عاوزه شرح وكده

أراد أحد المواطنين السودانيين المقيمين في الأمارات أن يقوم بشحن حاوية تحتوي على مواد تشطيب لمنزله في السودان ، فوجئ بشركة الشحن تبلغه بأنها لا يمكن أن تقوم بشحن الحاوية ما لم يتم إجراء فحص مسبق لها بواسطة شركة صينية تسمى CCICME وقالوا ليهو أن هذا الإجراء لجميع البضائع الصينية في الأمارات قبل شحنها للسودان وذلك للتأكد من مطابقتها للمواصفات حسب التعليمات الوارده إليهم من الهيئة السودانية للمواصفات والمقاييس (عبر تعميم صادر منها) ، قد يكون الموضوع (معقول) إلى حد ما لكن تعالوا نشوف الما معقول (أبلعوا حبوبكم وواصلو) :

1- شركة CCICME هي الشركة الوحيدة المخول لها القيام بهذا الإجراء .. مافيش غيرها (نظام إحتكار وكده)
2- تبداء رسوم الشركة من 20 دولار للتفتيش+50 دولار مواصلات+ 200 دولار رسوم ختم + 15 دولار للبوستة (أي أن الحد الأدنى هو 285 دولار أمريكي)
3- تزداد الرسوم مع زيادة قيمة البضاعة وليس مكانها أو عدد القطع إلخ وقد تتعدى مبلغ الألف دولار أمريكي
4- شهادة المطابقة الصادرة من الشركة عبارة عن كلمتين Passed & Qualifiedبدون ذكر أي مرجع للمواصفات أو المقاييس المزعومة مع العلم أنه في علم الجودة يجب أن يكر رقم المواصفة المطابقة وجهة إصدارها إلخ ( يعني مافي مواصفات وللا بطيخ)
5- تفرض الشركة إجراءات تعسفية وعدد كبير من الأوراق والمراسلات قبل التفضل والتعطف بإرسال المحصلين أقصد (المفتشين)طبعا عشان يقنعوك إنو المسألة صعبة وفيها شغل وهنالك رسوم تتحصلها الشركة تحت مسمى (عمل إضافي) هي شنو مفيش حد عارف
6- عندما قام المواطن بالإستفسار من الملحقية الإقتصادية بالسفارة السودانية بأبي ظبي أفادته (الملحقية) بأنها لا علم لها بموضوع هذه الشركة (شفتو كيف؟ شغل تحت تحت) وقد أبدى العاملون بالملحقية (إستغراشهم) لذلك ، طيب لو الملحقية الإقتصادية ما عارفه (كلام ذي ده) يبقى العارف منوووو؟

ونحن أيضاً نبدي (إستغراشنا) لذلك ونسأل أخواننا في الهيئة السودانية للمواصفات والمقاييس و(ريالة الأطفال) تسيل من أفواهنا الإسئلة التالية :
1- لصالح من يتحمل المغترب أو التاجر أو المستهلك السوداني هذه الرسوم الباهظة التي تذهب لشركة صينية واحدة بعينها ومن قام بالتعاقد معها وكيف؟
2- كيف وعلى أي أساس تم تحديد الرسوم وإختيار هذه الشركة بالذات؟
3- ما هي مصلحة حكومة السودان في كل هذه الأعباء والإجراءىت ولماذا لم يتم التنسيق مع الملحقيات الإقتصادية في السفارات؟
4- لماذا فقط البضائع (الصينية) المسألة لو مواصفات يجب أن تطبق على كل البضائع لأن الغش التجاري ليس محصوراً على الصين وهو موجود في كل الدنيا (وللا ما كده؟)
5- لماذا يخول لشركة غير (وطنية) القيام بمثل هذا العمل الذي يتطلب القيام به (الروح الوطنية) .. يعني بالعربي (كيف نضمن أن تقوم هذه الشركة بعملها بصدق وإخلاص؟)
6- ما هي خلفيات هذه الشركة ومؤهلات موظفيها ومدى تدريبهم وعلمهم بالمواصفات؟ هل لديهم مختبرات ومعامل؟ وهل يعقل أن نفس المفتشين بتاعين الشركة يمكنهم مطابقة ومقايسة جميع منتجات الصين من (الإبرة) وحتى (الصاروخ) .
لك أن تعلم عزيزي القارئ أن هذه الشركة تتحصل سنوياً ملايين الدولارات (الكل يوم طالع ده) ويتحملها الإقتصاد السوداني و المواطن السوداني بلا فائدة تذكر .
السيد مدير عام (الهيئة السودانية للمواصفات والمقاييس) نرجوك بكل تقدير و(إحترام) أن تفض لنا (اللثام) عن هذه الشركة وأن تجيب لنا عن أسئلتنا المشروعة (الفوق دي) سؤال .. سؤال .. لأنو القصة عاوزه شرح وكده !

كسرة :
يا ناس المواصفات نرجو سرعة الإستجابة عشان ما نعمل ليكم كسرة (ثابتة) … أخبار الشركة الصينية بتاعت الفحص المسبق شنووووووووووووووووووو

كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووووووووووو)+و +و+(و)

كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+و+(و)

كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنو (و)+(و) ؟

Advertisements

8 تعليقات

  1. السلام عليكم

  2. ممكن أضيف سؤال: هذه المواد مشتراه من دولة الأمارات وبالتأكيد لديها شهاددة مطابقة للمواصفات الخليجية وشهادة منشأ لأنو الناس دي ما بتلعب وما عندهم تحت تحت بتاعتنا ……………..هل هذا غير كافٍ لجماعتنا الحريصين على سلامتنا …ولاّ الحكاية لهف ولغف بس…………………يا خي نحن بقينا حرفاء بشكل في إستنباط طرق الهبس بدرجة تخلي إبليس يتنازل عن عرشه

    1. حليلك ياخي ابليس فارق بلدنا زمان حليل ابليس وزمنة الجميل يوسوس ليك هههههههه هسع ديل اصعب

  3. الهم انى صائم اقول وينجينا الله من شر القوالة ناس المواصفات والمقاييس زاتم مابكون عندهم علم بالشركة دى انها بتعمل كدا فى الامارات بالنسبه للسودانيين عشان يجاوبوك دى اسمها اساله ليست للاجابه المتفق معاهم دا واحد بس وبشيل القروش يدخلة جيبه والمراسلات برد عليها من مكتب هناك فى السودان اها انا جاوبتك

  4. يا عمك المعلومة غايبة عن جماعة الاقتصادية ديل راقدييييييييين ساكت على دافع الضرائب وما بقدروا يفكو الخط حت اسألني منهم

  5. كتمت كتمت كتمت بتفرج بعد كده بس بالدم

  6. طالما الموضوع خاص بالبضايع الصينية بس .. الفكره دي بتكون من الجنا اب رويس الاسمو عوض تاو وانغ الجاز ده !! الجنا ده مُضِر بالحيييل والصينيين بقوهوا مستشارهم ودراعن اليمين ..

  7. ويا ربي اشمعنى في الأمارات بس ! باقي الدنيا ما منها خوف، ولا الغلة هنا كافية ؟؟

    الناس ديل فشلوا في (كل) شيء عملوهو في البلد …. وفشلونا قدام خلق الله … الله لا غزا فيهم بركة …

    اللهم بدعوات الصائمين … أرفع عنا البلاء وأرنا فيهم دلائل قدرتك …

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: