لو رجعناكم

مستمراً في نهج التفلت الخطابي وإستفزاز مشاعر هذا الشعب المكلوم وفي اللقاء التنويري بينه وبين أحزاب الحوار الوطني، صرح السيد وزير المالية بدرالدين محمود ضمن ما صرح قائلاً : : ( لو رجعناكم 89 كنتو حتمشوا المقابر).
والمتأمل لهذا القول الفطير الذي يجافي الواقع يجد أن السيد الوزير يؤكد بأننا كشعب كنا في (1989) في عوز وشدة من أمرنا كادت أن تفتك بنا وأن توردنا موارد التهلكة مقارنه بما نشهده اليوم (من شنو ما عارف) !
طيب تمام … لو رجعتونا إلى 1989 لمشينا إلى المقابر وإلى حتفنا راجلين ، بس لو رجعناكم ح تبقى مشكلة ..

لو رجعتونا (1989) محل ما أنقذتونا كنا ح نلاقي الدولار بي 12 جنيه والآن بعد نحو أزيد من 27 عاما نجد أن الدولار قد بلغ نحو 16000جنيه (كم % والله غلبتني) !
لو رجعناكم (1989) منو فيكم الكان عندو تسعة عملات أجنبيه في بيتو .. هو البيت ذاااتو كان طين وبالإيجار (هسه وزير بيشتري بيت بي 2 مليون دولار) وكمان بيملح (السمسار) !
لو رجعتونا (1989) محل ما أنقذتونا كنا ح نلاقي سعر الرغيفة وزن ( 140 ) جرام ( 14 ) فقط اربعة عشر قرشا سودنيا بينما سعر الرغيفة (المايكرو عيشة) الآن وزن ( 70 ) جرام او اقل (500) جنيها سودانيا
لو رجعناكم (1989) كنا ح نلاقيكم ماشين (كداري) وفي أحسن الأحوال راكبين الهنتر أبو دخاخين في السماء
لو رجعتونا (1989) ح نلاقي جالون البنزين سعرو ( 4.5 ) جنيه ، والآن بعد الزيادات الأخيرة بلغ سعر الجالون 29 ألف ونص ! قابله للزيادة كما صرحتم ! مع إنو في كل العالم سعره في إنخفاض مستمر (قال دعم قال) !
لو رجعناكم (1989) كنا ح نلاقيكم الواحد فيكم يا دوووب قادر يصرف على بيت واحد (بالتلتلة) ، والآن بيتين وتلاته وأربعة (ومرات فيها فك تسجيلات) !
لو رجعتونا (1989) محل ما أنقذتونا كنا ح نلاقي سعر جالون الجازولين . ( 2 ) جنيهان فقط لا غير اما الآن وبعد الزيادات الأخيرة فقد بلغ سعر الجالون الان بعد نحو ( 27 ) عاما من عمر ( حكمكم ) اصبح سعر جالون الجازولين ( 20 ) جنيه بالتمام والكمال !
هل تدري أيها الوزير الهمام أن سعر رطل السكر عندما جئتم كان (125) مائة خمسة وعشرون قرشاً (عندها كان القرش حي يرزق) !
وهكذا اللحوم البيضاء والحمراء والشاي والبن والخضروات والألبان والأجبان والأكفان والفول والبوش والبصل وزيت الطعام وزيت العربات وتعرفة المواصلات وتعرفة الجمارك والطحنية والعسل والمربي والموز والبرتقال والجوافة وصابون الغسيل والحمام والنظافة وكشف العزاء وكشف الطهور وكشف الطبيب !
قبل أن تنقذونا أيها الوزير الهام أعدنا أيها الوزير الهمام حيث كنا فقد كنا لا نعرف الفساد والتحلل ولم يكن المسؤولون لدينا ينكحون ما لذ وطاب من الإناث الكواعب ويمتطون فاره الدواب ويعيشون في أفخر الفلل والقصور ، ولم يكن لدينا دور لرعاية ثمرات الرذيلة أو (حاويات مخدرات) مجهولة المصدر !
أعدنا أيها الوزير الهمام فقد كان لدينا مؤسسات ناجحة كالنقل الميكانيكي والمخازن والمهمات ، الأشغال ،النقل النهري ، الخطوط البحرية السودانية (سودانلاين) ، مشروع الجزيرة ، السكة الحديد، الخطوط الجويةالسودانية (سودانير) … وخط هيثرو ذااااتو !!

كسرة:
نحنا بنرجع .. بس إنتو تاني بترجعوا !!!

• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+وووووووووووو)+ (وووووووووووو)+(وووووووووووو)+(وووووووووووو)+ (وووووووووووو)+(وووووووووووو) +و+و

• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+و+و+(و)+و+(و)+و+و+و

• كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنو (وووو)+(وووو) +و

الإعلانات

7 تعليقات

  1. ترامب….. سكران .. بالبرنجية

  2. كيف بنرفض رجوع الكوز للكباية
    ترامب بحلها …

  3. تصحيح بسيط
    20000 جنيه وليس 20 جنيه لجالون الجازولين ….
    كثرت اللخبطة من كثرة الاصفار استاذنا جبرا
    كلنا بقينا نفكر ساعة عشان نعرف نحسب و نقارن بين قروش زمان وقروشهم القش دي !!!!!!

  4. ولااااا نرجع لحدي سنة 89 نرجع بس 3 او 4 سنه ويرجع ضلام الدين ده نائب محافظ بنك السودان ويقيف قدام البرلمان ويقول نحنا فاشلين ومفروض نقعد في بيوتنا ..
    يا وزير الماليه المددونه دي محترمه لكن داير اقول ليك شتيمه تبدأ بالكاف وتنتهي بالكاف عرفتها ياااا البتفتح عمل الشيطان وتنهي بالشاي بالانجليزي ؟

  5. لا هم بيقدروا يرجعونا ل 89 ولا هم بيرضو يرجعو لي ما كانو علية لانهم نسو ما هم وما كانو علية وفاكرين انه الوضع ح يستمر علي ما هو علية – ان الله يمهل ولا يهمل
    اللهم يا ربنا لا تسلط علينا من لا يخافك فينا ولا يرحمنا
    اللهم ارفع مقتك وغضبك عنا يا لطيف يا خبير

  6. ترجع الموية من زورك يا بدر الدين قادر يا كريم ..
    يا فاشل يا فاشل يا فاااااااااشل

  7. ديل الحرام ملا كروشهم ومابعرفو درب الحلال بي وين الله ينتقم منهم واصبحوا عمي البصر و البصيرة وقاشلين وفاسدين واغبياء ومغضوب عليهم اللهم ياحنان يامنان تنتقم منهم دنيا واخرة يمهل ولايهمل

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

%d مدونون معجبون بهذه: