خريج يتوظف وبعد 30 سنة يقدر يتزوج؟
• تنعدم (الحفر) من شوارعنا الرئيسة؟
• يجى الخريف (ما فجأتن)؟
• يصبح التعليم مجانن وكمان العلاج؟
• تغطى أموال الزكاة كافة الفقراء والمساكين ؟
• يعود الناس تااااني لأكل 3 وجبات و(بعدهم تحلية كمان)
• طياراتنا تقوم في مواعيدا؟
• المغترب يكون راضى عما تقدمه له الدولة ؟
• يحترف أحد لاعبينا في نادى أوروبي (إن شاء الله درجة عاشرة)
• تعمل مخالفة (ينبهك) رجل المرور يقول ليك : دى آخر مرة تاني ما تعمل كده !!
• يطلب رئيس نادي كرة إخراج لاعب من المباراة وتبديله بآخر ويقوم المدرب يرفض؟
• تتم إجازة زيادة اسعار السلع الضرورية ويقوم أعضاء البرلمان (ما) ح يصفقوا؟
• تسأل مسئول متزوج أربعة كيف يستطيع أن يصرف علي (الكلام ده) ويقدر يجاوبك؟
• يرتفع سعر سلعة وتنزل تااانى لسعرها الأولاني؟
• المعارضة تكون أحسن من الحكومة؟ أو الحكومة تكون أحسن من المعلاضة ؟
• ناكل مما نزرع؟ و نلبس مما نصنع؟
• يصمد المرتب حتى يوم 15 في الشهر؟
• يؤثر استخراج البترول علي حياة المواطن ومعاشهم ؟
• ديناصورات السياسة يدو (الشباب) فرصة؟
• يقدم مسئول إلي المحاكمة في قضية فساد؟
• يكون أورنيك 15 هو الأورنيك الوحيد في تحصيل رسوم الدولة؟
• تختفي الجبابات علي الشوارع السفرية؟
• تكون عندنا سكة حديد وقطارات زينا وزى باقي خلق الله؟
• لا ينتقل وزير من وزارة إلي آخرى (مترقياً) ؟
• قروش (المعاش) تغطى مصاريف أسبوع واااحد (للمعاشيين)؟
• تعود للغناء عافيته ونستمع إلى ما يشابه (ضنين الوعد) و(الوكر المهجور)؟
• تكون لدينا شبكة مواصلات داخلية مريحة؟
• يكون جمع ونقل النفايات مسئولية الدولة وليس المواطن؟
• يختفي المتسولون من أمام شارات المرور والصيدليات؟
• نتداول السلطة سلميا بواسطة صناديق الإقتراع؟
• يتفق الناس علي رؤية هلال شوال؟
• يمتطي المسئولون عربات (ما موديل السنة) !
• تسند إدارة أنديتنا لي زول مخو مليان و(جيبو فاضي)؟
• تستبدل قطع رقعة الشطرنج (الليها كم وعشرين سنة دى) بقطع (جديدة) ؟
• يرجع حجاجنا وهو يلهثون بالشكر (لبعثة الحج) لأنها ما قصرت !
• ياتي العام الدراسي والمدارس مصانة والأستاذ متوفر والكتاب والكراسي (موجوده) !
• نقدر نحدد نحنا بلد صناعي وللا زراعى وللا بترولي؟
• تقوم في الخرطوم شبكة صرف صحى زينا زى باقي عواصم الدنيا !
• يكتفي المسئولون بوظيفة واحده ويخلوا حكاية (عضوية مجالس الإدارات) والشنو ما بعرف !
كسرة :
ما ظنيت !!
الفاتح جبرا 
الفاتح والمدوناتيه الكرام سلامات . . .
كان بس غيرو لينا قطع الشطرنج يكونو ما قصرو معانا.
جبرا .. سلام
هل حيجي يوم وترجع مساحة السودان مليون ميل مربع ؟
ليته كان الاستفتاء بين البابايا والنخلة لا بين النجمة والشجرة !!!
يا ( سانتينو ) قول لي ( ميري )
اقطع ايدي لو راضيني اقسم نفسي
لو اتخيلت اجيك بـ ( فيزا ) يتم تجديدا
كأنك غربة .. ما فد تربة ..
عليك النبي ركّز لي علي حتة اعضاء البرلمان دي وسلم لي عليهم وقول ليهم جنوبي قال ليكم صحي البيباري الجداد
بوديهو الكُوش ..وكراع البقر جيابة .. وكلام الله ما بنابا لكين الفيكم اتعرفت …وطالما السلام جاب بعضو سلم لي
علي ( ندوية ) .
السلام عليكم
الأخ جبرا بفائق الإحترام أقول لك : “تفائلوا خيرا تجدوه”
ليتهم لم يأتوا وليتهم تركونا نغرق…نغرق… وليت االدولار وصل 40 جنيه.
يا سنكلوني هل تتفق معي أن الأخ جنوبي ده (معروف لدينا من زمان) وهو ليس جنوبي ولكنه نوبي من رماة الحدق قول ليهو ما تغيب كتير.
صاح متفق معاك يا بشار ما جنوبي و من أصحابنا الزماااان.
و إنت وين الزمن دا كولو ما ظاهر؟
حلم الجيعان عيش ….!!
أولاد بمبا بيقولوا ………. فى المشمش ..!
الأحلام … مجانن ..!!
ويا يوم بكرة ما تسرع .. تغير لى قطع الشطرنج ..!!
وبس ..
سلامات ..
لما الجمل يلج من سم الخياط ياعمك ..
اضم ظني لظنك في نفي الحدوث ( حد فهم حاجه)؟؟؟
يا سلااااااااااااااااااااااام .. بشار بن برد ظهر و كمان سنكلوني … دا حدث الموسم .. الف حمدلله على السلامه والله القمردينه نورت و ياريت ماتغيبو تاني ..
يا بروف : اها جيه بشار و سنكل دي مش قربت تبقى من المستحيلات ؟؟؟ خليك متفائل ياعمك .. و بكره دايمآ اجمل لو مافقدنا الأمل
عمنا جبرا والسمار .
سلامات .
الحاجات دى شدة ماقنعنا منها بقينا حلم مابنحلم بيها .
تسند إدارة أنديتنا لي زول مخو مليان و(جيبو فاضي)؟
إداريى أنديتنا مخهم فاضى وجيوبم مليانة لكن عندهم بونية تودى الاخرة .
الاخوان … ابن برد وعلي سنكل … سلام
اتشرف بصحبة امثالكم .. لكن كدي ادوني امارة من زمااااان دي . باقي الضايق لدغة الدبيب بينفخ في الزبادي ..
سهيل .. سلام .. هسع ياخوي الناس ديل ما دخلونا في قد إبرة!!!
قالوا يا سهيل واحد بشتكي من الوضع ده لصاحبه قال ليه ياخي الناس ديل دخلونا في (هناي هناي ) صاحبو قال
ليهو هناي هناي شنو يا زول ديل طلعونا من الهناي ودخلو هناي زاتو في ( هناينا )…
والله لكن صحي ما اظن ياخ انت يا جبرا كدي نقصم شوية ….
سنكاونى وبشار وجنوبي معاً .. والله لقد عادت القمردينة أيامها الأولي !!!
كسرة :
والله يا بشار وسنكل إنتو خترين جنس ختورية !!
جنوبي النوبي سلام .. جننت عمك السلاوي خليتو لايص في الفاضي .. جنس كلامك دا بالنسبه لعمك السلاوي رطانه عدييييل كده ..
بشار و سنكل : ربيتو لجنوبي الخفيف … خليتوهو ينفخ في الروب .. براحه عليهو شويه .. يلقاها منكم ولا من ناس الإغراق الوطني
يا سهيل يا ولدي نحن متابعنكم وراصدنكم خطوة بخطوة لغاية ما التاتشرات (جمع مركبة تاتشر) وصلت الحارة الأولى بأمدرمان ولم نغفل عنكم يوما (لاكين) نفسنا بقى قصير وما بنقدر على (توير النفس).
أديك أمارة يالجنوبي:
“في واحد قال لصاحبو الناس ديل دخلونا في (خشم) وزة صاحبو قال ليهو لا ديل شالوا الوزة دخلوها في (خشمنا). أها جنس الكلام ده بغبانا يا رامي الحدق
ابن برد : حلات لق لق .. دي الترجمة ياخوي .. واها انقر الوزة كان فاتحة خشما ولآ قافلاهو ؟
على قول جنوبي
هل ممكن السودان يرجع بلد المليون ميل مربع
ما اظن
زي مابيقولو حلم الجعان عيش
على قول جنوبي هل ح يرجع السودان لبدل المليون ميل مربع
ما اظن
زي ما بيقولو حلم الجعان عيش
يا روف
يوم القيامة و بعد ما الناس تتحاسب / و كل قرد يطلع شدرتة / ياريت تطرح اسئلتك دى / هى الدنيا فضل فيها شنو ( أعوذ بالله من غضب الله – الناس ديل حيخلونا بلا نحس نكفر و لا شنو) و كمان داير دا كلو يصلح !!!!!.
والله الواحد يحسدك على تفاؤلك !!!
بروف
سمعت الكلام الجديد دا
حكومة الجنوب طالبت بضم أبيي وكافي كانجي وحفرة النحاس و الردوم
عثمان ميرغني ياتو ؟؟؟ بتاع التيار ولا واحد تاني ؟؟؟ كتمت
ياريت وزراء الهنا يقروا الاسئلة ويبعتوا لينا الاجابات بالDHL
والله يا جبرا انا من المؤيدين للحكومة دي لكن اصبنا باحباط وطولنا بالنا معاهم لحدي ما فتنا حد المرونة بس نقول شنو مجبورين علي التفاؤل متمنين ان تكتب لنا العودة الي احضان الوطن
والله قطع الشطرنج دى لو بتعرف نحن بنحب السودان دا قدر شنو وبنتمنى يكون قدام لإنه ما بستحق الذل والإهانة اللحقته من وراهم صحيح نحن بنعانى من مشاكل مزمنة من قبلهم بس هم كتروها وزادوا الطين بلة وأظننا البلد الوحيد فى الدنيا الماضيه أحسن كتير من حاضرو وما معروف المستقبل يكون شنو لكن فى ظل المعطيات الموجودة ممكن نتنبأ بيهو وربنا يكضب الشينة
السلام عليكم ، البرف و الاخوان ، البرف يريد ان يعرف كيف تتزوج اربعه ، واحده ام العيال و التانيه مقدم فى الامن و التالته وارثه و الرابعه لزوم القشره ، ويكون عندك بطانيه واحده دبل ، العليها اليوم تتغطى معاك ، سؤال خبيث : الخوف تخليها متغطيه وتنوم بره فى الهواء الطلق ……………….. عجبى
كان في حمار ذكى .. وحمار تأنى غبي .. وكانوا هما الاثنين أصحاب شديد …بس الحمار الغبي كان بقلد الحمار الذكي في أي حاجه يعملها ..الحمار الذكي يلعب الحمار الغبي يلعب زيه الحمار الذكي ينام الحمار الغبي ينام زيه عندها وجد الحمار الذكي بغيته بحيث يقدر يستغل الحمار الغبي الاستغلال الأمثل … الحمار الذكي قال لصاحبه الحمار الغبي : إيه رأيك نمسك اللجنة الشعبية بتاعت الحي فقال له الحمار الغبي نمسكها علطول ومنمسكهاش ليه بس في مشكله بسيطة ياصديقي .. قاليهو شنو المشكلة .. أنا بصراحة كده دايرك انت تكون رئيس اللجنة ودا بحكم قوة عضلاتك وبرده انت زول عسكري .. فوافق علطول وبدون تردد .. ومشو الإتنين سوى واتلبطوا في اللجنة .. دايريين يصلحوا راكوبة المسجد يجري الحمار الغبي بإيعاز من الحمار الذكي فيصلحه .. ماسورة ضاربة يجرى الحمار الغبي يصلحها بردو بعد المساعدة من الحمار الذكي لامن الحمار الغبي بقى محبوب من ناس الحي وفي يوم من ذات الأيام وبعد ما خلاس الفاس وقع في الراس .. أصبح الحمار الغبي رئيس اللجنة .
وكل يوم يصبح على الحي أسوء من القباله بسبب أفكار الحمار الذكي الشريرة النهاردة دايرين ندرب حمير افغانية ، وبكرة حمير عربية ويقوم يغش بعض الناس المحترميين ويشيل قروشم وبعدين يبعم برخس التراب لمناطق ومحليات أخرى ولخبطة وسواطة لامن دق في الحي وناسو خابور تقيل خلاس وضاقت الأرض بما رحبت وزلزلوا زلزالا كبيرا .
وآخر فكرة مدمرة عملا الحمار الذكي أنه اشترى بضائع من برة وقال للحمار الغبي هاك انت أربط المراتب الإسفنج دي على خصرك كويس وأنا حشيل جوالات الملح دي ، وهما ماشيين عدو على البحر .. الحمار الذكي نزل البحر وقال للحمار الغبي انا نازل استحما الحمار الغبي قاله طيب نزل الملح اللي انت شايله ده .. الحمار الذكى .. لأ انا هاستحما بسرعه ونزل فعلا البحر بالملح وطبعا الحمار الغبي عايز يقلده وينزل يستحما زيه وطبعا نزل من غير ما ينزل السفنج .. طبعا الملح داب فى المويه لكن السفنج؟؟؟؟ اكيد شرب مويه كتير وأصبح تقيل جداً وقرب يروح فيها لولى انتباه الناس لامن لحقوه من الغرق وبعدها طوالي قلب على صاحبه الحمار الذكي واعتقله بتهمة تقييد النظام الدستوري المشكلة الكبرى إنو الحمار الغبي طارت ليه القصة كلها في راسو في ناس من الحي اتمردوا عليه وواحدين انفصلوا وواحدين اتقتلوا وواحدين محتارين ما عارفين يعملو شنو والقصة بازط خالس خالس المهم أنحنا دايرين نقعد نفكر في إنقاذ ما يمكن انقاذه من باقي الإنقاذ الما تم إنفاذه بس قولينا يا جبرا نعمل كييييييييف ………
البروف والسمار سلام
هل يجي يوم ونفعل شيئا لتحقيق ما نتمناه غير ان نرقد في بيوتنا ونتمنى على الله الأماني؟
جبرا وناس القمردينة .. بمناسبة النفايات والتاتشرات حقت بشار دي تعالوا النحكي ليكم القصة دي والله جد ..أمي جاتا البت بتاعت قروش النفايات أمي قالت ليها يابتي عربيتكم دي ليها اسبوعين ما جات بي فوقنا ..( بت النفايات)قالت ليها يا حاجة انا ماعندي دخل بالعربية انا مهمتي التحصيل وبس .. امي قالت ليها : اها سمح وكت جابت ليها فلهمة ولماضة اصلي مابدفع ليكم …( بت النفايات ) قالت ليها لو ما دفعتي بجيب ليكي استدعاء .. امي قالت ليها يستدعو ليكي عزرائيل يا مطلوقة ..وطردتا . .. ( بت النفايات ) ما كضبت وتاني يوم جابت للحاجة ورقة عشان تستلما ..امي قالت ليها الورقة دي مكتوب فيها شنو ؟ ( بت النفايات ) قالت دي طلب حضور عند قاضي النفايات .. امي قالت ليها : مخير الله !! الوساخة سو ليها قاضي ؟ !! وقطعت الورقة ورمتا لي ( بت النفايات ) .. قامت تاااني ( بت النفايات ) رجعت اليوم البعدو ومعاها أمر قبض واتنين عساكر جايين مع ( بت النفايات ) .. أمي مرقت ليهم ولقت ( بت النفايات ) ومعاها اتنين عساكر واقفين قالت ليهم : خير في شنو ؟!! العساكر قالوا ليها : تمشي معانا يا حاجة .. امي قالت ليهم : مخير الله يعني هسع انتو الاتنين جايين مبارين ( بت ) عشان تمسكوني ؟!! هسع أمس القريبة دي خليل واولاده ما كانوا حايمين في شارعنا ده مالكم ما جيتوا مسكتوهو !! ؟ امشو من هنا يا باطلين ..
قالوا العساكر الاتنين عملوا خلف دور و ( بت النفايات ) نادتم .. العساكر قالوا ليها يا بت اكتبي المطلوبة مختلة عقليا وارحكي… .
طبعا امي لليلة تسأل فينا مختلة عقليا يعني شنو ؟ وانا حذرت اخواتي ما يوروها لأنها لو عرفت حتكون اول واحد يطلع ميدان التحرير اقصد حوش الخليفة .. ما ياها الفسحة الوحيدة الفضلت …
لا يا جنوبي في فسحه تانيه عايزين يعملو فيها مجسم للكعية الشريفه ، عشان العايز يتجمع في الفسحه دي يعتقل بتهمة التجمع المعارض لقيام أراضي مقدسه.
والله يا جنوبى ..امك دى (أرجل ) مرة اسمع بيها فى حياتى وعجبنى العملتو مع بت النفايات والعساكر لأنو دا المفروض أى سودانى يعملوا مع النظام الحالى دا حتى يبطلوا أكل أموال الناس بالباطل .. وإن شاء الله أمك دى ربنا يديها الصحة والعافية وطول العمر عشان تكون قائدة المسيرة فى أى فسحة كانت حتى لو كان ميدان عقرب ..
أهو دا الشغل …زى ما قالوا الجماعة ..
حاج السلاوي .. ياخي ربي يديك الصحة والعافية ويعافيك في دينك وبدنك ويجعل خاتمتك احسن عملك ..
سنكلوني : مااااا بقوها تبع الارض الحرام وكدا …..
حاج السلاوي : عشان دعوتك الحلوة لي امي هاك دي … زماااااااان زمن نميري انا كنت في ابوكدوك الثانوي العام كان ازمة رغيف وسكر وزيادة اسعار .. يوم مشينا المدرسة الصباح بعد الحصة الاولي جونا اولاد بيت الامانة الثانوي العالي وطلعونا مظاهرات . انا قمت رجعت البيت .. اول ما وصلت رأس شارعنا قابلتني وهي شايلا قفتا وراجعة من ( الجزر ) قالت لي : مالك جاي زي الوكت ده. قلت ليها الاولاد طلعوا مظاهرات .. قالت لي وانت جاي مالك !! عندك ( العادة ) ؟؟ والله يا السلاوي من اليوما ديك ولحدي ما مرقت من السودان ما فاتتني مظاهرة واحدة .. مرات لامن امرق من المظاهرة ما بعرفا هي حقت شنو ..
وطالما جبنا سيرة الامهات انا والله ما شفت ارجل من نسوان ابوكدوك كنا لما البوليس يزنقنا يدخلننا بيوتن ويتحزمن يقيفن في باب الحوش يصدن العساكر مننا …
هاشموتو : المشكلة انو جيل ثقافة المظاهرات اصغرهم الان في منتصف اربعينيات العمر وزي ما قال ( بشار ) ما بيقدر علي ( توير النفس ) والمؤسف انو شبابنا الحالي شوف عيني بشيلوا شنطة يد وفيها ( مشط,مراية,جل وكريم مسوح ) …
غايتو اعفي لينا يا ( آدم سفير ) شلنا حسك سااااكت .
آييييييييييييييييي دا الشغل دا الشغل..
يا برف عايزين تجيبو لينا المداح راجع و لا بتو ، و ابو عميمه مجهز ولدو وما عرف الديناصورات مجهزين لينا شنو ؟ على الط حسه القيامه تقوم و نضحك عليهم ، سؤال خبيز : الفاكر انو رزقو فى الواطه ، واطاتو صبحت ………………… عجبى
أين أنت يآآآآآآآآآآآآآود الخلا ؟ عل ما في عوجة …………….
سلام ياصديقي محمد عمر وبقية العقد النضيد
القلوب عند بعضيها، وربنا يديم المودة،،،
أستاذي البروف والسمار الأعزاء
الجنوبي رامي الحدق ومحمد عمر ما عندي (أيو) كلام غير ما أقول ليكم:
أهلي الفصاح أسياد الصباح درعك يا وطني كل الملاح الجمالهن… فاح زينتك ياوطني انت عندي كبير… و حبي ليك كتير القومه ليك يا وطني.. شيلوه.. وزيدوه.. وطن الجمال.. علوه. …
سهيل الكتمت شنو؟؟ سلملي ع حسن كابوس
الشعراوي يتكلم فتمعّن :
• أتمني أن يصل الدين إلي أهل السياسة.. ولا يصل أهل الدين إلي السياسة
• ونحن غالبا نكون مضيعين للحق لأننا لانوفر له القوة التي ينتصر به
• الثائر الحق هو من يثور لهدم الفساد، ثم يهدأ لبناء الأمجاد
• والظالم حين يظلم لا يأخذ حق غيره فقط ، بل يُغري غيره من الأقوياء على أخذ حقوق الضعفاء وظلمهم، وإذا انتشر الظلم في مجتمع تأتي معه البطالة وتتعطّل حركة الحياة كلها
• علينا أن نعلم أنه لا شيء يتم في كون الله مصادفة ، بل كل شيء بقدر ، وفي العادة لا يقلق من له أب، فكيف يقلق من له رب
من كلام محمد متولي الشعراوي
اخى جبرا والاخوه الاعزاء
هل ح يجي يوم نغيب منكم وتسالوا علينا
اخى جبرا
فى كم مقال فاتنى انا عاوزه ملحق (اصله مقالات حاره خلاص كنت اتمنى المداخله )
اضم صوتي لمحمد عمر في السؤال عن ود الخلا …
بت وراق .. سلام .. لو جاء اليوم ده تبقي القمردينة فعلا قمردينة ..
محمد عمر .. انا تمعّنت :
1- وصول اهل الدين للسياسة ( خروف بالتقسيط واخواتا )
2- اختيارنا لنواب برلمان يصفقوا لزيادة الاسعار.
3- بري !!! ما عرفتها . انت قاصد شنو !؟
4- الحكومة : ضرائب زكاة نفايات جبايات مضايقات ..
الرأسمالية الغير موالية : إفلاس او انكماش وخروج من الساحة الاقتصادية واغلاق مزارع ومصانع ومحلات تأوي آلاف من المواطنين الضعاف وطبعا اتشردوا واتعطلوا . ( طبعا الرأسمالية الموالية فقط مكتب وتلفون هي كل عدة الشغل ولنكون منصفين ربما عامل للنظافة وغالبا ما يكون العامل on call .
5- يعني ما ح نصحي يوم فجاتن ونلقي الوضع اتصلح .. اللهم قوي ايمانا بيك حتي لا نقلق .
اها يا محمد عمر انتهيت يلا صحح لي ….
أسدقائي الأعزاء جنوبي ومحمد عمر ،،
السمار الأكارم بنوالكرام، كانت سفرة قصيرة أبعدتني عنكم وشكرا” جزيلا”علي شعوركم النبيل والجميل
تحياتي وأشواقي،
وآه من قلبي وليلي الطويل،،، فقد راح الجميل!!!!
شكرا” لكم مرة أخري جميعا”،،،
وللأستاذة بنت وراق أنشاء الله دايما” حاضرة!!
بت وراق…سلام..
ع البال والخاطر لكن جماعة الحيكومة خلتنا ملهيين وما جايبين خبر..وخليك قريبة والملحق بصلك تب باذن الله..
جنوبى….سلام…
مية من مية…
والقمردينة تحيا بنبضكم,فقط كونوا لها وبها من اجل غد افضل قد اقترب…
ويحك يا ابن برد .. ثكلتك ام مغد .. إنت ما قاعد تقرأ لإسحاق احمد فضل الله و و الظافر لا شنو ؟؟؟
يا جنوبي إنت ماك نصيح ؟؟؟ إنت عايز نوابك في البرلمان يصفقوا لشنو ؟ لفقدان المخصصات و العربات ووووو ولا كيف ؟؟
انا شخصيآ ضد فكرة تمثيل الشعب في البرلمان عن طريق نواب .. يا نمثل كلنا .. يا بدل البهدله دي اخير لينا زول وااااحد يمثلنا كلنا .. يلغف قدر ما يقدر و يخلي لينا الباقي .. بدل ما يلغفوهو النواب و نطلع نحن بقد القفه .
كسره : هي القفه دي ذاااتها عندها خيار وفقوس .. في ناس طواااالي جوه القفه .. اصلهم ما مرقو منها
اولا يا استاذ انا من اشد المعجبين
و الليلة اكتشفت المدونة بتاعتك و فرحت جدا……
اتمني اكون صديق للمدونة
يا اهل القمردينة
يا بت وراق أنا خفت أسأل منك تقولي : الزول ده ما تم يومين في القمردينة .. خلاس عد الحالة واحدة .. لو ما كده كان تجرأت وسألت .. لكن والله في البال وتعليقاتك جد موضوعية وذات فائدة بس إنتي .. بس !!! عيبك الوحيد إنك ساخرة زيادة عن اللزوم ..
ود الخلا : المنتدى بيحتاج حبت مناكفات فلو تقلنا عليك شوية ما تزعل يا أبو الخلا بالمناسبة الخرفان في الخلا عملت كم ؟..
الأخ جنوبي : إنت مرات بتسبقني على تعليقات وأفكار لامن تحير أبو جاني ذاتو .. يمكن ده البيسموهو تلاقي الأرواح .. بس ده كلو منك يا جبرا جننتنا .. أما بخصوص تعليقك ( بري !!! ما عرفتها . انت قاصد شنو !؟ ) الجماعة ديل لاهمِّن أهل السياسة ولا عندهم (…….) بس دِينُم السلطة ، وداير تعرف أنا قاصد شنو !! .. ارجع واقرا قصة الحمار الغبي المعنى حتلقاهو وااااااااااااااضح………
حاج أحمد السلاوي ، وبشار أنتم زينة القمردينة وجزا الله خيرا أخونا الفاتح حيث جمع ما بين أفكار وان تفاوتت فهي ملتقية على الفهم والعقل ووالعلم والزوق الرفيع ، والشعور المرهف ، حيث يظهر ذلك في صون التعاليق عن الجرح أو الإساءة ………….. أما باقي العقد الفريد فلهم منا كل احترام ….
يا خوانا كت متوقع واحد فيكم يجيني الفطور بتاع السماية ويقولي أنا من المنتدى .. بس مفيش حد منكم جا……
محمد عمر !!! تااااااني ولدتو ؟ هي يا يابا يحفظكم الله .
والله يا محمد عمر انا برضو مرات قاعد تحصل لي معاك … نكون تيمان برقو ؟
ود الخلا : حمد لله علي السلامة وشكرا لانك خيبت ظني وطلعت روحك رياضية وليك جاذبية …
د. شمباتي : ياربي قد اقترب ؟
سهيل : هيييييي ما دايرين كده والله مافي شئ قطس حجرنا إلا ناس إكمال ثانوي ديل .. اجي يا ريّسو وتيّسو .
ياجنوبي :
أنحنا ما ولدنا برانا الشعب كلوا اليومين ديل قاعد يلد ، وبعدين الحكومة دي حدها معاي الولادة وبس ما وصلت مرحلتك بتاعت ( هييييييييي ، وبري ) دي ، وربنا يستر…ههههههههههههههه……
البروف والسمار الاكارم امكن يجي اليوم تفالوا خيرا تجدوه لكن يا ريت مافي عهدهم لكن نحن نكون بقينا بترول
يا جنوبي خلي روحك رياضية وما تقوم تتهور في الرد………انا بزر معاك
بهظر معااااااك غلته مطبعية ……………..
أكد المشير عمر حسن احمد البشير رئيس الجمهورية لدى مخاطبته جماهير ولاية الجزيرة بمنطقة العريباب بمحلية مدني الكبرى بمناسبة اعياد الشهيد القومي التاسع عشر ان تمسك الانقاذ بالشريعة الاسلامية أمر ثابت والمضي قدماً في المشروع الحضاري المتمثل في قوله : أن اسقاط الانقاذ وازالتها (لحسة كوع ) داعيا تجار السياسة لتنظيم قواعدهم وترتيبها لخوض الانتخابات القادمة مشددا على قيام الانتخابات و قال أن ( الحشاش يملأ شبكته ) …………..
محمد عمر : يا زول اخد راحتك نحنا ناس بنعيش حياتنا بالنية السليمة .
قلت لي حدك معاها الولادة .. والله انا زاتي بدت معاي كده .. ما قلت ليك في حاجات كتيرة مشتركة بيناتنا !!!.
يا صديقي بري وهييي وصف للحال (ادونا الدرق وهاكم رحاطتنا ) واحسبنا قبلنا المقايضة .والما بقدر يقول لا.. بقول بري !!!
نادية عثمان مختار قالت : ( الشعب يريد الحكم التمام او الرحيل دون ملام ) ونحنا اكتفينا بترديد بالله دي عيشة حتي ملت الشكوي من شكوانا ( اها رأيك شنو مش اديناها طاقيتنا وشلنا منها طاقية التيمان ) ….
انتو جبرا وينو نعل ما عاقوهو …..
شكرا لكم اخي جنوبى-ود الخلاء-ياسين- وعمر (على اهتمامكم والرد)
اما اخي الفاتح ح اخد كسرته واقول ماظنيت
ماااااااظنيت يجي يوم ننوم من غير صوت الباعوض
ماااااظنيت يجى يوم الحومه ترجع ناس الصالح العام وتعتزر
مااااظنيت يجى يوم يخصموا من مرتبك بعد مايشاوروك
احيييييييييييييييييييييييه منهم هم خلو لينا مرتب واااااوجعي الشديد
خطا غير مقصود الحكومه وليس الحومه
يا جماعة .. إنتو ابقو عمليين وقولوا: هل حيجي يوم ونطلع الشارع زي باقي الخلق ونعمل لينا ميدان آخر للتحرير أو التغيير ..طالما الكسرة بقت (مااااا ظنيت) .. الحل ظاااهر زي الشمس .. نطلع يكتلو مننا 10 ألف فداء لباقي الشعب الفضل .. وكل الحاجات البنحلم بيها تتحقق !!
بت وراق حبابك و حباب طلتك
اب احمد : إنت جادي ؟؟؟ 10.000 شهيد ؟؟؟ والله إنت متفائل شديد و نساي جدآ .. ياخ عدد الشهداء من يوم 30 سته سنة تسعه و تمانين فات كلامك دا بكتير .. هو الشهيد دا إلا يموت بالرصاص ؟؟؟
طيب يل سهيل أخوي ما دام كدا كدا ميتين (وميتينا طالع) ما أحسن نموت لينا موتة بفايدة .. !!!
الليلة النفس صبحت عنيدة وعامدة
وما بتتسلى غير برقع حميدة وحامدة
يا حليل الرباع أبان قلوباً جامدة
ناس (ودالخلا) ضو القبيلة الهامدة
هييييييع
يا ود الخلا أبشر دوام بالخير
وإتنبر براك خلينا نحنا أخير
لو كان المراد نلقاه غير تأخير
مرقتنا الدروب زولك بجيب خرخير !!
هيع (صغيرونة كدا !!)
دعوة أب احمد :
أنا بقترح عليكم بمناسبة (عمليين ) وكده اننا نذهب جميعاً لأب احمد هو يرشدنا ونحن ننفذ ، ولازم تون القصة كُتّيمِي عشان تكون الثورة ناجحة .. البيوافق يعمليه أي حركة في تعليقو ونمشي برابطة المعلم على أب احمد عشان يشوفلينا قصة الثورة دي شنو …..
(كُتّيمِي عشان تكون الثورة ناجحة)،،،
مش ممكن طبعا” يا محمد عمر يكون وصفك ده للثورة الناجحة ، وما دام هي بقت (كُتّيمِي)، فمن هسي أبشر بطول سلامة يا مربع!!!!
الحق ولكل الناس في عدم كتم المشاعر، وما دام جابت ليها مشاعر مكتومة يبقي الحب في الحالة دي أقوي وللا مش كدا؟؟
أناشد الحكومة أن تسرع كما وعدت بتجهيز ميدان الهايد بارك أقصد التحرير أوب سوري ميدان كركر لتنفيس الشعب الفضل علشان ما يموت لينا كتومي وكدا!!
ما دايرا لك الميتة أم رماد شح
دايراك يوم لُقا بدميك تتوشح
اقصد انو التخطيط للثورة يكون كتيمي .. ما زي الكيزان أي حاجة عملين ليها ساحة خدرا ومسيرا عميا…………
يا ود الخلا زولك خانتو حروفو
مارق من سماية .. مقابلو عيد وخروفو
هو قاصد اللمة في سترة والناس يقعدو يشوفو
كيف يبقي الدبار وكل زول يطمن خوفو
====
ود الخلا وناس القمردينة
أقبلوا مني الكلام بي علتو وبالشينة
عازة راقدة تحت رجال ومُشتحات كُرعينا
مكشوفة الصدُر تبكي وتعاين لينا
أخونا محمد عمر .. من ناحية التخطيط الكتيمي لزوم التعبئة .. المسألة بقت ما دايرة ليها أي تعبئة .. الشعب دا معبا فل وعلى وشك الطرشقة .. الجمعة الجاية دي … نسميها (جمعة الخروج الأول) .. ونتلاقى فرادى وجماعات في ميدان جاكسون والغايب يكلم الحاضر … لوحصلت أي عنكبة في الخرطوم … عندنا في بحري ميدان عقرب … عنكبة تاني أمدرمان ميدان الشهداء (دي ذاتا ماشة مع الثورة) .. يعني لا داسينو لا مضارينو … وجاهزين بشهدائنا .. شنو ليك .. قال أبشر بطول البقاء يا مربع … !
هييييع
جنوبى…
فرحت بشر للكيزان قد اقترب !