وللا كديس واحد

ما أن عدت للمنزل من (مأمورية) صغيرة حتى خاطبتني (أم العيال) قائلة :
– بعد ما تستريح شوية أمشي شوف جارنا عباس ده؟
– مالو عيان؟
– قبل كم يوم وقع كسر (مخروقتو) ، قالو وقع من (راس البيت)
– هو البيوديهو يكابس روسين البيوت شنووو
– (هنا إقتربت مني قليلا وهمست في أذنى) : قالوا كان ساكي كديسة !
ما أن دخلت على الصالون الذي يرقد فيه عباس حتى رأيته مستلقياً على ظهره على أحد الأسرة وقد رقعت إحدي رجليه وتم تثبيتها على حامل :
– كفارة يا عبس ياخ .. أيه الحكاية ؟

نظر نحوي نظرة غير معتادة منه وخاطبني في تشنج واضح :
– معقولا بس يا أستاذ ؟ ولا كديس واحد… وللا كديس واحد؟
– قول بسم الله يا عبس ياااخ كديس شنووو؟
– لا يعني هسسه عاوزين يقنعوني إنو البلد دي عدمت الكديس؟
– قول بسم الله يا عبس ياااخ .. مالك الحاصل عليك شنو؟
– الحاصل عليا وللا الكدايس القالو إختفت دي؟
هنا أشارت لي (زوجة عباس) بالجلوس بعيداً في نهاية الصالون وكانها تود أن تسر إليا بشئ
– والله يا أستاذ عباس ده كان كويس وفي أمانة الله .. بس قبل تلاته شهور كده بقي يمشي كل يوم الصباح الكشك يجيب جريدتو ويجي وأول ما يقرأ عناوين الصفحة الأولى يقعد يهيج ويكورك ويقعد يفتش في البيت .. لا يخلي ليك (تحت السراير) لا (وراء الدواليب) ولما يتعب يشيل ليهو عصاية ويقيف في نص الحوش ويكورك :
– معقولا .. وللا كديس واحد … معقولا وللا كديس واحد !
– وبعدين؟
– المسألة بعد داك إتطورت بقيت الصباح أصحى على (كواريكو) مع سيد اللبن ..
– مالو ومال سيد اللبن كمان ؟
– شوفتا يا أستاذ .. يمسك ليك حمار (سيد اللبن) ده من رقبتوويحلف ما يفكو إلا سيد اللبن يوريهو الكدايس البتشرب اللبن (بتاع الناس) دي وين؟ لمن ناس الحلة يصحو يفكوهو منو ! والعجب لمن يجي بوكس (ناس السمك)
– ومالو كمان ومال السمك؟
– أها يطلع ليهم في نص البوكسي ويجدع ليهم السمك ويكورك … سمك ؟ سمك شنو؟ بلطي؟ بلطي شنوو؟ نحنا دايرين كدايس .. وديتو الكدايس وين؟ ولا كديس وااحد … وللا كديس واحد ؟ يا الله يا الله الناس تنزلو من البوكسي !
– وبعدين؟
– بعدين حالتو إستفحلت بقي يمشي يشتري الجريدة ويلف ليك في شوارع (الظلط) .. ما يلاقي ليهو (صف بنزين) إلا يطلع فوق راس أول عربية ويكورك : (صف زي ده وكدايس مافي) ؟ عذاب زي ده وكدايس مافي … معقولا ولاااااا كديس !
تواصل (محاسن) زوجة (عباس) :
– أها عباس بقى ما كان زول نضيف ولبيس وبيعتني بي لبسو بقى مرات يطلع بالعراقي والسروال .. ومرات بالسروال بس … ولمن خوفنا يقوم يطلع (بالعراقي بس) بقينا نقفل منو باب الشارع ، ونجيب ليهو الجريده الصباح … يقوم يقراها .. ويتشنج ويشيل عكازو ويلف في البيت ما يخلي ليك أوضة وللا مطبخ وللا مخزن إلا يفتشهم وهو متشنج ويكورك (معقولا ولا كديس) !
– والكسر ليهو مخروقتو شنو؟
– أها اليوم داك بعد ما فتش فتيشو داك وراق … قام رقد في السهلة .. قوم يا كديس الجيران تعال أطلع في الحيطة القدامنا وعينك ما تشوف إلا النور .. قام ليك تترب وشال عكازو وقعد يسك ليك في الكديس .. محل ما الكديس يطلع يطلع معاهو .. الحيطة .. راس المطبخ .. راس الصالون ويكورك (ما قلتو كدايس مافي .. ما قلتو كدايس مافي) لحدت ما إنزلق وجاء واقع من فوق !
تألمت كثيرا لحالة جاري (عباس) فهو رجل طيب وقد كان معروفاً في الحي ولدى زملائه في المصلحة التي يعمل بها بشهامته وكفاحه في تربية أبنائه ، وقد كان من الواضح انه يعاني من مرض نفسي له علاقه بتصريحات المسؤولين وقد إقترحت على محاسن أن (نتكل) عباس، ونعرضه على أحد الأطباء النفسانيين والذى بعد أن كشف عليه إلتفت إلينا قائلاً :
– الحاله دى حالة بسيطة سببا نوع من (المغص) النفسي والقهر و(الغلب) والإستهبال الذي تمارسه الحكومة ضد عباس وبقية المواطنين
– وهسسه يا دكتور بيتعالج؟
– بيتعالج بعد كم جلسه مع شوية مهدئات .. بس على شرط
– شنو؟
– ما تخلوهو يقرأ جرائد وللا يسمع إذاعة وللا يشوف تلفزيون !
بعد عدة جلسات مع الطبيب النفسى أخبرنا بان (عباس) قد شفى تماماً من المرض ويمكنه أن يزاول حياته الطبيعية .. فرحنا جميعا فرحاً شديداً ، وقرر شقيق (عباس الأصغر) أن (يعمل ليهو كرامة) ، .. إحتشد المدعوون من (ناس الحلة) واقرباء (محاسن) وأصدقاء (عباس) وزملائه في المصلحة فى ظهر ذات جمعه .. ضاق بهم المنزل .. جلس (عباس) والضيوف يتناولون الغداء وهم يتبادلون النكات والقفشات وفجأة نفض (عباس) يده من الطعام وأخذ يشير لهم نحو حائط الجيران الذذي إعتلاه أحد القطط قائلاً :
– معقولا … وللا كديس واحد !!
كسرة :
يرقد عباس الآن في عنبر العظام … ومرة مرة في (التجاني الماحي) !
• كسرة تصريح النائب العام : (لا حماية لفاسد ولا كبير على القانون) … الحصل في ملف هيثرو شنوووو (و+و+و+و) !
•كسرة جديدة لنج :
أخبار كتب فيتنام يا وزير المالية ووزيرة التربية والتعليم شنو(و+و+و+و+و+و+و+و+و) …
• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+(وووووووووووو)+و+و
• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو (وووووووووووو)+ (وووووووووووو)+ (وووووووووووو)+وووووووووووو)+(وووووووووووو)+و+و+و

الإعلانات

One response

  1. اخخخخخخ يا بلد منكوبة …..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

%d مدونون معجبون بهذه: