الدبلوماسي ما براهو

العبدلله كان يظن وليس كل الظن إثم بأن (مآسي الحي الدبلوماسي) التي تطرقنا إليها في عمودنا الأخير هي (حالة متفردة) ونصب (عابر) لا يعتد أو يقاس به لولا أن بريدي الأليكتروني قد إستقبل عشرات الحالات التي تعرض أصحابها لذات (السيناريو) الذي يبدأ بمدينة الأحلام وينتهي بشتى الآلام .. وإليكم نماذج ثلاثة :

(1) حي البستان :
الأخ الفاضل الأستاذ الفاتح جبرا .. السلام عليكم .. لقد قرأنا موضوعك يا أستاذ عن مآسي الحي الدبلوماسي ونتمني لإخواننا الذين رماهم القدر في تلك الشركة أن يفك حيرتهم بأقل الخسائر الممكنة ، أنحنا يا أستاذ برضو عندنا مأساة من نوع تاني .. إشتريت ومعى عدد مقدر من المواطنين أراض سكنية من محلية أم درمان في حي أسموه (حي البستان) وذلك منذ حوالى 10 سنوات إلا أننا ومنذ ذلك الحين أستاذي العزيز ونحن لا نتمكن من البناء نسبة لوجود (سكن عشوائي) ولأن محلية أم بدة قامت بإيجار قطعنا السكنية لشركات الرمال والطوب ، لقد قمنا بالشكوى لأكثر من جهة مسؤولة ولكن (لا حياة لمن ينادي) كلها وعود بلا فائدة ، فما زالت المحلية مؤجرة الأرض وتأخد أموالاً مقابل ذلك ونحن لا نستطيع البناء أو السكن ونمتلك شهادات بحث بلا فايدة مع أن المسألة ظلم فادح واضح (ما عايز ليهو دليل) إلا أننا لا نجد من ينصفنا ويبدو أن الشكوى لغير الله مذلة ..
(2) حي الأندلس :
السلام عليكم ورحمة الله وبركاته أخى الفاتح متعك الله بالصحة والعافية، أنا من المتابعين والمعجبين بعمودك ساخر سبيل ومن المواضيع المهمة التى قرأتها الآن موضوع مدينة الاحلام وأنا واحد من ضحايا تجار الحكومة الذين سموا أنفسهم صندوق الإسكان والتعمير، حيث أتى وفد منهم إلى السفارة بالرياض و عرضوا علينا بيوت الإسكان بمربع 23 الأندلس وذلك بمبلغ 14000 ألف دولار (تقسيط) وكان من ضمن الوفد المهندس فاروق والمحاسب الدسوقى وقد إستفسرت من الأخ الدسوقى من الموقع الذي إخترته من المخطط فكان رده (هذا رزقا ساقه الله إليك) ، وتيقنت أن هذا الرجل صادقاً، (رزق والله ساقو لينا) ، المهم بعد ما إشتريت ودفعت المقدم إتصلت بوكيلي وطلبت منه أن يذهب إلى المكان حيث كانت المفاجأة فقد أخبرني بالحرف الواحد قائلاً (إنتا دقستا المبلغ ده بيجيب ليك بيتين فى نفس المنطقة) .
وعند حضوري في الإجازة السنوية وجدت فعلاً أن حديث وكيلي صحيح (قلتا ما مشكلة) ولكن المشكلة لقيت إنو لا توجد أي خدمات (لا موية لانور) ، قمتا مشيت عندهم في صندوق التخدير أقصد التعمير وسألتهم (يا جماعة القطع دي وأديتونا ليها بسعر مضاعف أها طيب دخلو لينا الموية والكهرباء) ؟ ولكن القصة إلى الآن وعود في وعود وتخيل يا أستاذ إنو القطع دي دفعنا تمنها بالدولار الهسة عمل (كم وعشرين ده) !، انا ما عارف الناس البتغش في حاجات الحكومة ديل بيغشونا ليه؟ هل عندهم نسبة؟ ولا أيه؟ لو كانوا غشونا فى حقهم ما مشكله لكن تغش في حق الناس (دي حاجة عجيبة) !
(3) مدينة النور :
هههههههه والله يا جبرا عصرتني في جرح لامن بقي ينتح هسي ، سنة ٢٠١١ فكوا لينا الوهمة بتاعت مدينة النور أم درمان وكان شفت الخرط و المجسمات و الأبراج و ما عارف المنطقة المركزية و حوالينا فنادق وأحواض سباحة ، و كان شفت الكورنيش الما خمج وإنو المشروع ماسكاهو شركة كويتية ( و الكوايتة بحبونا والشريف مبسوط مني وكدة ) وبدوا يردموا البحر من تالا كبري الفتيحاب و مقبلين لا كده ..
أاها قوووم أنا يا الأهبل أبو ريالة وأشتري لي قطعتييين ناصية وتاني ناصية بي ١٧٠ ألف ريال وبي محاميها و تسجيلا وصلت ١٩٠ ألف .. أها نحنا في أحلامنا و خططنا قومي يا الشركة الكويتية غيري رأيك و خلي المشروع وخلي قطعنا جوووه الموية وأمشي !!
أها لي اليوم ده أرضي زي التمساح في الخريف تكون جوه البحر و في الشتاء تمرق علي الجرف تتشمش شوية وتااني ترجع تغطس .. إجازتي الفاتت كان البحر قايم مشيت ومعاي سمسار عنده الخريطة و قلت ليهو كدي وريني واطاطتي وينا؟ وحات الله ولااا اتلفت ..دنقر شال حجر و فنننن فكاهو وأنا بعاين ليهو لاامن جممممبلوغ وقع . قال لي هديييك ، الواجعني هسي القطعتين ما بجيبن ٥٠٠ مليون مع إنو لو كنت خاتيهن ريال كان جابن مليار و شوية .
هووووي يا السماكة أييي سمكة قاعدين تقبضوها في واطاتي أصلي ما عافي ليكم . وإنتو يا ناس الشركة الكويتية شحدت ربي تمسكم الكتكوته البي حمتا ديك .. أما انتو يا ناس الحكومة مداعاتكم ذااتا بلا وجع الخشم ما بنلقي منها شئ إلا بس ياهو ده حالكم تاكلو في قروش الخلق .

كسرة :
ح تروحو من ربنا فين؟…

•كسرة جديدة لنج : أخبار كتب فيتنام شنو(و) يا وزير المالية ووزيرة التربية والتعليم؟• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ووو+و++و(و)
• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو (وووووووووووو)+ (وووووووووووو)+ (وووووووووووو)+وووووووووو+و+و+(و)

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

%d مدونون معجبون بهذه: