفضلوا ديل

    1. ههههههههههههههه , ظنيتك فطرت مع قردك داك !
      لكن نقول اميييين

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: