حال البلد

في إستطلاع مع أصحاب بعض المهن ورؤيتهم لحال البلد الآن جاءت الإفادات كالتالي دون زيادة أو نقصان :

ميكانيكي :
البلد دي يا أستاذ عاوزة طقم بستم وشمبر وسبيكة وجلب ضراعات وأوشاش وطقم بلوفة وكراسي كرنك وللا أقول ليك عاوزة ليها تغيير مكنة عديل كده شغل (اللتيق) ده ما بنفع يا أستاذ ما شوفتا (دخاخينا) في عنان السماء كيف؟
نجار :
البلدالخشب بتاعا (السوس) أكلو يا أستاذ والمفصلات بتاعتا بقت ما شغالة ، وأقول ليك حاجة عاوزة ليها وش (دهان) لأنو شكلها بقى شاحب وبايخ شديد وعاوزة ليها شوية صنفرة كمان لأنو أي حتة بقى فيها (طالع نازل) بعدين أي (كالون) فيها بقى بايظ وما شغال من كترت (التفليس) ، وبلاش من (الغراء) ده لأتو لمن يمسك ما بفك تاني ، بعدين هسه لو عايزين نصلحا ذااتو نصلحا بي شنوو؟ العدة كووولها إتسرقت المناشير والشواكيش والمسامير ما فضل شي إلا (الفارات) الذينا ديل !
داية :
والله يا أستاذ أنا أصلو ما شوفتا ليا (حمل) بستمر الفترة دي كووولها ؟ والله لازم البلد دي يتعمل ليها (طلق صناعي) تتوجع … تتوجع وولادة مافي ؟ الكلام ده أصلو ما أدونا ليهو يا استاذ ؟
جزار :
شوف يا أستاذ ، البلد دي أي (لحمة طرية) فيها يا أكلوها يا (طلعوها بره) ما خلو لينا إلا (الجلافيط) والضلافين و(العفشة) ودي ذاااتا شالو منها (الكلاوي) والكبد ، عليك أمان الله البلد بقت (عضام) كووولها … كدي عاين لي وشوش الناس دي شوف عضاما طالعة كيف؟ وبعدبن أي حاجة فيها بقت (كيري) ساكت ، الجامعات (كيري) والميتوصفات (كيري) والمدارس (كيري) !
كهربجي :
البلد دي يا أستاذ عاوزة ليها فيوزات الناس من كترت (الضغط) العالي (سلوكا ضربت) وأخلاقا بقت ضيقة وأقل حاجة يحصل بيناتم (ماس) وتطلع (شرارة) وتتولد حرائق ، شوف هسه الحرائق ملت البلد كيف؟ محل ما تقبل تلاقي حريقة .. وده كلو من (سلوك) الحكومة والمسؤولين !
طباخ :
بتعرف يا أستاذ (القطر قام) ؟ أها البلد دي ذي الحلة بتاعت القطر قام .. الجماعة ديل (دفسوا) فيها الحاجات كوولها وختوها في (النار) لا (مقادير) وللا (تسبيك) .. وكل شوية يزيدوها (موية) .. وكل شوية يزيدو في النار .. هسه لا عارفين ينزلوها من النار وللا عارفين يخلوها .. !
مدرب كورة :
يا أستاذ والله لحدت هسه نحنا ما عارفين الناس دي لاعبة بي ياتو خطة؟ 4-2-4 وللا 3-3-4 ؟ خطه هجومية وللا دفاعية وللا شنو ذااتو .. كل دقيقة جايبين فيهم (قون) ووأي لاعب من الفريق الخصم يقرب على خط 18 طوالي بيفتحو فيهو نار والحاجة الما أدونا ليها كولو كولو إنو تشكيلة الفريق أصلو ما بتتغير والكباتن كولهم لمن يطلعوا من الملعب بيبقو (مدربين) !
طبيب :
ده إسمو موت سريري يا أستاذ .. كل وظائف الأعضاء إتوقفت .. حكمة الله إلا وظيفة (البلع) .. المشكلة كلما يجيبو ليهو كيس كيسين دم نلاقيهم مافيشين .. غايتو أولادها كان حصلوها ممكن تعيش لكن بالحالة دي الله يعلم !!
مقاول :
الأساس كعب يا أستاذ .. عشان كده ممكن تنهار في أي وكت .. البناء كوولو تم بي مواد غير مطابقة للمواصفات ده غير إنو (السيخ) كوولو إتسرق والعمارة عدمت السيخة وقعدت في السهلة .. ما شايف كل يوم بيحصل (شق) في حتة وأجزاء كتيرة (إنشقت) ؟ غايتو القصة دي لو ما إتلحقت يا أستاذ ح يحصل ليها إنهيار وتقع في راس الجميع ونطلع كووولنا في (إستراحة محارب)!

كسرة :
مسطول : والله البلد دي يا أستاذ ذي (حاوية) مخدرات مسكوها في الميناء لا خلوها تدخل وخلونا ننبسط … ولا حاكموا الجابوها !!
• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ووو+و+(و)
• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو (وووووووووووو)+ (وووووووووووو)+ (وووووووووووو)+وووووووووو+و+(و)

Advertisements

2 تعليقان

  1. يا استاذ ما شفت راي المدرسين : كان قالو ليك البلد ما قادرة تفهم المقرر و عايزة دروس خصوصية ومدارس خاصة لانو المدارس العامة بقي لا فيها طبشير ولا سبورة ولا ادراج ولا كنب ولا حيط ولا مدرسين والكتب محجوزة عند شركة فادي بامر المحكمة والقضية مع فيتنام دايرا ليها محامي شاطر – وبعد دا كلو ما قاعدين ناخد مرتباتنا الاصلها ما مكفيانا لحدي يوم 5 في الشهر احسن حل انو كل زول يعلم نفسو بي نفسو ويريحونا

  2. ياااااه ,,,
    المسطول جابها ع الجرح ,,,

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

%d مدونون معجبون بهذه: