بعد أن شهد مستشفى امدرمان للطوارئ والاصابات أحداث العنف المؤسفة الأخيرة علي خلفية تهجم وإعتداء بعض المواطنين علي الأطباء وتحطيم وتهشيم كل الأجهزة والمعدات الطبية الموجودة بعيد وفاة أحد المواطنين تم إحضاره للمستشفي وهو في وضع صحي حرج عقب تلقيه لثلاثة طعنات حيث فشلت الإسعافات في إنقاذه فتوفي متأثراً بجراحه .. بعد هذه الحادثة سألني صديقى :
– حوادث الإعتداء دي يا أستاذ إتكررت وبقت كتيرة خلاس .. تفتكر السبب شنووو؟
– السبب واااضح … الحكومة ما (بتصرف) علي الشعب !
– ما فاهم
– القصة ما عايزه ليها فهم … البيئة في المستشفيات الحكومية سيئة ومتردية ، هل تعلم إنو مستشفى أم درمان ده بيجوهو في قسم الحوادث أكتر من 1500 مريض في اليوم ؟ الألف وخمسمية مريض ديل أسطوانات الأوكسجين المتوفرة ليهم ما بتفوت (العشرة أسطوانات) ؟ يعني لو كل مريض أخد ليهو (شمة وااااحدة) ما يكفو !!
– طبعا يا أستاذ في الحالة دي لو جاء زول وشايل ليهو مريض كاضم وقالو ليهو الأطباء أوكسجين مااافي طواااالي ح يحملهم المسؤولية ..
– أكيد ..مع إنو ما عندهم ذنب
– خليك من الأوكسجين .. هل تعلم إنو المستشفي بيعاني من عدم وجود الأدوية المنقذة للحياة ؟
– طبعاً يا أستاذ في الحالة دي لو جاء زول شايل ليهو مريض كاضم وقالو ليهو الأطباء الدواء الفلاني المنقذ للحياة ما موجود والمريض حصلت ليهو حاجه طوااالي ح يحملو الأطباء المسؤولية؟
– أكيد .. مع إنو ما عندهم ذنب
وحتى أثبت لمحدثي بأن القصة وما فيها هو عدم إهتمام من (الحكومة) بصحة البشر من (رعاياها) فقد ذكرت له أن هذا المستشفى ليس به (عربة إسعاف) واحدة .. بينما آلاف العربات (البرادو) موديل السنة (ينجعص) بداخلها ألآف الدستوريين .. وأن عدد (الأطباء) لا يتناسب وعدد المراجعين من الجمهور لأن الحكومة ممثلة في وزارة الصحة ليست عندها ما تصرفه على هؤلاء الأطباء من أموال علماً بأن نثرية بعثة البرلمان لمراقبة الحج لهذا العام بلغت 56 ألف يورو (الصيحة عدد الأمس) .
أرواح المواطنين طبعن ما (لعب) وإذا أي زول قريبو عيان ومشي ليهو مستشفي حكومي وكانت بيئة المستشفى سبب رئيس في وفاتو أكيد الناس ح تنفعل كشيء لا أرادي .. العجز في الكتاب المدرسي هذا العام 60% لكن عدم وجود الكتاب مع إنو مهم شديد لكن (ما بيكتل) ، هناك عجز في (الكراسي) و (المعلمين) ومدارس كتيرة عاوزة (صيانة وتأهيل) وبرضو ده كووولو (مع أهميتو) ما بيكتل … الزبالة في كل ركن من أركان (البلد) وبرضو مع خطورتا (ما بتكتل طوااالي) ، الحفر في الشوارع بقت (موبااالغة) والشوارع ذات نفسها (نفس الحاجة) لكن برضو مرات (بتعوق ساكت) وما بتكتل ، المواصلات الداخلية شبه معدومة خاصة ساعات الذروة والناس تعبانة (لكن برضو ما ح يموتو) !
الدولة لا تقدم للمواطن أي شيء .. على الرغم من إنها تأخذ منه كل شيء لكن تبقى (أرواح المواطنين) هي الخط الأحمر الذي يمكن أن تندلع منه مثل هذه الثورات الإحتجاجية العارمة ، وليتوقع المسؤولون تكرار مثل هذه الأعمال إن لم تقم (الحكومة) وبسرعة بإعادة تأهيل المستشفيات لتصبح ذات بيئة صحية مكتملة مما جميعو (ذي الزيتونة وكده) !
كسرة :
قالو عاوزين يعملو شرطة (للجامعات) وشرطة (للمدارس) وهسسه شرطة للأطباء و(المستشفيات) .. ريحوا روحكم وأعملو ليكم مشروع (شرطي لكل مواطن) !!
• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+وووووووووووو)+ (وووووووووووو)+(وووووووووووو)+(وووووووووووو)+ (وووووووووووو)+و+و+و+و+و+و+و+و+(و)+و+(و)
• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+و+و+(و)+و+(و)
• كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنو (و)+(و)+(و) +و+(و)
الفاتح جبرا 
برنجية
دا الرجل الساخر ولا بلاش
عدم وجود كل هذه الضروريات في البلد مثل التعليم والصحة والبنية التحتية والشوارع والنظافة والامن هو الموت ذاتو وامكن الموت احسن لانو الزول بيرتاح ويريح الوراهو – وعشان كده الشاعر قال لا حياة لمن تنادي
لا فض فوك يا بروف ,, لكن الشعب الجبان ما بعرف يقالع ويضارب الا الاطباء اللى بطالبوا ليهو بى حقو فى تحسين بيئة العمل ,,,
بعثة مراقبة الحج دي عجبتني والله ! يعني كانوا ماسكين دفتر ويسجلوا.. الحاج حسين ود احمد كان اداءه جيد في عرفه والحاجه خجيجه بت سعد وكلت عمر ود فاطنه ليرمي لها الجمرات !!
الحج ده منظماهو السعوديه وهي المسئوله عن كل حاج …
عموما نحنا بقينا شعب جبان ونستاهل يحكمونا الحراميه.. بس بقينا نفش مغستنا في بعض وفالحين في طعن الضل
الاستاذ الفاتح حبرا
ممكن العنوان الالكترونى بتاعك عشان المنشور ده حاولت ارسل بيه و فيه مشكلة
يا بروف الطاهر فى مشكلة فى الميل انا حاتكل على الرحمن و ارسل موضوعى على التعليقات
المبدع الاستاذ الفاتح جبرا
اولا اسمح لى ان اقول كلاما مكررا قاله كثيرون قبلى و هو اننى من كبار المعجبين باسلوبك و اختيارك للمواضيع الذى يجعلنا كاننا نجلس معك و ارجو الله ان يديم علينا نعمة الاطلاع على ما تكتب .
طبعا من الواضح انه دى تجربتى الاولى فى الكتابة و مراسلة احد الكتاب المرموقين فارجو ان تغض النظر عن الاخطاء الكثيرة التى ستجدها و يعلم الله انى لست من هواة الكتابة و لا املك صبرا عليها و لكن حال البلد يجعلنا نحاول ان نشارك بما نراه من صالح البلاد و العباد و ارجو ان تكون هذه بمثابة دعوة لجميع السودانيين للكتابة حول المشاكل على ان يقدموا لها حلولا قدر المستطاع فانا متاكد ان حكومتنا الرشيدة قد نضبت منها الحلول و اصبحت تعمل بما يسمى رزق اليوم باليوم لا تخطيط و لا سعة افق و لا رؤية واضحة للمستقبل و لا وعى بما يدور داخل و خارج البلاد و من وجهة نظرى اننا لو كتبنا فربما يفتح الله على احد الحكام و يقراء ما كتبناه وينفذه فيكون فية خير البلاد و العباد .
المشكلة التى ساكتب عنها هى مشكلة الدولار و تصاعده المتطرد …….. انا طبعا عندى اقتراح بسيط و – انا ليس لى كبير علم بالاقتصاد – الاقتراح هو استقطاب اموال المغتربين ليس بالاراضى و لا بالمنح و لكن بان نسمح للمستفيدين من التحويل باستلام المبالغ المحولة لهم بالعملة الصعبة يعنى المحول له دولار يصرف دولار و المحول له ريال يستلم ريال و لو الكلام ده اتحقق المغتربين ممكن ان يحولوا مبالغهم بالبنوك و الصرافات بدلا من تحويلها بالطريقة الحالية لكن مع مراعاة انه البنوك تسرع من عملية التحويل.
نحن المغتربين بتاعننا بالملايين فاذا اى واحد حول الف ريال او حتى خمسمائة ريال شهريا او دولار او اى عملة حتكون عندنا مليارات الدولارات سنويا و المبالغ دى بطريقة او باخرى حتتحول للسودان فهل من الممكن ان يحدث ذلك ؟
و اخيرا تقبل تحياتى
اخوك امجد
يستاهلوا الدق لان الاطباء زمااان كانوا بيقودوا المعارضه و المظاهرات هم و المحاميين – عشان كده الدق ده ما عشان نقص الدوا – الدق ده عشان نقص الرجااااااله — مش زمان كانوا ياهم رجال البلد ؟؟؟؟ عقبال المحاميين كمان
غريب حقا، مازلت لا افهم الكثير من التفاصيل