زكاة أعضاء

ما أن رآني جاري عوض وأنا أتجه نحو المنزل حتى هرع نحوي مسرعا :
– الجماعة ديل يا أستاذ حقو بعد ده يفكوا لينا التصدير؟

لعلمي التام بأن جاري (عوض) هو معلم بالمعاش وليس له أدنى علاقة بالتجارة ومعاملاتها فقد نظرت إليه نظرة فيها كثير من الإستغراش
– تصدير شنوو يا استاذ عوض؟ إنتا بقيت تتاجر من ورانا وللا شنووو؟
– هسه يا استاذ عليك الله معقولة المواطن يكون معدتو 40 متر ؟
– ما فاهم؟
– لا بالله هسه الفول ده عايز ليهو 40 متر؟ خمسة بس مش كفاية
– يا أستاذ عوض إنتا الليلة بتتكلم بره من راسك وللا شنو؟
– بي مناسبة راسي دي بالله القرف والمناظر الشايفنها والنفايات المالية الشوارع وخلق المسؤولين ديل عايزه ليها (عينين إتنين)؟ – مواصلاً- والله عين واحدة كفاية؟
– ……………
– شوف يا استاذ (القرنية) الواحدة بي كم؟ خليك من كده شووف العدسات ؟
– ……………
– لا والكلى كمان .. كل واحد ماشي ليهو بي كليتين … يعمل بيهم شنوووو؟ الواحدة بالشيء الفلاني
– …………..
– خليك من ده كلو .. الإضنين الإتنين ديل في داعي ليهم ؟ عشان نسمع بيهم شنووو؟ تصريحات المسؤولين وللا (الغنا) المايص بتاع الأولاد الجداد ديل ؟ خلاس الواحد يفك ليهو طبلة بتاعت أضان واحدة ومعاها إذن وسطى
– …………………
– خليك من ده .. في داعي المواطن يكون عندو كمية الشرايين والأورده دي؟ هو ذاااتو (الدم) وينو ؟ الشعب كولو مصاب بالأنيميا … ح يحصل شنوو لو نقصو ليهم عشرين تلاتين بوصة؟
– ……………….
– والعجب البنات؟
– …………..
– هو ذاااتو عرس مااافي … الواحدة تلاقيها ماشه ليها بي (مبيضين) يعني خلااااس العريس في خشم الباب … واحد ذاااتو كتير والله
– هسسه التصدير دخلو شنووو في كلامك ده يا عوض ياااخ
– كيفن دخلو شنووو؟ يا أستاذ براك شايف الحالة بقت صعبة والناس كلها بقت مفلسة والواحد بقى قاعد على الحديدة ، وقروش المعاش دي ما تجيب ليها 2 كيلو لحمة والواحد الدنيا ضلمت في وشو ، على بالحرام البيت هسه ما فيهو تعريفه وما عارف أقبل وين؟
– والله يا أستاذ عوض الناس كووولها تعبانة … لكن قول ليا ده علاقتو بالتصدير شنووو؟
– يا أستاذ إنتا براك شايف اليومين ديل قالوا في عصابات بتختف الناس وببيعوا الأعضاء بتاعتهم !
– وده دخلو شنوووو؟
– دخلو شنووو كيف يا أستاذ … بدل الشغل ده يكون (ختف) وعصابات وموت والناس تقعد (تزرزر) في الحكومة والحكومة تقعد (تتخرت) وبدل المواطنين ما (يتكتلو) ويتشلحوا ساااكت .. تشليح لي تشليح أخير يستفيدو ويطلعو ليهم بي قرشين حلوين والحكومة ذاااتا تستفيد أصلو جنهم قروش
– (وهو ينظر لعيوني المنططة) : يا أستاذ مالك بتعاين ليا كده
– كلامك ده عجيب وغريب با عوض
– يا أستاذ براااحة بررراحة أسمعني ح تلاقي كلامي قمة في المنطق والواقعية !! – مواصلا-
– شوف يا استاذ .. الناس ديل يفتحوا لينا (التصدير) ذي إناث الإبل كده ..
– وبعدين؟
– المواطن يسافر عدييل كده ويدوهو فيزا (خروج أعضاء )
– طيب والحكومة تستفيد شنوووو؟
– المواطن هو طالع يقومو يعملو ليهو صور في القمسيون ويسجلو ليهو (الأعضاء) الطلع بيها في الجواز … ولمن يجي راجع يعملوا ليهو (صور) يشوفوهو إتصرف في شنو وكم ويشيلو منو ضريبة على كل عضو!
– ………………..
– بس انا خايف من حاجة يا أستاذ
– شنوو؟
– بعد الضريبة دي تكون فيها (زكاة أعضاء) ونطلع بي قد (القفة) !!
كسرة :
فليكن شعار المرحلة المقبلة (التشليح عشان نعيش) !

كسرة ثابتة (جديدة لنج) :
أخبار إجابة رئيس الجهاز القضائي بالخرطوم على (الإستئناف أبو يوم) شنو (و)+(و) !
• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ووو+(و)
• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو (وووووووووووو)+ (وووووووووووو)+ (وووووووووووو)+وووووووووو+(و)

Advertisements

One response

  1. اختفنى وزيد عذاااابى

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: