بديل نقدي

منذ أسابيع والعبدلله بيشغل في (مخو) .. لم يعد المرتب يكفي .. خاصة بند (الأكل) أصبح يستحوذ على معظم (الميزانية) على الرغم من (شطب) أشياء من المائدة بإعتبارها من الرفاهيات كالفاكهة بأنواعها بعد أن تجاوز سعر البطيخة (المائة ألف جنيه) .. ودستة (البرتقال) الستين ألف .. أخيرا وبعد تفكير عميق للخروج من هذه (الزنقة) قررت أن أتقمص دور الحكومة وهي تتعامل مع الشعب .. قمت بالإعلان لإجتماع أسري طارئ ضم (العيال) وأمهم أعلنت فيه إنتهاء سياسة (أصرف ما في الجيب) والإستعاضة عنها بسياسة (البديل النقدي) .. ما أن تفوهت بهذا القرار حتى نظرت لي زوجتي في (إستغراش) قائلة :

– كلامك ده يعني شنووو؟
أجبتها في هدوء كذلك الهدوء الذي يخيم على قسمات وجه وزير المالية وهو يعلن عن رفع الدعم عن السلع الضرورية
– الحكاية بسيطة أنا ح أدي كل زول فيكم بديل نقدي بدلاً عن (الدعم الطوااالي ده)
– هنا (نط) الود ناجي متسائلاً : (يعني يا بابا عاوز تزيد لينا المصروف؟ )
وختفت (البت شنشوى) الكلام منو :
– والله يا بابا المصروف ببتاعك ده ما بعمل أي حاجة مع الحاجات السعرها زاد دي .. الساندوتش في المدرسة بقى بي خمسطاشر ألف والعصير بي خمسة ألف !
ثم أمسك (ناجي) بدفة الحديث مرة أخرى :
– تعرف يا بابا القروش البتديني ليها دي ما بتكفيني وبضطر أتدين من بقالة المدرسة وعندي ديون ما قادر أسددها من السنة الفاتت؟ يعني بقت ديون هالكة !
– أسمعوا يا أولاد أنا قررت أديكم القروش وإنتو تتصرفو عشان مافي زول تاني يجي يقول ليا عاوز وعاوز .. يعني تكونوا (متكفيين) تاكلو وتشربو بي طريقتكم
– (بصوت واااحد) : و ح تدينا كم يا بابا ؟
– كل واحد فيكم الإتنين ح أديهو 600 ألف وأوعكم تقولو شوية .. دي مرتب طبيب إمتياز !
– ونعمل بيها شنووو ؟
– كل واحد فيكم ياكل ويشرب منها ! أنا بدفع ليكم الموية والكهرباء والعوائد وأقساط المدرسة والغسيل والمكوه والصابون والمعجون وهدوم العيد !
– يا بوي أنتا بتهظر؟
– كيف يعني؟
– إنتا عارف طلب الفول بي كم ؟
– عارفو بي عشرة ألف
– طيب هسه لو فطرنا فطرتا فول وإتغديت فول وإتعشيت فول ديل بي كم؟
– 30 ألف
– يعني في الشهر كم ؟
– 30X30 تسعمية ألف
– طيب كيف ح تدينا بديل نقدي ستمية ألف ؟ وين البارد ووين ؟ ووين طباعة المذكرات والمواصلات ؟
– (هنا نطقت أمهم) : وأنا البديل النقدي بتاعي وين؟
– خلاس إنتي ذاااتك ستمية ألف؟
– ودي أعمل بيها شنوو؟ آكل منها وللا أشرب منها وللا أتحنن منها ولا أواجب بيها النسوان ؟
– شوفوا هنا .. القرار ده قرار غير قابل للإستئناف (ما قرار حكومة وكده) .. خلونا خلاس نجرب حكاية (البديل النقدي) دي الشهر ده وبعداك نشوف !
بعد أسبوع :
إستيقظت على هدير مظاهرات عارمة تطوف بأركان المنزل يقودها (السيد ناجي) وخلفه أخته ووالدته وهم يحملون لافتة كتب (من لا يملك قوته لا يملك قراره) ويهتفون .. يسقط يسقط البديل النقدي .. يسقط يسقط رفع الدعم !!

كسرة :
نعيش في لحظات من عمر (الوطن) أبرز ما يميزها أنها بلا طعم أو لون أو رائحة أو (زول مسؤول)ّ !!!

• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+وووووووووووو)+ (وووووووووووو)+(وووووووووووو)+(وووووووووووو)+ (وووووووووووو)+و+و+و+و+و+و+و+و+(و)

• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+و+و+(و)

• كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنو (و)+(و)+(و) ؟