أداكم الزيت

مرة بعد أخرى يتحفنا السادة المسؤولين ببعض التصريحات المستفزة لنا كمواطنين أصحاب ملك (على الشيوع) لما تبقى من أمتار هذا البلد الطيب ، كل هذه التصريحات التي نعنيها تتفق في شيء واحد وهو للأسف الشديد نظرة المسؤولين (الدونية) لنا معشر المواطنين و إمتنانهم علينا على ما هو (واجب) عليهم ، ولو أردنا أن نحصي هذه التصريحات لملأنا بها صحفاً كثيرة إبتدءاً بـ(لحس الكوع) مروراً بـ(اكلوا كسرة) ونهاية بـ(نحن استلمنا الحكومة والناس بتقسم الصابونة.. وكان السكر بالوقية)..!

بالأمس جاءت عناوين الصحف تجمل تصريحاً مستفزاً لأحد المسؤولين وهو الدكتور كرار التهامي الذي يشغل منصب الامين العام لجهاز شؤون السودانيين العاملين بالخارج والذي صرح قائلا (ليس بالضرورة أن تكون الدولة مسؤولة عن تشغيل الخريجينً)، مضيفاً (الدولة ليست مؤسسة خيرية ) .
كما يقول أولادنا بلغة هذه الأيام فإن (التهامي) أداكم (الزيت) معشر المواطنين فمن كان يعتقد ساذجاً بان الدولة من واجبها فعل (الخير) مع المواطن فليراجع نفسه فليس (الخير) هو أحد مقاصدها إنما مقصدها في المقام الأول هو جمع الأتاوات والجبايات والزكوات وإكتناز وصرف عائدات (الذهب) والبترول في ملذاتها الخاصة ونغنغة منسوبيها بشراء الفلل والعمارات في مدينة النخلة وعلى تخوم (دبى) والنكاح مثنى وثلاث ورباع .
العبدلله لم يستغرش لهذا التصريح من مدير جهاز ظل يقوم بحلب (المغتربين) لعقود من الزمان دون أن تظهر عائداته ومنصرفاته في ميزانية الدولة الرسمية ودون أن يلمس منه المغترب أي (خير) كان ولم تنعكس (دولاراته) وللا (يوروهاته) أو ريالاته على حال المغترب المغلوب على أمره بأي شكل كان .
أخيرا التهامي (جاب ليكم النجيضة) أو كما يقول أولادنا هذه الأيام (أداكم الزيت) وختاها ليكم عديل بأنو عمل الخير للمواطن ليس من مهام الدولة فلا تستعجب ايها المواطن إن صرح وزير التعليم قائلاً (التعليم ده ما مسؤولية الدولة … إنتو قايلين البلد ده تكية ؟ أي زول عاوز يعلم أولادو عايز الدولة توفر ليهو مدرسة ومعلمين وفصول وكتب وطباشير؟ إنتو قايلين الدولة دي مؤسسة خيرية؟)
ولا تندهش عزيزي المواطن لو أن وزير الصحة صرح لك قائلاً (والله عشنا وشوفنا كمان المواطنين عاوزين يتعالجو؟ يمشوا يلقطوا لينا في الأمراض والأوبئة والواحد يجي يقول ليك وفرو لينا مستشفيات وعنابر ودكاترة وكمان أدوية؟ إنتو قايلننا فاتحنها وكالة من غير بواب؟ أي زول يمرض يشوف ليهو طريقة يعالج بيها روحو .. الصحة دي ما مسؤولية الدولة إنتو قايلينها مؤسسة خيرية؟)
هذا غير مسؤول الطرق والشوارع الذي يستهجن في تصريح له مطالبة المواطنين بتعبيد الطرق وردم الشوارع وسفلتتها (والله ياهو ده الفضل؟ قال أيه نردم ليهم الحفر؟ الحفر دي جبناها من بيت أبونا وللا عملوها المواطنين ؟ عاوزين يمشوا في الشوارع ويبوظوها والدولة تقوم تصلحا ليهم؟ بالله الناس دي مش يتبالغ؟ إنتو قايلننا مؤسسة خيرية والقروش العندنا دي بنلقاها واقعة في الواطة؟
ثم مسؤول (المياه) الذي يبتسم مصرحاً (إنتو لو قايلين مسألة توفير الموية الصالحة للشرب (أم بدون طمي وحشرات) دي مسؤولية الدولة؟ محتاجين تعيدوا حساباتكم ؟ كل دول الدنيا موضوع الموية ده موضوع شخصي .. مواطن عاوز يشرب ويغتسل ويستحمى .. طيب الدولة دخلها أيه في الموضوع ده؟ الناس دي بتتدلع وللا شنوو؟ قال أيه يشربو ويستحمو؟ ما أهو عندكم (كم نيل) .. ما تمشوا تستحمو وتشيلو مويتكم ؟ وللا عاوزننا (نخلي شغلنا ) ونجيبا ليكم لحدت حتتكم … قصة والله .
ولن يشذ مسؤول الكهرباء الذي يتعجب عن مطالبة المواطنين بهذه الخدمة (الترفيهية) وذلك من خلال تصريحه الذي يوضح فيه بأن مسألة توفير الكهرباء ليست على الإطلاق تقع ضمن مسؤوليات الدولة فالدولة على حد قوله (تعبت من فعل الخير) الشيء الذي أقعدها تماماً عن مسؤوليتها الأولى في (فعل الشر) مختتما حديثة بالقول (الجنريترات دي إخترعوها ليه؟ مش عشان المواطن العايز كهرباء)؟
أما مسؤول البيئة فهو لا يخفي إندهاشه من طلب المواطنين بإصلاحها قائلاً (بالله الناس دي مش بتبالغ؟ الواحد (يجمع نفاياتو) وعاوزنا نشيلا ليهو؟ لا وأيه فيها (نقة كمان)؟ العالم ده كووولو حتى الدول المتقدمة والناس البتخترع الصواريخ والقنابل النووية المواطنين فيها كل زول مسؤول عن نفاياتو؟ يجو ناس قريعتي راحت ديل يقولو ليك النفايات مسؤولية الدولة؟ لا وأيه يزيدو ليك المحلبية ويقولو ليك (شوفو لينا طريقة للباعوض ده) … يعني نحنا نخلي شغلنا .. والدولة تسيب مسؤولياتا الجسام وخططا الإستراتيجية في إفقار المواطن وتقعد تقبض في الباعوض !

كسرة :

حليل الدولة .. هي وينا؟

• كسرة (الجهاز القضائي) :
سوف تختفي إبتداءا من هذا المقال لأسباب موضوعية
• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ووو+(و)
• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو (وووووووووووو)+ (وووووووووووو)+ (وووووووووووو)+وووووووووو+(و)

Advertisements

3 تعليقات

  1. نعم .. الدولة اقل من ان تكون مؤسسة خيرية ..

  2. يا الفاتح اخوي الناس ديل ما سالين في اي زول والزارعم غير الله يجي يقلعهم –
    والمسؤل لمن يصرح – او يدلي بقرار كانو بيتصرف في مالو الخاص – وذلك لانو ما واطي الجمرة – عشان كدة تصريحاتو بتكون بره الموضوع –
    انا اقترح انو يعملو ليهم درس عصر يوروهم انهم هم الخدام والشعب هو السيد – والذي يستوعب الدرس يواصل والما عاوز الباب يفوت جمل

  3. ياخى فتوتنهم دى بتعجبنى كيف ! فتونة دى مشتقة من (فاتية) اجاركم الله ,,

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: