فقال خردة قال

– الجماعة ديل عاوزين يجننونا ؟
قالها لي جاري الحاج (عبدالحميد) وهو يمسك بصحيفة في يده صباحاً وأنا أمر أمام منزله ً
– في شنو يا حاج؟

– بالله يا أستاذ تعال أقرأ كلام (مكاوي) ده
وقرأت الخبر الذي يقول : في تطورٍ جديدٍ، كَشَفَ وزير النقل المهندس مكاوي محمد عوض، تفاصيل جديدة تُنشر لأول مرّة حول طائرة الخطوط الجوية (سودانير) التي تمّ عرضها في أحد المزادات العالمية ، وقال عوض في تصريحٍ خاصٍ لـ (التيَّار)، إنّ الطائرة ليست ضمن أسطول الشركة العامل وإنّما “خُردة” خرجت عن الخدمة قبل ثمانية أعوام، أيام شركة عارف الكويتية وسحبتها ايرباص من الخدمة تماماً كذلك سلطة الطيران المدني، وألغيت رخصة الطيران والتشغيل الخاصّة بها (AOC)، وتابع الوزير: “الآن البيع خُردة للاستفادة من هيكلها لأنّها لا تصلح للطيران”، وأضاف وزير النقل أنّ الوسيط عرض الطائرة في مزادٍ بمبلغ (مليون و200 ألف دولار) وستستفيد (سُودانير) من المبلغ في جوانب إدارية وفنية .
بعد أن قمت بقراء الخبر أعدت الصحيفة إلى (حاج عبدالحميد) قائلاً :
– هسه يا حاج في شنوو في الخبر ده ؟
– إنتا يا أستاذ قلبتا مع الجماعة وللا شنو؟ كيفن فيهو شنو؟ – مواصلاً- بتعرف الإبرة؟
– (في إستغراش) : بعرفا .. دخلها شنو في الموضوع؟
– الإبرة دي شفتها يا أستاذ لو حكومية ومن ممتلكات الدولة لازم لو عاوزين يبيعوها تتكون ليها لجنة ، ويتعمل ليها إعلان في الجرايد وتتعرض في عطاءات مختومة بالشمع الأحمر !
– لجنة لي شنو يا حاج؟
– اللجنه بتتكون من عدد من المسؤولين عشان ما تكون في مأكلة !
– طيب والإعلان؟
– عشان الناس كووولها تعرف ما تبقى الحكاية بالغمتي وتكون في شفافية
– أها العطاء؟
– العطاء عشان كل زول يقدم السعر بتاعو ومافي زول يكون عرف سعر التاني !
– ومختوم بالشمع الأحمر ليه؟
– عشان السرية ومافي زول يطلع عليهو إلا اللجنة وما يكون في تلاعب
– والقروش ؟
– القروش بتستلما اللجنة دي وتدخلا خزينة الدولة بي أورنيك خمسطاشر !
– وهسه إنتا يا حاج منفعل كده مالك ؟
– الما بخليني منفعل شنوو؟ كلام (مكاوي) ده يخلي الزول (يطرشق) ، وين القوانين واللوائح البتحكم البيع بتاع الممتلكات الحكومية !
– ما قال ليكم يا حاج (خردة)؟
– والله هو (الخردة) ؟ يعني شنو عشان خردة تتباع بالغمتي كده لحدت ما الناس بالصدفه تشوفا في (النت) ! ده يا أستاذ فساد راسو عدييييل .. قال أيه خرده .. يعني هسه الزول يسوق عربية الحكومة دي ويمشي بيها (دلالة الصحافة؟) .. وبعدين تعال
– أها شنو يا حاج؟
– السمسار الألماني ده الجابو منووو؟ معقول يكون جا براهو؟
– طبعن لا ..
– أها تفتكر المسؤول الجابو ما ح يقسم معاهو .. وللا جابو (هواية) ساااكت
– أكيد بيكون مستفيد
– وبعدين يا أستاذ البضمن لينا القروش لو إتباعت تدخل خزينة الدولة شنوو .. مش ممكن تتلبع ذي قروش خط هيثرو والحاجات التانية؟
– كلامك منطقي يا حاج
– بالله يا أستاذ أكتب لينا يا أستاذ في عمودك .. قول للمهندس مكاوي ده .. الطيارة دي مش لو (خردة) لو زبالة عديل مفروض لو عاوزين تبيعوها تمشو بالطرق الرسمية واللوائح الحكومية المتبعة مش ذي شغل (الغمتى) واللبع الشبعنا منو ده … قال أيه .. خردة قال !!

كسرة :
(الوسخ) بقى عاوز ليهو (دراي كلين) … هاااات (الحرجل) يااا ولد !

• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+وووووووووووو)+ (وووووووووووو)+(وووووووووووو)+(وووووووووووو)+ (وووووووووووو)+(وووووووووووو) +و+و+و

• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+و+و+(و)+و+(و)+و+و+و+و

• كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنو (وووو)+(وووو) +و+و

Advertisements

4 تعليقات

  1. بعد البرنجية
    ،،، بكرة نحنا زاتنا يبيعونا خردة ،، دة كان اصلو ما باعونا من زماااان و نحن ما عارفين ..

  2. هسي الفضائح دي لزوم شنو يا ( حاج عبد الحميد ) ؟؟
    وأصلاً ما مفروض يعرضوها للبيع في مواقع عالمية حتى لو كان موقع ( ebay) ومن متييييين نحن عندنا الحاجات دي ؟؟!!
    مفروض يبيعوها زيها وزي غيرها !! ولو حتى للحلب بتاعين الخردة أعملوها كوانين و حلل وصاجات شية !!

  3. الحرجل دا لو اخدت معاهو حلبة يكون كويس

    1. ودمسيسة كيف كمان ؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: