الجن الأحمر

في عددها ليوم الأربعاء الماضي الموافق 28 أغسطس 2013م وعلى صفحتها الأخيرة أوردت الزميلة (الرأي العام) خبراً بعنوان (خرجوا على 20 دفعة – 40 ألف جان يخترقون جسد فتاة بنهر النيل) يقول الخبر عزيزي القارئ (أصيبت فتاة عشرينية بولاية نهر النيل بأنماط سلوكية غريبة أثر إختراق جسدها نحو 40 ألف جان الأسابيع الماضية وقال شهود عيان للرأي العام أن ذوى الفتاة ذهبو بها إلى الشيخ (أ.أ) بمدينة بربر الذي خاطب الجان وطالبه بالخروج إلا أنه رفض وأعتذر للشيخ بحجة أن دخولهم كان بغرض تجربة إحتمال جسد الإنسان لعدد كبير منهم إلا أن الشيخ أصر عليهم بالخروج من الفتاة التي أصيبت بالهذيان والدخول في غيبوبة أحياناً ، وبلغ النزاع بين الشيخ والجان لأكثر من 11 ساعة وتوصلت المفاوضات إلى خروجهم 20 في كل دفعة مما إضطر الشيخ إلى السهر حتى الصباح لإخراج الجان لتعود الفتاة إلى صحتها النفسية الطبيعية ) .. إنتهى الخبر يا سادتي الأماجد ويبدو أن التفاوض بين الإنسان والجان أجدي وأسهل من التفاوض بين الإنسان وأخيه الإنسان فها هو الجان قد أذعن للشيخ بالخروج ولم تستغرق المفاوضات سوى بضع ساعات (لا دوحة ولا وفد مقدمة ولايحزنون) تم الإتفاق فيها على طريقة الخروج الآمن على دفعات !
غير أن أبانا الشيخ يبدو أنه (دقس) ولم يهتبل لفرصة التي جاءته على طبق من ذهب فهو لم يستفد من هذا التجمع (الشيطاني) الكبير ومن طاعة الجن له خوفاً والبلاد تعاني ما تعاني من كوارث السيول والأمطار فالعبد لله لو كان مكان الشيخ لإختلفت المفاوضات
– مش حرام عليكم يا جان البلد غرقانه وبدل ما تساعدونا تجوا تدخلو في جسد البت المسكينة دي؟
– وعاوزنا نعمل شنو؟
– تعملوا شنو كيف؟ ما شايفين الخراب ده
– الخراب ده ما سببو إنتو؟ تعملو نايمين ولمن الخريف يجي تقعدو تكوركو
– نكورك ما نكورك ما دخلكم .. إنتو تطلعو من جسد البت دي دلوقتي وكل 20 منكم يمشو ليهم (بركة موية) ينشفوها !
– بس كده
– لا وكمان أي بيت وأي مدرسة وأي حيطه واقعة تبنوها .. وأي شارع باظ تصلحوهو
– ده ما كتير علينا يا الشيخ
– كتير عليكم ده شنو إنتو (جان) وللا (لجان شعبية)؟ يا تعملو البقولو ليكم ده يا (آيات الحرق) !
– لا .. لا ما تحرقنا يا الشيخ .. لو عاوزين (بنيه تحتية) ذاااتا نعملا ليكم
– البنية التحتية دي سيبوها (عندنا ليها وزارة) بس أغيثو لينا الناس المنكوبة دي ورجعوا لينا الحاجات الإتهدمت دي وإلا سوف نذيقكم بإذن الله عذاب الحريق
– حريق لا .. حريق لا .. سمعاً وطاعة !
بينما كانت الحياة تسير على ذات الوتيرة من الرتابة .. الأسر المنكوبة تجلس على بقايا ممتلكاتها وسط أكوام الطين والمياه الراكضة والذباب والباعوض .. والمسؤولون يصرحون بإحتوائهم للأزمة وفجأتن ووسط ذهول الجميع تعود كل الأشياء إلى ما كانت عليه قبل كارثة الأمطار .. تختفي البرك والمستنقعات .. تعود المباني والبيوت والشوارع إلى هيئتها التي كانت .. !!
وتصدر صحف اليوم التالي وهي تحمل مانشتات تصريحات المسؤولين :
– الحكومة تقوم بإعادة الحياة إلى طبيعتها
– 40 الف مهندس وعامل يعيدون البسمة إلى الأسر المنكوبة
– إعادة تشييد كل المدارس والمباني في وقت قياسي
– تشييد 40 ألف منزل منهار في يوم واحد
وبينما العبدلله يقرأ في عناوين الصحف يمثل أمامة (الناطق الرسمي للجان) :
– إن شاء الله خير يا شمهريرة ّ
– خير شنو يا الشيخ ؟
– أمبارح اليوم كوووولو تعبانين نشتغل والحكومة تقول إنها أعادت الحياة إلى طبيعتها ؟
– ما عليك يا شمهريره هم أصلهم كده .. كويس إنك جيتني لأني امبارح نسيت ليا حاجة
– نسيت شنو يا الشيخ !
– نسيت اقول ليك إنك تجمع الإغاثات الجات دي كوووولها من المخازن الفيها (خاصة الخيم ام جنريترات ومكيفات) وتوزعها للناس البستحقوها الكانو متضررين !
– والله يا الشيخ إلا دي الما بنقدر عليها؟
– ليه يا شمهريرة
– لأنو دي يا الشيخ تحت حيازة (الجن الأحمر) !!

كسرة :
نسينا نسأل (شمهريره) عن أخبار ملف خط هيثرو؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و؟

About these ads

40 responses

    1. تحية لك كوكو وليك وحشة

      1. سلام ،الغلبان شرقوى ( هارد لك ) جنونى و د / شنباتى و باقى اللخوان حياكم و ابقاكم ، انا متابع لكن العجائز يمتنعون ، فى كلمات كده ما جايزه و لا لايقه تطلع براها ، هناى دى واحده منهم ، كما قال ابن هشام هى من الاسماء السته و عملوها خمسه عشان ما يذكروا هناى ده ، و هو هنو كاخو و حمو وفو و الباقى ، و يستعمل لما يستقبح من المرأه ، راجع ( قطر الندى …..) اما اللندراوه فهى تماما كما قال اخونا جنونى ……….. عجبى

      2. هههههههههههههههههههههههههه,,
        وعليكم السلااام ورحة الله يا حبيب ,,
        وقول النصيحة !
        لكن قطر الندى ما صعبها عليى العرب شوية كدة !!؟
        وى وى وى

    1. اخي شرقاوي لك التحية برنجية شنو دي يا خوي الجن بداوي كعبة الاندراوة (صراحة الاندراوة دي ما عارفها) ما شالها كوكو والا ما ولعها لطفا اريد معنى الاندراوة وهناك كلمتين من زمن حبوبتي (شيل الهناي وجيب الهناي وخت البتاع في الهناي ) ارجو الافادة وتاني مرة اصحى قبل كوكو

      1. الانداروة دي ما بتتوصف لاكين شوفا عيان بيان في اللمبي !

    2. دستوركم يا اولاد ماما .. ( نظام تحصين وكده ) ..
      شرقاوي مبروكة البرنجيه لاكين الليلة بينسون عديييييييل @ ثرو كوكو نعزّ من عزاها ونصهين ممن جلاها ..

      1. زي صهينة اصحابنا من الشعب ادركنا يا سيسي

  1. السلام عليكم ، البرف و الاخوان ، فى شرق النيل ، الناس من شفقتها بنت البيوت فى مجارى السيول و الشفقانين نمره واحد باعوا للناس المجارى و الخيران ، وحكومتنا الرشيده واقفه تتفرج و تعمل للناس فى عقودات تمليك للخيران و مجارى السيول ، و الادهى انو الشوارع الرئيسيه كلها شمال جنوب ، و السيول و المياه كلها من الشرق قاصده النيل غربا ، ما لقت ليها كبرى ولا مزلقان ان شاء الله حتى رجل مرور ، و الاعجب من ده كلو انو الناس الشفقانه حتبنى تانى فى نفس المحلات ، اما الخيم الفاخره فمن زمان سكنوا فيها جن يوسه و لولا الحبشيه و الزارعنا يجى يقلعنا ………. عجبى

    1. آآآآآآآآآآآآآآآآآآكوكو شرق النيل الباعو لي فيها الواطه وما لقيتها لا في مجرى سيل ولا في الهواء زاتو

  2. والله دي عملية إبليس ذاتو ما بعملها .

    1. ابليس فاضي لجنس العمائل دي يا امريكي

  3. لاول وهلة افتكرت ان الجن الاحمر الجن الاحمر المعشعش فينا وخانقنا وكاتمنا لكن لقيتوا جنا عديل ويا جماعة الخير طالما عندنا ناس في السودان بقدروا على الجن ليه ما يظبطو البلد دي شوية ههههه قال جن قال ضحك على العقول في زمن الا معقول نهايتو كتمت كتمت كتمت

  4. منو القال ليك مافي جن يا أخوي الغلبان ؟؟ الجن موجود في كل مكان وزمان !! وزي ما قال أخونا الغلبان ما دام عندنا ناس يقدروا يتحكموا فيهم ليه ما نعمل (شيرنق) كل واحد ألف جنيه بالجديد نديهم للشيوخ ونطلب منهم (يقلعوا لينا الناس ديل) ويرحيوا البلاد والعباد منهم ومن بلاويهم !! ولا رأيكم شنو يا أخوانا ؟؟؟؟؟

  5. بالمناسبة كان في مؤتمر بتاع جن في التسعينات وقد وجه الرئيس باللاستفادة من الجن في التنمية لكن ما متاكد التوجيهات اتنفذت ولا زي بتاعت هيثرو واخواتها واذا كان في استفادة من الجن الا تكون في منع الناس من اسقاط الحكام ما ظاهر ليها حاجة غير كده

      1. Nuna 29 اغسطس 2013 عند 11:05 م
        والله يا لغلبان وكتي ده كلو افكر ليك في الانتحاريين القلت نجهزهم ليك، (عمك عبيد متخندق ومحتسب)’فلاديمير شكلو كده ريحه احمر، جنوبي ما بجازف ليك عشان شمالي، شمباتي قالو الله مرقو من السيل، المندهش ما فكت حيرتو لسه، غايتو إلا كان كتلوني ولسه حي اهو أصلو كدة كدة مقتول ( لكم جميعا إخوتي العتبي حتى ترضون)

  6. شايفكم كووولكم عاملين رايحين ! فتاة عشرينية دي ما عرفتوها يعني ما ياها بت الخليل ؟ 24 سنة تقند قدامكم وال 40 ألف جان ياهم الوزراء والتنفيذيين والمستشارين واللجان الشعبية وباقي الكرور الدخل جسد عازة , والدفعات الخرجت ناس الطيب سيخة وبقية قيادة مجلس الثورة ياها اول دفعة وناس شيخ حسن والسنوسي وصحبه تاني دفعه وناس غازي تالت دفعه الا في كم جان من الخرجوا معاه تاااني رجعوا دخلوا ! ولو اخدنا المدة الزمنية بين كل دفعه خرجت والتانية حنضطر نساهر لي يوم القيامة ..
    مفروض كل بتاع قدرة فول بعد فولو يخلص يرمي ليهو قبضة بخور تيمان ويكورك : النبي قالك أخرج الرسول قالك اخرج , يا عين يا عنية يا كافرة يا دقنية الشلتي رجعي ليا .. الخيمة والطحنية .. جالوص غالي عليا , كيف ابني خرسانية..

    1. هههههههههههههههههههههههههههه,,,حااااامضة منك يا شيخة !!

    2. وانتا قايل الشيخ البخاطب الجن ده منو ……..بس اوعا يكون نسيب المهدي

    3. سلامات لكل السمار والتحيه للبروف
      ههههههههههههههههههه حيرته قلبي معاك والله اظن البروف ذاتو ما فكر فيها من الزاويه دي انت يلظبط كده واقف وين

      1. ههههههههههههههه
        واقفين علي الصفين شيخ بدوي يحيييييييييينا
        الظار بلم يا بت امي !! كنتي وين ؟

      2. بت وراق !
        حبااااااااااااااااااابك يا الملكة ,,,
        جنوبى ..
        عليك الله دق ليها خيط (العودة) ,,
        دستوووووووووووور

    4. انتو ماسكين في الجن ونسيتو جنية وزارة العمل يعني الجن براهو الجنيات كمان

    5. كنت في ساحة معركه قويه مع الباعوض والملاريا اجاركم الله
      شمباتى
      معزره ما قدرته ارد ليك الزياره مع الملاريا

  7. هاها جنوبي بااالغ عديل كدة، لكن يا خوانا ما نضحك ساي الناس ديل بنفذوا أفكار البروف طوالي، الله يستر علي الجن جلهم بلا

  8. بى دستوووووركم ,,
    يعفوا ويرضوا ,,,
    والله يابروف الجن دا يقبل عليك يعمللك شعر ودقن حمرا !
    دستوووووووووووووووووووووووور

  9. عشان كدااااا، تمشي أي جلسة زار تلقاها فاااااضية تاري الجماعة كلهم مشوا يحسنوا أوضاعهم في وزاره التخطيط

    1. لك التحية على مرورك على تحبيري لكن جاد مش زي ناس القمردينة ووالله ادخل ليكم الخرطوم الا تلقي بم بم بم حاصلة مشيت بنغازي اطربقت روحت مصراته دشمان بالاسلحة التقيلة في الشارع روحت سرت اشتبك المصراتيه والقذاذفه يعني كان الشغلانة شايلها في جيبي وماشي يعني اصبح الموضوع زي قاعد (جمب بت بتمدغ لبانه) شوفي لي ناس زي ديل وامانة ما اسوي ليكم مظاهرة الجن الاحمر زاتو ما يفرتقها

  10. والله يابروف حاجه تحير السفها زتو بس لينا الكريم

  11. كسرة احمد عثمان
    سوف انفذ بجلدي

    1. احمد عثمان ال ………….غني بالله شوف اخر الاسم المر……………………غني فالمر دا ليكم وغني ليهم هع كع كرع

  12. هههههههههه دا الجن الكلكي زاتوووو

    1. بس يا علاء ما لابس ملكي لابس كاكي ههههههههه ومن المدفع طلع خازوق وخوازيق البلد زادت

  13. نسأل الله العافية والجن دا مالقى غير البنية دي عشان يجربو فيها

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل خروج   / تغيير )

Twitter picture

You are commenting using your Twitter account. تسجيل خروج   / تغيير )

Facebook photo

You are commenting using your Facebook account. تسجيل خروج   / تغيير )

Google+ photo

You are commenting using your Google+ account. تسجيل خروج   / تغيير )

Connecting to %s

تابع

Get every new post delivered to your Inbox.

Join 1,770 other followers

%d bloggers like this: