بديل نقدي

منذ أسابيع والعبدلله بيشغل في (مخو) .. لم يعد المرتب يكفي .. خاصة بند (الأكل) أصبح يستحوذ على معظم (الميزانية) على الرغم من (شطب) أشياء من المائدة بإعتبارها من الرفاهيات كالفاكهة بأنواعها بعد أن تجاوز سعر البطيخة (المائة ألف جنيه) .. ودستة (البرتقال) الستين ألف .. أخيرا وبعد تفكير عميق للخروج من هذه (الزنقة) قررت أن أتقمص دور الحكومة وهي تتعامل مع الشعب .. قمت بالإعلان لإجتماع أسري طارئ ضم (العيال) وأمهم أعلنت فيه إنتهاء سياسة (أصرف ما في الجيب) والإستعاضة عنها بسياسة (البديل النقدي) .. ما أن تفوهت بهذا القرار حتى نظرت لي زوجتي في (إستغراش) قائلة :

– كلامك ده يعني شنووو؟
أجبتها في هدوء كذلك الهدوء الذي يخيم على قسمات وجه وزير المالية وهو يعلن عن رفع الدعم عن السلع الضرورية
– الحكاية بسيطة أنا ح أدي كل زول فيكم بديل نقدي بدلاً عن (الدعم الطوااالي ده)
– هنا (نط) الود ناجي متسائلاً : (يعني يا بابا عاوز تزيد لينا المصروف؟ )
وختفت (البت شنشوى) الكلام منو :
– والله يا بابا المصروف ببتاعك ده ما بعمل أي حاجة مع الحاجات السعرها زاد دي .. الساندوتش في المدرسة بقى بي خمسطاشر ألف والعصير بي خمسة ألف !
ثم أمسك (ناجي) بدفة الحديث مرة أخرى :
– تعرف يا بابا القروش البتديني ليها دي ما بتكفيني وبضطر أتدين من بقالة المدرسة وعندي ديون ما قادر أسددها من السنة الفاتت؟ يعني بقت ديون هالكة !
– أسمعوا يا أولاد أنا قررت أديكم القروش وإنتو تتصرفو عشان مافي زول تاني يجي يقول ليا عاوز وعاوز .. يعني تكونوا (متكفيين) تاكلو وتشربو بي طريقتكم
– (بصوت واااحد) : و ح تدينا كم يا بابا ؟
– كل واحد فيكم الإتنين ح أديهو 600 ألف وأوعكم تقولو شوية .. دي مرتب طبيب إمتياز !
– ونعمل بيها شنووو ؟
– كل واحد فيكم ياكل ويشرب منها ! أنا بدفع ليكم الموية والكهرباء والعوائد وأقساط المدرسة والغسيل والمكوه والصابون والمعجون وهدوم العيد !
– يا بوي أنتا بتهظر؟
– كيف يعني؟
– إنتا عارف طلب الفول بي كم ؟
– عارفو بي عشرة ألف
– طيب هسه لو فطرنا فطرتا فول وإتغديت فول وإتعشيت فول ديل بي كم؟
– 30 ألف
– يعني في الشهر كم ؟
– 30X30 تسعمية ألف
– طيب كيف ح تدينا بديل نقدي ستمية ألف ؟ وين البارد ووين ؟ ووين طباعة المذكرات والمواصلات ؟
– (هنا نطقت أمهم) : وأنا البديل النقدي بتاعي وين؟
– خلاس إنتي ذاااتك ستمية ألف؟
– ودي أعمل بيها شنوو؟ آكل منها وللا أشرب منها وللا أتحنن منها ولا أواجب بيها النسوان ؟
– شوفوا هنا .. القرار ده قرار غير قابل للإستئناف (ما قرار حكومة وكده) .. خلونا خلاس نجرب حكاية (البديل النقدي) دي الشهر ده وبعداك نشوف !
بعد أسبوع :
إستيقظت على هدير مظاهرات عارمة تطوف بأركان المنزل يقودها (السيد ناجي) وخلفه أخته ووالدته وهم يحملون لافتة كتب (من لا يملك قوته لا يملك قراره) ويهتفون .. يسقط يسقط البديل النقدي .. يسقط يسقط رفع الدعم !!

كسرة :
نعيش في لحظات من عمر (الوطن) أبرز ما يميزها أنها بلا طعم أو لون أو رائحة أو (زول مسؤول)ّ !!!

• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+وووووووووووو)+ (وووووووووووو)+(وووووووووووو)+(وووووووووووو)+ (وووووووووووو)+و+و+و+و+و+و+و+و+(و)

• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+و+و+(و)

• كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنو (و)+(و)+(و) ؟

Advertisements

9 تعليقات

  1. برنجيييييييييييييييييييييية

    1. ماطيها كدة مالك ؟؟
      ما بعد طول غياب و كدة ..
      مبروكة و بالهناء !!

  2. غريبة !!
    ومعاها إستغراش كمان !!
    إستيقظت دي باااالغت فيها !!
    لو كنت ماسك زمام الإمور في بيتك تمام ما كنت إستيقظت !!!!
    حكومتك فاااااشلة

  3. طبعا دا رد الفعل الطبيعي لكن الشعب دا بقي ما طبيعي عشان كدة ردة فعلو ما ح تكون طبيعية
    وقد اسمعت اذ ناديت حيا ولكن لا حياة لمن تنادي

  4. و لييييه التعب ده يا استاذ !؟ انت تمش سوق 6 الحاج يوسف بتلقي واحد اسمه منو كده الراصطه تشتري منه فنلة رونالدو وتقوم تسوق معاك كم واحد من اصحابك الصحفيين و امشوا القصر الجمهوري سلم علي الرئيس( بدخلوكا طواالي ولااا بقولوا ليك عندك مواعيد ؟ ) وقول ليهوا انا جاييك من رونالدو وهو بسلم عليك وقال ليك انا معجب بيك وهاكا فنلتي دي هدية .. يلا بعد تتصوروا معاهو ومع سكرتاريتو وباقي طقم المستشارين بتاعينو تقوم تقول ليهو انا الكاتب الفاتح جبرا وعندي مجموعه كتب ياخ اشتري منها زي الف نسخه كده .. هو طوالي حيقوم يكلم مدير مكتبو ويقول ليهو اكتب ليهو شيك بي قيمة 10000 نسخه ( هو دافع حاجه من جيبو ) تقوم تحلحل امورك وتنبسط .
    ملحوظه :
    ما تخاف من جيش الاستخبارات والامن الحوالينه ما حيكشفوا انو الفنلة من سوق 6 في الحاج يوسف ! اصلو ديل متخصصين في المعارضين بس . لو لو خليت ناجي يلبس فنلة مرسوم فيها شجرة وسقتو معاك تبقي مية مية .

  5. أحيييي أنا يااا بلدي يا فردة جناحي التاني وكت الناس تطير لي عالما !!
    شمباتي انت قعد تقول شنو ؟ حاجه كده بتشبه قلة الادب .. نبكوكي بنيكي ولا شنو ؟

    1. هووووووى ! بلا شمباتى بلا حركات معاك ! جاى تقولنى كلام مو ياا !!
      يا بتاع الراصطات والجصطبات والجلكسات انت

  6. اسوأ ايام مرت على البلاد والعباد ,, ونسال الله رفع البلاء وتخفيف القضاء والانتقام من الاعداء ,,

  7. عزه قومي كفاك نومك
    وكفاكي سكات قومك
    انتي يا البهدلوك
    وللفنيله هدوك
    والرئيس فرحااااان

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: