دي حالة بلد

كشف مؤخراً السيد فرح مصطفى وزير التربية والتعليم بولاية الخرطوم عن الحقائق التالية :
• وجود نقص في المعلمين يبلغ ( 6,379 ) معلم في مرحلتي الاساس والثانوي .
• وجود ( نقص) في الاجلاس بلغت نسبته ( %26.5 ) في مدارس الاساس .
• وجود ( نقص) في الاجلاس بلغ بلغت نسبته ( %26 ) في المدارس الثانية .
• وجود (نقص) في الكتاب المدرسي بلغت نسبته (%55 ) في مرحلة الاساس .
• وجود (نقص) في الكتاب المدرسي بلغت نسبته ( %66 ) في المرحلة الثانوية .
• أكثر من (25%) من الطلاب لا يجدون مقاعد .
• أكثر من ( %60 ) من الطلاب لا يجدون كتاباً .

– دي حالة بلد المغتربين بيدخلو ليها مليارات الدولارات سنوياً؟
– دي حالة بلد ثروتو الحيوانية تقدر بـ 103 مليون رأس؟
– دي حالة بلد الأراضي الصالحة للزراعة فيها أكتر من 42 مليون فدان؟
– دي حالة بلد بتصدر أطنان من الدهب سنوياً ؟
– دي حالة بلد فيها الفضة والنحاس والزنك والحديد و الكروم و المنغنيز والجبص والرخام وغيرها.
– دي حالة بلد تقوم بإستضافة الموتمرات القاعدية والدولية والجهوية ، فكل شهر تستقبل ارتال من الوفود من الخارج
– دي حالة بلد يتم فيها تبديد ثروات البلاد في الترضيات وشراء الاشخاص (هسه الحسن ده شغال شنووو وداوم ليهو كم يوم مما جا)؟.
– دي حالة بلد يتم فيها الصرف البذخي على بناء المباني الحكومية وشراء الاثاثات ؟
– دي حالة بلد كل دستوري في البلد سائق ليهو عربية برادو موديل السنة غير العربات الفي البيت؟
– دي حالة بلد كل يوم والتاني مسافرة منها وفود للخارج .. طيارات وفنادق ونثريات
– دي حالة يتبرع فيها ديوان زكاة لقناة فضائية بخمسين ألف دولار
– دي حالة بلد (يتحللو) فيها من مليارات الجنيهات (ولا عقاب ذاااتو)
– دي حالة بلد يستوردو ليها قطارات مضروبة بي 155 مليون دولار؟
– دي حالة بلد يشترو ليهو يخت (جاثم) بي 4.5 مليون دولار؟
– دي حالة بلد (نفرين بس) يسرقو منها ملايين الدولارات واليوروهات ..(الأقطان) ؟
– دي حالة بلد وزير فيها (لا راح لا جا) يشتري ليهو منزل بي 2 مليون دولار (وكمان يملح السمسار)؟
– دي حالة بلد فيها (والي) يعمل ليهو (ورشة عمل) عشان تناقش تصميم وخرطة البيت الحكومي العاوز يبنيهو؟
– دي حالة بلد تبني ليها (سد) بي مليارات الدولارات ويطلع أي كلام؟ (كان تحسنو بيها التعليم)
– دي حالة بلد تشتري لاعبين كورة من بره بي ملايين الدولارات؟
– دي حالة بلد دخلت خزينتا (عائدات بترول) بمئات المليارات من الدولارات؟
– دي حالة بلد يبنو فيها قصر تااااني (القديم مالو؟)
– دي حالة بلد تشارك في الأولومبياد .. تذاكر ولإقامة ونثريات؟ (لا .. وما أحرزو وللا كوز صلصة)
– دي حالة بلد يتقاضى فيه موظف دولة راتبا شهريا قدره ( 18 مليون جنيه )، و بدل عيدين قدره 90 مليون و بدل ملابس قدره 72 مليون وبدل بونص 225 مليون و وبدل إجازة 90 مليون مع قيمة التذاكر له ولأفراد أسرته؟
– دي حالة بلد يروح من ميزانيتها 960 مليون دولار وما تتعرف مشت وين كما جاء في تقرير المراجع العام؟
– دي حالة بلد تتسرق من منازل ومكاتب مسؤوليها الآلاف المؤلفة من مختلف أنواع العملات الحرة؟ (الفي البنوك كم؟)
– دي حالة بلد تنظم فيها الإحتفالات لإستقبال (والى) رجع من إجازتو؟ (طيب لمن يرجع من شهرالعسل كيف؟)

كسرة :
• أكثر من (25%) من الطلاب لا يجدون مقاعد وأكثر من ( %60 ) من الطلاب لا يجدون كتاباً … كان كده الترابة دي في خشمنا !! قال أيه (أمريكا) قد دنا عذابها … عذاب أيه ؟ روووحوا منكم لله !!

• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+وووووووووووو)+ (وووووووووووو)+(وووووووووووو)+(وووووووووووو)+ (وووووووووووو)+و+و+و+و+و+و+و+و+(و)+و+(و)

• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+و+و+(و)+و+(و)

• كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنو (و)+(و)+(و) +و+(و)

Advertisements

3 تعليقات

  1. دى برنجية بالله دى ؟؟؟

  2. What about its president sent 100 Ugandans pilgrims for 700000 US$ while he did nothing for the poor Sudanese whose homes collapsed because of the rains and the floods.

  3. انا معاك انو ادق وصف يصور حقيقة الحكومة انها عبارة عن 😦 اداة تدمير نووي شامل يهدم اي اقتصاد مهما بلغت قوته ) ، يعني لو ادوهم اليابان بعون الله حيحصلوها محلية كرري في دقيقتين .. وده امر مفروغ من (صحتو) …
    وانا لا انتقص من هذا المقال الرائع ولكن الواقع يقول ان هذه الكلمات وغيرها أمست بلا معنى……
    الحكومة تستطيع ان تشتري مصنع تويوتا للسيارات ومول الواحة ومطعم عوضية سمك .
    الحكومة قادرة تماماً بمواردها الجبائية من الزكاة والضرائب والجمارك والقضائية والبالغة مليارات الدولارات ان تشتري مصانع لدولة السودان في هون كونق زي امريكا وبعض الدول الاوروبية تماماً .
    ولكن الكلام ساهل بس ما حصل سألت نفسي متين حأكسر حواجز الكسل والخوف وابدا في دراسة مشروع خاص ممكن من خلالو
    اتطور واجتهد لحد ما يوافيني الاجل!!!!!!! ….
    طبعاً في ناس بعد ما ينتهو من قراية الكلام ده مجهزين شماعتهم هي (الحكومة حتخليك)!!!!!؟؟؟؟…
    انا معاك تماماً ..
    أختلف فقط في النظرات التشاؤمية والشماعات المجانية التي تمثل المبرر القوي لصرف الانتباه عن خنوع بعض الناس وكسلهم مما ورث مفهوم الاتكالية في باطن عقل الجيل الجديد …..
    واقرب مثل ، النفايات بتكون قاعدة امام الفلل والعمارات لسنوات .. والذين ان سالناهم ليه ما تزيلوها بنفسكم يقولوليك بكل ثقة في نفسهم الطاهرة النظيفة : ناس النظافة ما شايفين شغلهم … طيب ايه النتيجاااااا ؟؟؟؟؟؟ الحكومة اكبر مقصر اسطوانة قديمة مشروخة حفظناها من الالفينات نعم الحكومة اكبر مقصر لكن انا اكون اكبر معفين.. افتكر ان ده عيب………..
    الثورة يجب ان تكون ثورة استثمار في العقل وتغيير في التفكير……

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: