نفسك فى قروش كتيرة؟ ياخى القروش دى فتنة أخير ليكا الفقر الإنتا فيهو ده .. لو هسه عملتا ليكا شوية قريشات وبقيت غنى ح ترتكب آثام وح تدخل النار
نفسك تكون مسئول؟ لازم تراجع الطبيب النفسى .. ده هسه كلام يقولوا زول عاقل !
نفسك فى لحمة؟ : اللحمه يا أستاذ ثبت علمياً إنها مضرة بالصحة وبتجيب أمراض كتيره خاصة اللحمة (الكيرى) الأنتا بتاكل منها دى لأنها ما معروفه لحمت شنو؟ والناس بقت ما عندها ذمة ممكن تضبح (أى حاجة) عشان كده خليك فى السليم وأبعد عن الحاجة دى ! وبعدين ياخى الفول ده مالو؟ عيبو ليا ؟ ما برضو فيهو (بروطين) !
نفسك تتفسح إنتا وخطيبتك ؟ ما عندك أى مشكلة طوااالى وعلى حدائق (حبيبى مفلس) ما ح تكلفك الشغلانه خمسة جنيه .. كيسين تسالى .. كيسين فول حاجات .. كبايتين شاى .. إتنين حاجة باردة .. بس لو لموا فيك ناس النظام العام إحتمال المسألة تكلفك أكتر شوية !
نفسك تتوظف؟ : بسيطة .. تمشى طواالى تقابل المسئول القال ح يوفر للخريجين (مليون فرصة وظيفية) وتقول ليهو بالله خلينى أكون (واحد فى المليون) !
نفسك تتزوج؟ : ما تتزوج ليه؟ مش ما عندك التكتح ؟ تتزوج ونص وخمسة وأهو أخوانا العلماء بارك الله فيهم وأثابهم ثواباً كثيراً سهلوا ليكا المسألة وعندك زواج المصواب وزواج المسيار وزواج المصياف ، وزواج المسفار، وزواج المطيار ، وزواج المصياع وزواج المحجاج ، وزواج المسياق .. المهم ما مطلوب منك فى كل الأنكحة المشروعة دى غير (مجهودك الفردى) !
نفسك يكون عندك قطعة سكنية؟ ياخى والله إنتا متفائل جداً .. هو لمن السودان (كان) مليون ميل مربع ما لقيت ليكا قطعة فى الخطة السكنية عاوز تلاقى ليكا قطعه بعد ما بقى مليون متر مربع ؟
نفسك فى ملابس أنيقة؟ يا خى عشان تلبس ليكا لبسة أنيقة عاوز ليك مرتب شهرين بى حالهم .. ياخى ألبس من (المرحوم كان قدرك) هدوم سكند هاند لكن قيافة وآخر وجاهه وتناسب دخلك المهدود
نفسك فى تلفزيون ملون؟ والله الظاهر إنتا ح تجيبوا لى نفسك براك .. ح تجيك المذيعة أم كشاكيش كتيرة ديك وتقعد كل دقيقة تأشر ليك بى أيدا عشان تشوف نقشة الحنة ويجيك بعدها المذيع القاعد يسبل فى عيونو وكل دقيقتين يقعد يقهى ليكا فى سقف الأستديو .. والمصيبة تقوم تشاهد ليك مباراة (غمة) !
نفسك تتعالج ؟ يا أستاذ الشافى الله .. خليك من مسألة الأطباء والمستوصفات دى عشان ممكن يعالجوا ليكا حاجة ويبوظوا ليكا عشرين حاجه ! المهم لو ما سمعتا كلامى وربنا سهل ليكا ومشيت ودخلتا عملية فنصيحة أخوية أعمل جرد لأعضاءك قبل العملية وأكتبهم (للورثة) عشان يراجعوا (العدد) وهم بيغسلوا فيك !
نفسك تلبس كويس؟ : طوااالى ييم وجهك شطر (خلف الجامع الكبير) حيث سوق الحرامية وألبس من (المرحوم كان قدرك) .هدوم مستعمله وآخر وجاهة..و رخيصه.. وقدر ميزانيتك (ده لو عند ميزانية) من أساسو
نفسك أولادك يتعلموا؟ ح تجيب ليهم كل يوم قروش طباشير وقروش كهرباء للمدرسة وموية للمدرسة وقروش فطور للأساتذة وقروش طباعة إمتحانات وقروش مش عارف ايه من وين؟ وبعدين أفرض قعدت تصرف كده لحدت ما إتخرجوا ح يشتغلوا وين؟ أسمع كلامى خليك من مسألة التعليم دى خلى الأولاد يكبروا شوية وبعدين يترشحوا للبرلمان !
نفسك تسافر ؟ ممكن بس لازم تدخل ليكا صندوق وتشيل الصرفة الأولى .. إنتا عارف إستخراج الجنسية والبطاقة والجواز بى كم؟ خليك من تذاكر الطيارة (الفيها تصل وفيها تتحرق) فى المدرج قبل ما تقوم !
نفسك تغترب ؟ شيل الفكرة دى من راسك بأسرع ما يمكن .. هو مرتبك هناك ده (لو إشتغلتا) ح يكفى ال ح ترسلو للأسرة وللا الح تدفع منو للقسط بتاع الفيزاء وللا طلبات الأقارب والأهل والجيران وللا تجديد الوثائق والضرائب والمساهمة (الإلزامية) والزكاة وترعة كنانة والرهد وقناة الخرطوم ودمغة الشهيد و الجريح والغريق …وجاياكا كمان (دمغة الإنفصال) ؟
كسرة :
نفسك تموت وترتاح من الدنيا دى؟ إستمع لتصريحات بعض المسئولين من نوعية (أوروبا تستهدف السودان !) .. يعنى مش بلد بلدين .. لا .. (أوروربا كووووولها) تستدف السودان .. يعنى (قارة كاملة بى حالها) … أااخ يا مرارتي !!!
الفاتح جبرا 
السلام عليكم ، البرف الاخوان ، اريتكم طيبين ، يا برف سهل علينا شويه ، يعنى كل الاحلام الظلوطيه بقت صفر ، ما تخلينا احسن عيشين فيها شويه ، يا اخوانا انتو معاى تذاكر الطياره بقت لاى اتجاه ارخص كتير من الجنسيه و الجواز و تاشيرة الخروج و رسوم المغادره ، لكن ده كلو مابمنعنا نحلم بركوب اليخت الرئاسى ………. عجبى
البروف الفاتح ..
لاكين ما قفلتها عدييييييييل كدا على الشباب ديل .. نحنا خلاس عرفنا البينا والعلينا وما راجين خيراً فيها بعد كدا ..
المشكلة إنو الكلام دا كووووولو حاصل..وواقع مُعاش.
نفسك تحتفل بعيد ميلادك …ماتحمد الله انك اتولدت من اصلو وتروق فى الواطة دى .تخريمة .. يااخوانا انا نفسى الاقى الفاتح جبرا حد معترض؟
يا حاج السلاوي جبرا دا ما عارف حاجه ساي. قال ليك حكومة الأمازون بعد الانفصال حتفتح ليك للشباب ديل جنس فرص وجنس مفاجعات ، ما زمان كانت مقفلاها مغسه في الحركه الشعبيه.
موافقون . . يا نورا.
و حتلاقيهو زول منتهى الروعه ذي ما بيكتب.
أنا كنت مستغرب من كلام أحد طلابو في الجامعه عندما وصفه بالزهجان ! لمان قابلتو طلع جنتلمان.
السلام عليكم ، اخونا حاج السلاوى كيفنكم ، سائلين عليك من ما قفلت القمردينه ما سمعنا منك ، انا حردت امشى معاها الفيس بوك ، ماموافقون يا سنكل اصلوا لازم يكون فى معارضين ، ونحنا البزهجنا اكتر البرنجى !!!!! مسعولين من الخير اخونا ياسر ما وقع فى عينكم يا ………عجبى
الحبيب أبو ناجي
الأعزاء في كل مكان
سلام ومحبة وإحترام
دايرين وحدة بتاع منو ؟؟ ولي شنو ؟؟ أكثر من ستين سنة بلد ده ما عمرت كدي خلونا نقسمها يمكن تعمر ..دايرين حرية بتاع شنو ؟؟ وليه منو ؟؟ إنتو ناس بتاعين فودى كدة أحسن …دايرين تغيير بتاع حكم ليه ؟؟ وعشان منو ؟؟ يجوا ناس حُداد يبدأ فساد جديد ؟؟ خلبكم كدة مع جن تعرفوا ده وأحمدو الله إنكم عايشين…
كسرة بالشطة:
يعني يا جبرا لو قلنا نحن ما دايرين حاجة، برضو ما دايرين ليه لازم تدوروا أية حاجة إن شاء الله إنفصال ولا إنتحار ولا إنكسار ذاتو
الأحباء الأعزاء:
التحايا والود
منورين والله .. أجمل حاجة لمن ألاقيكم مجتمعين كده إنى بفتكر الزمن الجميل أيام القمردينة كانت فى بداياتا .. وكمان فى عصرها الذهبى .. فى أسماء كتيرة كانت أساسية لكن هسه ما معروفين وين أنا بتمنى إنو نشوفهم تانى بى جاى عشان حبات العقد الفريد تكتمل ..
كسرة سغيرونية :
نورا مصطفى .. مرحب بيك ألف مليون مرحب ولو معانا بى جاى (يعنى ما مغتربة وكده) على بالحرام أعمل ليكى رحلة مخصوص !!
سلام ياقبيلة،،،،
أبكرون ياسديقي أين أنت ، ألا تري أنهم يسألون عنك، وأنت الوحيد بالذات الكُنا دايرنك،،،،،
أنت يا أبكرون دحين ما ياهو ده ذاتو كلامك القلتو، غتس حجر أيملك!!!
نفسي أسجل أعتراض مع كوكو ضد سنكل….
خليتني ضاحك و مبتسم
الدنيا يا ناس تنقسم
وجبرا شايت في همومنا الم الم
والله حكاية الجرد قبل العملية دي بقت مهمة مرات قبل الخياته يخلوك بدون بنكرياس و مرات يخيتو الفشفاش بي برة…ههههه..والله حكاية …
يعني هسع اولادنا ديل نخليهم برلمنجية …لكن يا بروف البرلمان الجاي دا ما كووووولو وتني حتي زمان الحركة الشعبية محلياهو بالغلات شوية تاني النضم دوووت عليهو احسبو انهووو ..موافقون بالاجماع السكوتي….
الكسرة يا أستاذ الفاتح كسرة ما جاية في محلها أولا لأنو لو عايز تموت يجب أن تدرك أولا أنك حي ………. وهذا ترف غير متوفر لمن هم مثلنا ولكن بعضنا يعرف أنه ميت لأنه صار لا يتألم وكما قال الشاعر ما لجرح بميت إيلام ………….. إذا أنا ميت أولريدي فكيف أموت أكثر من الموت؟ وثانيا موش أوروبا بس …………. بل كل العالم يستهدف السودان ويستهدفنا أنا وأنت شخصيا …. وعشان ما تفتكرني من ناس الحكومة فإن أكبر المستهدفين للسودان هم حسن الترابي وو عمر البشير وذمرته……………. السبب في استهدافنا أننا ولدنا -أي تمت ولادتنا على ما اعتقد – مسلمين، ثم بلينا بمشايخ يتكلمون بخطاب أسامة بن لادن ولكنهم يهدفون من ورائه إلى عكس ما يهدف إليه أسامة فخسروا وخسرنا معهم الدنيا كلها ………… وأتمنى ألا نكون قد خسرنا الآخرة………… وأنت ذاتك تستهدف السودان عندما تجد في هذا الهوان
الكسرة يا أستاذ الفاتح كسرة ما جاية في محلها أولا لأنو لو عايز تموت يجب أن تدرك أولا أنك حي ………. وهذا ترف غير متوفر لمن هم مثلنا ولكن بعضنا يعرف أنه ميت لأنه صار لا يتألم وكما قال الشاعر ما لجرح بميت إيلام ………….. إذا أنا ميت أولريدي فكيف أموت أكثر من الموت؟ وثانيا موش أوروبا بس …………. بل كل العالم يستهدف السودان ويستهدفنا أنا وأنت شخصيا …. وعشان ما تفتكرني من ناس الحكومة فإن أكبر المستهدفين للسودان هم حسن الترابي وو عمر البشير وذمرته……………. السبب في استهدافنا أننا ولدنا -أي تمت ولادتنا على ما اعتقد – مسلمين، ثم بلينا بمشايخ يتكلمون بخطاب أسامة بن لادن ولكنهم يهدفون من ورائه إلى عكس ما يهدف إليه أسامة فخسروا وخسرنا معهم الدنيا كلها ………… وأتمنى ألا نكون قد خسرنا الآخرة………… وأنت ذاتك تستهدف السودان عندما تجد في هذا الهوان ما يبعث على الضحك والابتسام
انا مرقت منها واغتربت بس ماعارف ارجع عشان ما احلم احلام زلوط
البلد دي الواحد الا يعيش فيها مسؤل يفقع
مرارات الناس سااااااااااااااااااااااااي وهو يضحك
والمصيبة هو ذاتو ما فاهم الحاصل شنو
نفسى يا جبرا اعيش بره الخرطوم بدون ازعاج وبدون ناس
نفسى اصحى الصباح تلفونى مايرن ونفسى اكمل شغلى بدون ما الكهربا تقطع
ونفسى انوم بدون ناموسه ماتزعجنى ونفسى اصحى الصباح الاقى السودان بلد جديد وجميل ونضيف ومرتب ومليوووووووووووون ميل مربع ماتنفص شبر ولا رجعونا محل ما لقيتونا
ونفسى بتاع الحركة يرفع لى يده يسلم ويحينى مش يرفعها يوقفنى ويقطع ايصال يفسد على يومى
نفسى الشوارع تكون فاضيه ما زحام ولا دخان
وشارع النيل جميل بخضرته ونيله وخالى من القعدات وستات الشاى شاى اى
نفسى الماهية تكمل لنهاية الشهر والرصيد يقعد لنص اليوم
نفسى نفوس الناس تكون صافيه مش يطعنوا فيك وفى ضلك
كسرة :
نفسى اتحاد بلاانفصال وتعيش يا جبرا
ونفسى يا جبرا الله يديك الصحة والعافيه وتعيش وتكتب لينا ونعلق ليك
دمتم
و أنا يا ود الخلا نفسي تسجل إعتراض مع كوكو ضد فساد المؤتمر الوطني.
يا نورا ما تسمعي كلام ناس كوكو وود الخلا ديل ، دي حباً في مكاجرات سنكل ما اعتراض عليك.
ود الخلا دا إسمو كجراي القمردينه.
سلام ياقبيلة،،
سديقي اللدود سنكل، في دي أسجل أعتراض مع كل الحادبين الشرفاء ضد كل أنواع الفساد أيا” كان مصدره، فمحاربة الفساد ياصديقي واجب ديني قبل أن يكون مظهر دنيوي، وهنالك عمل دوؤب يجري بهمة ونشاط وتجرد ونكران ذات دون أي شوشرة أو ضوضاء، وستري بأم عينيك مايسُرك ياصديقي ويثلج صدرك ويشفي صدور قوم مؤمنين قريبا” جدا” أن شاء الله..
كلامك أعاد بي الذاكرة لأيام طيبات خلون بكل جميل وصادق ونبيل في ماضي زمان القمردينة الزاهي الجميل،،،،،
لك التجلي والتقدير والأحترام..
تتذكر مرة ياسنكل صاحبك نيام مرة تكلم عن واحد من دفعتكم في الحلة كان جنو مشاكل ولبطنجي كان اسمه منو؟؟؟؟
لا زلنا نتساءل ونسأل عن بقية العقد الفريد (أبكرون، بشار، محنك، التلب، ودمدني، محمد دبي، أب أحمد، سهيل، أفليقا وبنات القبيلة المختفيات)
يا جماعة الخير الحاصل عليكم شنو مشغولين مع تقفيل الحسابات السنوية والجرد ولا شنو؟؟؟
قبل فتره وجيزه يا ود الخلا زارنا هنا زميل دراسه وصديق قديم ( مؤتمرجي) ، وتناقشنا كثيراً في هدؤ في كثير من الإمور ، الانفصال والوحده ، أمريكا ، الفساد و الظلم ، التزوير. وكان متفقاً معنا في كثير من الإمور فالرجل أعرفه ذو خلق ودين ، بدليل إتو يحتل موقعاً حكومياً مرموقاً ولكنه لا يملك بيتاً بعد و يسكن بيت الحكومه. الرجل قال نفس كلامك دا. إنو الإصلاح من الداخل في الطريق وقريب جدا.
تذكرت قصه حكاها لي واحد قريبنا من الشايقيه. قال في فيضان 88 طبعاً الفيضان دمر البلد تماماً. قسافر البلد ولما وصل وجد عمه جالساً على حطام بيته وينكش في الأرض بعود. فسلم عليه فرفع العم رأسه ، أردف صاحبنا :
الله بعوض يا عمي.
أجاب العم عيلي قاسي يا ولدي.
كسره:
ما في شئ صعب عليك يا الله.
أخونا كوكو .. تسال عليك العافية والأيام الطيبة..والله ليك وحشة شديدة ..نحن بخير والحمد لله ..النفس طالع ونازل زى ما بيقولوا .
ويسمع منك ربنا يا سنكل ..وتنفرج على الشباب ديل ويتنفسوا شوية .. ولو إنهم فى حاجات ما مقصرين فيها
ما شايف لى زول رحب بالأخت نورا مصطفى .. وما فى زول سألها عن موقعها الجغرافى ..ولا نسيتو الإجراءات دى يا عزت ؟.. على أى حال نيابة عن البروف الفاتح والإخوة صفوة الأخيار نتمنى ليها إقامة طيبة .. وكونو البروف وعد برحلة على شرفك دا يعتبر تكريم كبير ..بس نحتا إتكروتنا المرة دى فى الرحلات ..
رجان:
ياخي و الله طموحاتك كلها مافيها استحالة بس برات الامزون…
ودالخلا:
زمان كنت بقول لاولادي ما تسمعوا التلفزيون لانكم حترقدوا تنوموا علي اساس انكم في
دولة من العالم الاول و حقوقكم محفوظة والبلد تحمد الله بي قانونها لا فساد لا استبداد..
اليوم عممت عليهم نشرة قلت ليهم ما تسمعوا كلام التلفزيون و ما تسمعوا كلام ودالخلا…
سنكل:
ملياردير مشهور خليك من اسمو ماسك الجريدة بالقلبة ..واحد قال ليهو تقرا في الجريدة بالقلبة ..قال ليهو لا لا انا والله متضاري من وجيهك دا…
كسرة سنكلية:
مؤتمرجي نديف معناها نديف في اللهطي…يعني ما بتمسك عليهو شئ… يتسرت منك زي السبيبة من العجين…اما ندافة حقت زمن الدراسة ديك انسا ياعم…
و الله يا نيام أنا ظاااتي قلت كدا.
لكن أرجع أغالت نفسي في إصرار أقول يمكن أنا الما جيت.
الله يرحمك يا خليل اسماعين . . عشت فقيراً و مت فقيرا ، ولكنك كنت محسناً لمن هو أفقر منك.
سلام ياقبيلة،،
الأخوان سارة (نيام/سنكل)، الحصل في البلد دي فعلا” يجعل الأنسان يشك كثيرا” حتي في أقرب الناس أليه، ولكن أحسان الظن بالآخرين مطلوب بل ومن الدين يا أصدقائي الكرام وعلي أقل تقدير أن نُحسن الظن بمن نعرف، وخصوصا” ياسنكل أن من ذكرته بأنك تعرفه حقيقية” وحتي اليوم لا يملك منزلا” وهذا أبسط شيئ يمكن لموظف حكومي كما يقول نيام (أحسبوني) يمكن أن يمتلكه، وأعتقد أن هذا الانسان من أولئك الصادقين النادرين الذين نعول عليهم كثيرا” في عملية الأصلاح المرتجاة قريبا” كما ذكرنا آنفا” وأكدها لك صديقك وأظنه يكون هو الصادق ياسنكل!!
نيام ياصديقي ماكنت لأحسبك تفقد ثقتك فيني لهذه الدرجة، وبهذه السرعة فلا زلنا في أول المضمار وأعني به مضمار سباق الأصلاح الذي توقعناه أن يكون قريبا” فأقله أن تعطيني فرصة، وبعده عمم من النشرات ما شئت ولمن شئت ولكن من غير أن تظلم أحد بأنه كاذب أو يقول ما لايعلم أو يهرف بما لا يعرف!!!!
غفر الله لنا ولكم ولكل من له حق علينا..
العزيز الفاتح
الأعزاء جوة وبرة أمازونيا
سلام ومودة وإحترام
سنكل وود الخلا يعني عاوزيننا نتحلى بالتصديق ونأمل في إصلاح يأتي من الداخل وقريب جدا كمان، طيب بعد خراب مالطا، وحيجيبوا منو؟ ويبدأ من وين ؟ وتيب الحيفضل منو ؟ ولأبدأ من حيث إنتهى نيام، إذا كانت ثقافة الفساد إستشرت وبتنا على الأقل فالحين في حاجة على مستوى الكوكب وصرنا من قوى الفساد العظمى في العالم دايرين ترجعونا لي وراء مالكم؟!، مافي أحلى من التفاؤل والأمل لكن يا قبيلة الشغلانة دي مخستكة لدرجة قف، ومافي طريقة إلا نمسح الواطة ونبدأ من جديد !!
كسرة بموية أم جنقر:
يا قبيلة عاوزين ثورة إنقاذ على فورة الإجهاز من بكان القهوة لو أمكن ههههههه
الأمير مُخير ودملوك القبيلة حبابك والجابك يجيب عقابك،،
صدقني يامُخير صاحبك سنكل ده زاتو برغم قناعاته وثقته الكبيرة في صديقه وأنه كما قال بعضمة لسانه (فالرجل أعرفه ذو خلق ودين) ألا أن نيام طرطش ليهو ثقته في صديق عمره وجعله يتراجع عن قناعاته وهذا لعمري اكثر ما نخشاه من أولئك الذين يثبطون الهمم وينفخون في النفوس روح الهزيمة والأستسلام،،،،،
ونحن علي علم يقين بأنه وعلي مرّ العصور والتاريخ وعبر تاريخ الأنسانية منذ أن خُلقت البشرية في عهدها الأول وحتي قيام الساعة يوجد في البشرية فساد ومفسدين، يزيدون وينقصون حسب صدق وتصديق، أو صلاح وأصلاح وأيمانيات الناس الموجودة، وبالتأكيد أولئك الذين يعالجون المجتمع ويعيدونه لجادة الطريق لم يأتوه من الخارج أو من خارج الكون، فهم من صميم صُلب هذا المجتمع الفاسد ، ولنا في حديث المصطفي عليه أفضل الصلاة وأتم التسليم في قولته المشهورة التي تمضي تصك الآذان البشرية الي قيام الساعة والتي كانت عقب نهاية رحلة الطائف على ما نعلم من صدود أهلها عن دعوة النبى الكريم لهم و مبالغتهم فى آذاه ” صلى الله عليه و سلم ” ، ففى طريق العودة إلى مكة ، عرض على النبى منهجان لإحداث التغيير فى واقع الأحداث ، يتضح أولهما هكذا : فعن عائشة رضي الله عنها زوج النبي صلى الله عليه وسلم أنها سألت رسول الله صلى الله عليه وسلم: هل أتى عليك يوم كان أشد من يوم أحد؟ قال: «لقد لقيت من قومك ما لقيت، وكان أشد ما لقيت منهم يوم العقبة، إذ عرضت نفسي على ابن عبد ياليل بن عبد كُلال فلم يجبني إلى ما أردت، فانطلقت وأنا مهموم على وجهي, فلم أستفق إلا وأنا بقرن الثعالب فرفعت رأسي فإذا أنا بسحابة قد أظلتني فنظرت فإذا فيها جبريل فناداني فقال: إن الله قد سمع قول قومك لك وما ردوا عليك، وقد بعث الله إليك ملك الجبال لتأمره بما شئت فيهم، فناداني ملك الجبال، فسلم علي ثم قال: يا محمد فقال: ذلك فيما شئت, إن شئت أن أطبق عليهم الأخشبين».
فقال النبي صلى الله عليه وسلم: «بل أرجو أن يخرج الله من أصلابهم من يعبد الله وحده لا يشركُ به شيئًا»
كان مقترح ملك الجبال أن يطبق عليهم الأخشبين, وهو يدخل تحت أسلوب الاستئصال، الذي ينادي بهم الناس الآن بتطبيقه، ولنا في رسول الله صلي الله عليه وسلم أسوة حسنة لمن كان يرجو الله واليوم الآخر، وهذا هو قمة التفاؤل الذي نتمناه وونادي به، ونتمني أن يعيشه سنكل وجبرا والآخرون دوت كوم….
انا يابروف مرتاح كدة مانفسى فى اى حاجة — لااصلاح من الداخل لاسفر — خلونا فى فولنا ودكوتنا ومكوتنا البتكوى فينا دى – وصدقونى لو حصل اى اصلاح من الداخل والداخل دى تعنى من داخل المؤتمر الوطنى دة بيعنى انهم صلحومن الداخل عشان يظبطو حاجة فى مصلحتهم مالينا نحنا — كسرة —
قرن شطة كانت له شقيقة وهى صغيرة فصيحة خالص – كل يوم ابوها يجيبا من المدرسة تقول ليهو والله ياأبوى نفسى فى قزازة بيبسى ويشترى ليها لما الحكاية كترت قال ليها والله انا نفسى ادخل نفسك دى فى قزازة البيبسى واقفلا عليها —
وأنا يابروف نفسي أكتب الكلام الما انكتب (لاكين) مقطعو في مصاريني.
أبكرون : مويت النيل كيف؟ههههها…… في واحد ظريف معلق في موضوع ساخر سبيل الفات (مشروع حزمة مواسيرالدعم المتكاملة) اسمو Katmt إكون جابها من وين؟؟؟
الحبيب الباشمهندس ودالخلا
ســـــــــــــــــــــــــــــــــــــلام
قلت فى نهاية مداخلتك (ونتمني أن يعيشه سنكل وجبرا والآخرون دوت كوم) …. تقصد (التفاؤل) .. ياخى حاجه واااااحدة بتخلى الزول يتفاءل فى هكذا وضع مافى .. أديك مثال بسيط ياخ .. أنا قبل كده كتبتا مقال عن ديوان الزكاة وكيف إنو دفع مبلغ 50 ألف دولارررر لقناة فضائية كدعم .. والقناة ذااااتا ما إتعملت ..وأمين الديوان قال القروش دى الله يسألنى منها يوم القيامة (تصور) .. والقروش ليها سنين عند الزول صاحب القناة .. أها القروش لحدت هسه لا حس لا خبر .. وديوان الزكاة بدل ما يرد على كلامى ده رد عن حاجات بره الموضوع فكتبت مقال (سياسة بسمارك الخارجية) وبرضووو عملوا نائمين .. أها ده مال الله بياكلوهو عينك يا تاجر .. وأمين ديوان الزكاة قاااعد فى بكانو ولا فى زول سألو ولا شالو .. أها ورينا بالله يا ودالخلا الإصلاح ده يجى من وين؟ ولو مافى زول بيغير على مال الله البيمشى سااااكت كده فى غير مصارفو التفاؤل يجى من وين؟ ياخى فى أسوأ من كده !!……….. ما ظنيت
و ناس سوداتل يا جبرا أقصد يا ود الخلا . . ناس سوداتل عملو الجمعيه العموميه ووزعت الأرباح السنويه من شهر مايو الماضي ، ولى يوم الليله ناس الأمارات المساهمين من عرب وعجم وأمازونيين يساسقو على بنك النيلين فرع أبو ظبي و قروشهم ما و صلت ! ! البنك يقول أسألو سوداتل و سوداتل تقول أسألو البنك. يا ربي البقلب بيها لي يوم الليله دا منو؟ يكون واحد مريخابي أقصد إتحادي واللا يا ربي يكون ( وطني ) إتحادي بس أكيد ما ( مؤتمر وطني ) متنفذ.
ويقول ليك جذب الاستثمارات الأجنبيه !
هوي يا ناس أنا ما موافق مع ود الخلا ننتظر الاصلاح من الداخل ! بقول ليهو سمعنا من ناس الوطني ومنو الكلام دا و أريتو يحصل ! ربنا ليهو معجزات.
نفسي القي نفسي
واعرف انو السودان بلدي
واني محترم في بلدي
والمسؤل بيعمل وهو عارف انو بيعمل في املاكي
وبيديرا لي ولمن يغلط بكل ديمقراطية نطلعو برا
موش اي مسؤل عامل فيها انو البلد دي حقتو
ويقطع زي ما عايز مرة بالشوكة والسكين(ودي راااااقده قلع مقنن)
ومره قلع كييييييييري ساااااااااااااااااكت(فجاتن كدة تلت البلد يمرق منك برة)
ســــــــــــــــــــــــــــــــــــــــــلام حبيب الكل جبرا وسماره الكرام،،،،
فعلا” بقصد (التفاؤل)، وهو في حاجة فاضلة غير أن الناس دي تتفاءل وتؤمل في ربها الخالقها أن يجعل لها من كل ضيق مخرج وتفريج هموم وكشف غموم، (وبيني بينك الكلام الذي ذكرته عن تلك الأموال التي دفعت في القناة المزعومة يستحق التحقيق والمساءلة والعقاب بأقسي عقوبة ممكنة أذا ثبتت صحة هذه الأتهامات، فهي شيئ أبعد من الخيال وأغرب مما يتصوره عقل مسلم حقيقي لا تُصدق!!!!!).
وعن التفاءل نقول أننا نقتدي برسولنا وحبيبنا محمد بن عبدالله عليه من ربه أفضل الصلوات وأتم التسليم فهو القائل في الكثير من الأحاديث والمواقف النبوية المباركة التي تحض على التفاؤل وتدعو إليه؛ من ذلك قوله -صلى الله عليه وسلم-: “من قال هلك الناس فإنه أهلكهم”؛ ففيه تحذير من إشاعة روح التشاؤم بين المسلمين، وقال -صلى الله عليه وسلم-: “الخير باق في وفي أمتي إلى يوم الدين”. فالأمل والتفاؤل ممدود في أمة الإسلام إلى أن يرث الله الأرض ومن عليها، ولعل من أعظم التفاؤل أن ينتظر الرسول -صلى الله عليه وسلم- الجيل الثاني من أهل الكفر لعل الله يخرج من أصلابهم من يعبده ويوحده، كما جاء في الحديث المذكور في مداخلتنا وردنا علي الأمير مُخير وصديقه سنكل، كذلك تتمثل قمة التفاؤل في حديثه صلى الله عليه وسلم الذي يقول فيه: “إذا قامت الساعة وفي يد أحدكم فسيلة فليغرسها”.
بعد ده كلو أفلا يجدر بنا أن نحسن الظن بالله ونتفاءل خيرا” بانه سيغير الاحوال التي بنا بعد أن نُغير الحال التي عليها نحن أولا”، وفي ذلك يقول الحق جلا وعلا في محكم التنزيل في سورة الرعد في جزء من الآية 11 (ان الله لا يغير ما بقوم حتى يغيروا ما بانفسهم )، وتفسير هذه الآيات وشرحها هو أن سنته جرت أن لا يغير ما بقوم من الأحوال حتى يغيروا ما بأنفسهم من الحالات الروحية كأن يغيروا الشكر إلى الكفر و الطاعة إلى المعصية و الإيمان إلى الشرك فيغير الله النعمة إلى النقمة و الهداية إلى الإضلال و السعادة إلى الشقاء و هكذا، هذا والله تعالي أعلم….
البروف
سلام
انا يادوب لقيت المحلة دى ، طبعا اخوك نظام مخو تخين ومشتت الافكار وكده ….سوف نتواصل اذا ربنا مدا فى الآجال….
ود الخلا سلام عليك . .
شايفك . . كده بدون تعليق على سوداتيل وما أوردته في مداخلتي السابقة من نصبها على المستثمر الأجنبي ، و كأنه أمر غير استراتيجي في جذب الاستثمار الأجنبي
جعل الله المانع خير.
السلام عليكم ، اخونا السلاوى حبابك عشره ما كشره ، د/ ياسر ما شوفتو ؟ اخونا ود الخلا انا متراجع و ساحب الاعتراض بتاعى ، انت ما شايف البرف حالف ونحن ما بنرضى الانبر ليه قسموا !!! وحرم انا على خروف عشان تانى سديقك اللدود سنكل ما يجملنا فى قائمة المعترضين ، لكن برضو المعارضه جاريه معانا ، تمباك ولا برنجى ……..عجبى
جبرا العزيز..اقول شنو اكتر من القلتو ..مرسى مية مرة وانا بدعوكم كلكم لرحلة فى كسلا (موقعى الجغرافى) بس. وياسنكل …كوكو وود الخلا ديل خليهم على فى الرحلة ويا أحمد السلاوى بشكرك كتير على الترحيب مع انى قديمة واللة انا قاعدة فى السودان دا جنس قعاد يحيرك!!!
سلام ياقبيلة،،
كوكو سجلت أنسحاب تكتيكي من أعتراضك، حسنا” فعلت، أما أنا يا ابنة القاش إن سرى الطيف
وهنا واعتلى هائما فكيف لحاقي؟؟؟؟
وكسلا دي ياها بالحق جنة الأشراق!!
سلام ياقبيلة،،
يا ابنة القاش هل تراجع كوكو حقا” وسجل انسحابا” تكتيكيا” من اعتراضاته ؟؟ حسنا” فعلت يا كوكو، أما أنا فإن سرى الطيف وهنا واعتلى هائما فكيف ياكوكو سيكون لحاقي؟؟؟؟
سلااام الحلوين كوووولهم
ود الخلا اخوك موجود بس زنقه بجااااي والله يعين وشكرا للتفقد
انا الفي نفسي معروف للجميع اصحي والقي الجماعة ديل راحوا في خبر إن….وزي ما قال شعبوله : (بس خلااااص)…
بشا ر : يا حليل ناس (كتمت) و (طيارة جوبا) …وووو ولا تثير الشجون يا (ذاد الشجووووون)
نورا : ما تنسي تعذمينا رحلة كسلا …تحياتي للمرغنية (ما يخصك يا ود الخلا يا دبييييب)
كوكو : د.ياسر ما عارف الموقع فتح بي جاي حاكلمه ان شاء الله لاني قريب بهنا …..
أخونا ودالخلا
شنو حكايت لو ثبتت هذه الإتهامات .. أقول ليك الأمين العام للديوان صرح فى الجرايد وقال أيوه دفعتا الأموال دى يقصد الخمسين ألف دولار لى الأخوان عشان القناة ولمن سألوهو عن مصير المبلغ والقناة ذاااتا ما إتعملت قال ( القروش دى ربنا بيسألنى عنها يوم القيامة) .. قمتا أنا عملت المقال وكان عنوانو (قبل القيامة) وقلتا ليهو عاوزين قروووووشنا دى هسسسسسع قبل القيامة !!
أها مافيش زول من جماعة (الإصلاح) من الداخل البتتكلم عنهم ديل سألو عن المبلغ ده مافى !!!
سلام للقبيلة،،،،
صديقي جبرا ما تور نفسك ياااخ، وأثبات الأتهام في مواجهة المتهم هو شغل عدالة قضائية، فالمتهم كما تعلم ياصديقي برئ حتي ثبوت الأتهام، ونحن ما دايرين نظلم أحد ولو بحكم من غير تنفيذ، ومن ينادي بتطبيق العدالة بين الناس عليه أن يتوخاها في نفسه، وحكاية (لوثبتت هذه الأتهامات) من باب العدل والأنصاف، بالرغم من علمي ومعرفتي بصحة هذه الأتهامات، ولكن القاضي لا يحكم بعلمه أو بمعرفته بل بما يتفحصه من بيّنات وأدلة وبراهين تُقدم له علي منضدة العدالة وميزانها العادل ليحكم بالعدل،،،،
هذا ما أردت بيانه من مداخلتي تلك، وليتك تصبرعلينا شوية وستسمع وتري جماعة الأصلاح (from within) ديل حا يعملوا شنو؟؟؟؟
أتمني أن تكون طالعت تصريحات الدكتورة مريم الصادق في صحيفة آخر لحظة عن نفس تعليقك هذا!!
أبكرون وأنا كمان تحياتي للسواقي التي هاج الأسي أنينها، وحرّك أشجاني نغمُ الساقياتِ!!!!
رحم الله الشاعر توفيق صالح جبريل وطيّب الله ثراه..
أخونا ود الخلا .. ياخى قاعدة قانونية (الإعتراف سيد الأدلة) والراجل معترف وما ناكر أها تانى إثباتات شنو ؟!
سلام ياقبيلة،،
صديقي البروف جبرا، ما دام الموضوع فيهو أعتراف وكدة يكون الموضوع (نجيض تب) ، فقط المطلوب مننا كمواطنين أصحاب حقوق مهدرة ومُضاعة، أن نتحرك لأحقاق الحق ورد المظالم قدر الأستطاعة لأهلها، نعم الموضوع ليس سهلا” كما يقول صديقنا سنكل كونه (جمعية أو صندوق خيري)، ولكن لن يضيع حق وراءه مُطالب، وأقترح علي الأخوة في مجموعتنا هذه أن كان من بينهم رجال قانون أشداء في الحق ولا يخافون فيه لومة لا ئم، وحتي لا نحرث في البحر فعلينا ان نقوم نحن بأنفسنا بتوكيل مكتب محاماة لرفع دعوي قضائية أمام القضاء السوداني النزيه ضد أمين ديوان الزكاة الأتحادي نتهمه بتبديد أموالنا بتوزيعها في مصارف لم تكن مضمنة أصلا” في قانون الزكاة وبالتالي يكون قد خالف اللوائح والقوانين، ونطالب برد هذه الأموال للخزينة العامة والتي هي خزينة الشعب والذي هو أولي بها لحاجته لها شرعا” وقانونا” وعُرفا”….
فهل هناك من مثني ومستعد للدفاع عن حقوق المساكين ودفع المظالم ورد الحقوق؟؟؟؟
القضيه المتوره نفس جبرا دي يا ود الخلا فرصه طيبه لاختبار مقدرات جماعة ( الإصلاح من الداخل ) حقو نحول ليهم الملف بتاع ديوان الزكاه دا ، أهي جاتك علي الطبطاب.
يلا ورينا همتك.
الحبان سلام ومودة وإحترام
يا قبيلة قلت هل هناك من مثني ومستعد للدفاع عن حقوق المساكين ودفع المظالم ورد الحقوق؟؟؟؟
هي جنس مظالم إيييييييييك وكُتر مظاليم إيييييييييك بالملايين، وجنس قضايا إيييييييييك حتشكي لي مين؟؟ وحتخلي مين؟؟ وحتقول شنو ؟؟ ولي منو؟؟
كسرة باللبن:
تعرف يا ود الشيخ موضوع الإصلاح من الداخل اللي عشمان فيه ده فكرت فيهو وحيرتني حتة الداخل دي وما لقيت ليها حل إلا يكون من داخل الضمير، يا ربي ضمير منو البشير ولا الوزير ولا الزير هههههه
غايتو يا سنكل ومخيّر حيرتوني معاكم ما عرفت أضحك ولا أبكي، أقول لكم فلنبدأ الأصلاح وليكون من الداخل تقولوا لي داخل منو وخارج منو ؟؟؟
ما من دواخلنا نحن يا جماعة ، سنكل ده ماذكر التغيير، وكيف يمكن أن يكون، ولابد له ان يبدأ من النفس ليتم التغيير الأكمل والأكبر بعد أن نُغير ما بنا، ولا أنت يا سنكل ماكنت قاصد كدا؟؟؟
علي العموم نحن جاهزين لكل عمل جماعي خالص لوجه الله الكريم ، ولكن أن نعمل كما قالت بنو أسرائيل لموسي عليه السلام ( قالوا يا موسى انا لن ندخلها ابدا ما داموا فيها فاذهب انت وربك فقاتلا انا هاهنا قاعدون) المائدة آية (24)، فهذا ليس من شيمتنا يا سنكل!!
هو لسه الناس ليها نفس تتمنى يابروف ….. غايتو يكون بتتمنى انها تقدر تتمنى ….. انا غايتو عايز نشرة أخبار من غير مايكون فيها خبر عن استهداف السودان من العمالة الخارجية ….. لك الله يابلدى الضعيف
السلام عليكم شباب ………….. السلام عليكم استاذنا الفاتح جبرا ………….في البداية كدي نقرا مواضيعكم ونعقب عليها انشاء الله………….. لكم تحياتي اصدقائي الكرام