الأمازون .. نهاية بطل

إلى عهد قريب كان العبدلله يعتقد جازماً بأن العدل بجمهورية الأمازون لا يضاهيه عدل حتى أرسل لي أحد المواطنين (الأمازونين طبعن) بشريط فيديو مسجل عليه (أعتراف) زوج قام بقتل زوجته ، أدلى به للسلطات (الأمازونية) المختصة وقد إحتوي التسجيل (صوت وصورة) على الإعترافات والتفاصيل التالية :

– أنا إسمي (م م ع) .. العمر 50 سنة .. أعمل معلماً بالمدارس الثانوية
– تزوجت (س) عام 2001 ، في الأول العلاقة كانت بيناتنا طيبة وجيدة ، بعد فترة في السنوات الأخيرة العلاقة بينا سأءت والمشاكل بقت تكتر بيناتنا وهي حادة هي شوية في الطبع وكثيرة الجدل والمطالبات .
– أنا في نفسي من بدري قررت إنوا لابد في يوم من الايام يا اما اطلقا او (اتخلص منها)
– الفكرة راودتني أكتر لأنو (جاني طمع في البيت) ال هي إشترتو ومسجل بأسمها ،وبرضوا في كلاما ليا إنوا تاني (عندها قطعتين أرض) ماشفتا أوراق القطع لكن سمعتا منها .
وبدأ الزوج يحكي بالتفصيل الديقيق جداً كيف أنه بيت النية للتخلص منها ، وأنه حينما عزم على التنفيذ جهز أداته (طورية) ثم إنتظر اللحظة المناسبة وهو يتتبعها بعد أن خلع نعليه بعد أن أخذ الطورية ثم أدركها من ورائها وسدد لها ضربة قاتلة على رأسها وبعد أن وقعت على الأرض أمسك بيديه على فمها كاتما أنفاسها حتى فاضت روحها ..
الإستجواب :

س : انت قاصد تقتلا يعني؟
ج : آآي قاصد
س : وقتلتها في البرندة ؟
ج : في البرندة نعم
س: قتلتها بالطورية؟
ج : نعم
س: والضربة كانت قاتلة بالنسبه ليها ؟
ج : ايوا ضربه قاتلة قوية
س: كآنت قاتلة يعني ؟
ج: ايوا
س : ومسكتها وعصرتها لمن لفظت روحها؟
ج : أيوة
س: وماتت وإنتا ماسكها بى أيديك ؟
ج :أيوا .. ايوا نعم
س : ما قالت ليك أي حاجة ساعة ماتت؟
ج: ما متأكد … لا
س: ما شافتك ساعة ضربتها ؟
ج: والله في الأول ماشافتني .. تاني أنا ما أديدتا فرصة لأنو وجهها كان تحت ، وشيها لي تحت ، ما متأكد عرفتني وللا ما عرفتني
س: إنتا لمن ضربتها بالطورية عصرتها بإ يديك ولفظت أنفاسها الأخيرة علي يديك إنتا ؟
ج : أيوا
س: يعني بعد ما اتأكدت إنها ماتت حتي طلعت بره تصرخ وتكورك وتقول إنوا (س) اضربت وكدا؟
ج :أيوا … أيوا
س: و منعت الناس إنو يخشوا البيت؟
س: وكنت منكر الكلام دا نهأئي ؟
ج: اها . الكلام دا انكرتوا في الاول أيوا
س: وهسسه إنتا معترف بمحض إرادتك؟
ج: نعم…
س: في زول غاصبك ؟
ج : لا.. لا
س: دي بى إرادتك إنتا؟ بتتكلم بى إرادتك وبكامل قواك العقلية والبدنية؟
ج : آآى نعم
س: انك قتلت زوجتك (س) ؟
ج : ايوا
س : قول أنا أعترف إني قتلت (س) بالطوريه في يوم كذا
ج : أعترف إنو أنا قتلت زوجتي (س) بالطورية في يوم يوم كذا

محدثي الأمازوني .. أنه بعد تفتيش منزل المتهم عثرو على جلبابه الذي كان يرتديه عندما إرتكب جريمته وعليه آثار دماء وعند إرسالها للمعامل الجنائية جاءت النتيجة أنها تطابق دماء القتيلة ..

بعد أن شاهدت إعترافات القاتل .. وإستمعت إلى إفادة محدثي (وهو شقيق القتيلة) سألته :
– أها الزول ده أعدموهو وللا لسه؟
– الزول ده يا أستاذ المحكمة (برأتو) وهسه حر طليق ومش كده وبس
– أها في شنوو؟
– مشي المحكمة يطالب بى ورثتو في (المرحومة) !!
قلت له وكلي (إستغراش) :
– وكت القصة حصلت كده ، كان كده (الأمازون دي) إنتهت نهاية بطل !!

كسرة :
لا تستغرشو كون أن هذا القاتل طلع بريء رغم كال هذه الأدلة فشقيقتة كانت عضوة في البرلمان ……. (الأمازوني طبعن) .

• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+وووووووووووو)+ (وووووووووووو)+(وووووووووووو)+(وووووووووووو)+ (وووووووووووو)+و+و+و+و+و+و+و+و+(و)+و+(و)

• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+و+و+(و)+و+(و)

• كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنو (و)+(و)+(و) +و+(و)

Advertisements

5 تعليقات

  1. دا قاتل ما شافش حاجة ولا شنو؟
    كلامك صاح انتهينا لانو دا من نوع اذا سرق فيهم الشريف تركوه واذا سرق فيهم الضعيف اقامو علية الحد

  2. برنجية في الحوادث – امدرمان.

  3. غلطانة المرحومة … القال ليها تسج البي بإسمها منو ؟؟؟

    طيب بدل يلحقوها أمات طه …. ما كان أخير شقيقتو البرلمانية تنقل الملكية لأخوها .. ويا دار ما دخلك شر !!

    ولا تطلع ليهو بيت بإسمو من المدينة الرياضية … ولا من الإسكان الشعبي (الفاخر) !

    دي أظنها فاتت عليهم ….. وقدر المسكينة ….

    1. الحروف الناقصة دي الشالا منو ؟؟؟؟؟؟
      🙂 🙂 🙂

      (القال ليها تسجل البيت بإسمها منو )

      1. ههههههههههههههه , مقص الرقيب لحق هنا ؟؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: