وصلتنى هذه الرسالة من ( د. سارة) طبيبة إمتياز ، أقدمها لكم كما هي دون أى (تعليق) :
هى بضع كلمات من جمله خاطب بها احد الاخصائييين بمستشفى ……………… مجموعه من الاطباء العموميين فى قسم الجراحه معايراً إياهم بكثرة أعداد الاطباء الذين يتمنون القليل مما اتيح لهم وهى (فرصة العمل).. حتى تكتمل الصوره دعنا نسلط الضوء على الجمله كامله وهي :
“انتو شن طعمكم و شن نغمكم الزيكم آلاف فى البيوت متمنيين يشتغلو”
الكلام الدراب دا إتقال فى اللقاء الصباحى للجراحيين “يعنى بحضور مشايخ الجراحه ومباركتهم”… الحقيقه إنو العطاله “بنبذو بيها” ودا موروث شعبى معروف لكن دا لما كان العواطليه فى الحله بتعدو على الاصابع ” هسى زى الآلاف دي يلقو ليهم اصابع وين ذاتو” لكن لما تتعكس الايه يبقى احسن نشكر الشغال ونسكت..
ما علينا ماااااا علينا لانو العطاله دى بحر كبير كان دخلنا ما بنمرق منو.. العلينا الطبيب اللى يمكن دخل الكليه وإتخرج جراح من النوع أبو طعم ونغم غير شكل! يعنى المستفز فى الموضوع إنو هذا الأخصائى تكلم فأسمع و تعدى ولم يابه لصغيير أو كبير ,, وجلجل بكلماته فى تلك القاعه فأنتقل صداها زي ما كان عايز وأكتر فلم تحصرها حيطان القاعه وطرف السوط هبشنا, هبشنا مجندين متبطرين على نعمة التجنيد, هبشنا مجهجهين بين المراكز و المستشفيات,, هبشنا فى قعدتنا فى بيوتنا راجين التلفون المحل ما مشينا ختينا ورقنا أديناهو ليهم وقالو لينا بنتصل بيكم وأتارى التلفون ما فيهو حراره.. والله المرحوم (القذافي) ما كان براهو القاعد (يهترش) و(يلخبط) ويقول كلام (بره من راسو) عينتو كتار بس ربنا من كرمه حصر دائرتهم…شيخ الجراحين والحمدلله لم يجانبه الصواب فالوظيفه دى الجميله المستحيله بس السؤال الدكاتره ديل الشال طعمم ونغمم منو؟!!
منو ما بعرف سوء معاملة المرأه ولا سوء معاملة الطفل وغيرها من المعاملات الخارجه عن العرف والقانون لكن اليوم نشهد عصر سوء معاملة الطبيب ومن اقرب الناس و فى مخيلتنا كنا فاكريين إنهم فاهمين معاناة الطبيب لكن للاسف المعادله طلعت ضاربه …. لو عايز تتعرف على نخب الاطباء الحكايه واضحه صغارهم من “الامتياز و النواب والعموميين” يقومون بتأدية كل المهام ويحصدون اقل الثمار و زياده عليها اجمل عبارات الثناء و التشجيع من كبارهم الاخصائيين وانا عشان ما اظلم الاخصائيييييييييين حاقول كلهم بيسيئوا معاملة صغار الاطباء إلا من رحم ربى … يا جماعه (سوء معاملة الطبيب) حاجه زى المقرر تقراهو تقراهو وعمرك ماتنجح فيو ,, ما عارفه يعنى زمان فى الجامعه لما الواحد يتمهزل فى (الراوند) كان بيحس انو الدكتور دا لئيم و كعب و شرير لكن اتخيلو اتاريها كانت جرعات تطعيم و البحصل فى الامتياز وبعده دى كلها جرعات تدعيميه ,, فكلام انهم شريرين دا مبالغه لا ياخ الاخصائى دا زى ابوك بيعدك لمواجهة المجتمع! ولما اخصائى يقلع حزامو لطبيب إمتياز دا نوع من التوجيه الابوى ماتزعل دايرين مصلحتك المجتمع قاسى لازم تتحصن! ولما اخصائى يشهر بيك قدام العيانين دا بيحصنك لانو الحيلاقيك فى المجتمع اكبر! وتجى تقيف تدى العيان التعليمات يديك عين وانت فاهم وانا فاهم لسان عين المريض بقول شنو “دكاترة الإمتياز ديل عارفنهم ماعارفين حاجه” … ومن اسقط هيبة الطبيب إلا طبيب زي أبوه …. والله فترنا اي زول يعمل حاجه يقول زى ابوكم الاخصائى ابونا و زير الصحه ابونا والوالى ابونا و الرئيس ابونا انا أبوى واحد والتانى سيدنا أدم عشان كده حقو كلو مسؤول يقوم بمسؤولياته وشماعات الأبوه دى لا مكان لها من الإعراب البينا و بينكم حقوق واجبات يكفلها القانون ما بر وطاعه تكفلها صلة الرحم …. أما معركتنا مع المجتمع المما وعينا ونحنا بنستعد ليها دى أعملو ليها إتفاقية سلام وأرحمونا…
كسرة :
ما رضيت الهوان لنفسى يوما ولكن علمونا فى هذا المجال انه ” كلما إتكسر خاطرك قوى عودك”
كسرة ثابتة :
أخبار خط هيثرو شنو؟
الفاتح جبرا 
السلام عليكم ، البرف و الدكاتره ، طول عمرنا نمشى الشفخانه و الاسبتاليه مجانى و يكتب ليك روشته للاجزخانه يا يديك حبوب ولا سفوفه ولا يقول ليك جيب قزازه ويكب ليك فيها دواء سائل ، وكان خلاص يرقدوك و يعملوا ليك عمليه ، ما سمعنا بى تشخيص غلط و لاشفنا قطن وقماش ولا حتى مقص نسوه جوه بشر ، ومرات افركوت و لا رباط جزمه ، يا الدكاتره من الوزير لى المتخرج الليله ، راعو الناس ، لكن انتو طالبين الناس يراعوكم ، ما اهو مصطفى عمل عمايل و واحد جاب خبره مافى ، ونحنو نكتب بخرات نعمل محايات ، حجامه ، دعوات ، كله كله كله ، سؤال استشفائى : اخبار ناس غسيل الكلى شنو ؟؟؟ …………. عجبى
سلام ياقبيلة،،،
بالله يا كوكو إنت من زمن الشفخانة و(الإستبالية)، والبنسلين يا تمرجي ونادو الحكيم يا تمرجي!!
وتجي تقول لي نحن مالنا، والقدامي قالوا ليك شنو؟؟؟
بالله عليك هل سألت نفسك لماذا نحن هكذا وأنتو كدا ونحن أصبحنا كيف؟؟؟؟
الأخلااااااااااااق يا صديقي فإنما الأمم الأخلاق ما بقيت فإن هموا ذهبت أخلاقهم ذهبوا…
الله يستر علينا ويغطينا من الجايينا..
و الله بالجد حتت زي ابوك و الزول دا قدر ابوك دي في مجتمعنا بتستبيح حاجات كتييييير. مع انوا توقير الكبير دي حاجة جميلة و غاية في النبل و كلنا الى كبر لكن هذا الحق له واجبات الا وهية رحمة الصغير. مثل ما وقر هذا الاخصائي الكبير وجبت علية رحمة الامتياز الصغير بتعزيز ثقته بنفسه. امكن المسييييخ دا يوم من الايام يعمل المقدرت ليو انت
السلام عليكم يا اخوانا واخوتنا
واستاذنا الموقر جبرا/ة
قبل ايام زوجة اخوي جات من البلد عيانة عندها جلطة في الرئه من خمس سنوات قمتا مشيت معاها لمركز كبير جوار حوادث الخرطوم , بتاع الاستقبال قال لينا دايرين تقابلو ياتو اختصاصي قلت ما عارفين قام حولنا للحوادث (المركز) دخلنا الحوادث لقينا تلاتة بنات وولد وبعد السلام قلتا ليهم عندنا مريض بعاني من جلطة في الرئه وما عارفين نقابل بيهو ياتو دكتور البت قالت لي عرفتا كيف عندها جلطة قلت ليها حسب تشخيص الدكتور هناك ومعاها كل الاوراق وروشتات الادوية التي قاعده تستعملها , طيب جيب لينا المريضة , جات المريضة , ولاحظت الاسغراب في عيونم , قالت لي دي العيانة قلت ليها اي. خلاس تقابلو دكتور ……………… دفعنا 120 ج للمقابلة بعد الفحوصات بـ 280ج ورجعنا للدكتور وكانت المفاجأة انو مافي جلطة ولا غدة ولا يحزنون وبعد حوار طويل مع الدكتور قال ما عندها اي حاجة واوعك من الاسبرين نهائي وكتب لينا مسكن بـ18ج .
واصبت بدوار وما عرفت اعمل شنو , طوالي اتصلت علي اخوي وقلتا ليهو من دربك دا امشي القسم وافتح بلاغ في الدكتور والمستشفي القالت انو زوجتك دي عندها جلطة وشرحت ليهو الحكاية وانشاء الله ما بنخليهم خمسة سنوات تبلع في الاودية وهي الحبة دي ما عندها , دكتاترة اخر زمن , والله الكلام دا حصل قبل شهر والعيانة رجعت البلد زي الما كان في شئ………….. لكن ما بنخليهم
ناس الامتياز يمتعون
ما فى طريقة يقللوا من خريجى الطب؟؟؟ يعنى زى تحديد النسل فى الصين؟
اخبار البنية شنو؟؟
د. سارة .. عجبني ليكم والتسوي كريت تلقا في جلدا .. امانه يا دكاترة الامتياز ما قاعدين تنهرونا وتهزئونا نحنا مرضي ومرافقين ..
استحملوا بكرة تكبروا وتترقوا من استفزازنا لاستفزاز ناس الامتياز الجايين ده حال الدنيا ..
الطبيب اسقط هيبته منذ صار يذهو بانه طبيب ومنذ تحول الطب من مهنة انسانية الي مهنة ربحية .
آسف لكن ما نراه من اطباء الامتياز والعموميين في الحوادث يجعلنا نفرح ان وجدنا من يأخذ لنا حقنا حتي لو كان التصرف خطأ .
البروف والاخوان..سلام…
زمااان فى مدنى اطباء الامتياز اتضامنوا مع النواب فى قضية ما واعتصموا ,,جاهم جراح كبيييير وكان مدير المستشفى قال ليهم : انتو عاملين غلبة مالكم ؟؟انتو disposable وباكر بيجوا غيركم !
شفتوا قلة ادب زى دى !!؟
لكن انا مبسووط من البحصل دا برضك لانو الاخوة الاطباء ساكتين على الظلم والقهمر وعمالين يشتغلوا تحت امرة هؤلاء الرجرة والدهماء والغوغاء الذين لا يفقهون قولا ولا يخافون فى مؤمن ذمة او عهد..
طوبي لزمن اصبح فيه الطبيب تاجر جملة وقطاعي – و اصبح فيه الوزير جلابي كبير
و شرطي المرور همباتي – و المواطن المريض يعاتي
و الله يرحم ناديه بنت عمتي التي ماتت هي و جنينها لخطاء طبي
و الله يشفي خالتي مريم التي بترت رجلها لخطاء طبي و تشابه اسماء و هي لا تدري و كانت مخدرة
و الله يعين و يغفر لعمي الدكتور حسين الذي يترك صلاة الجمعة عمدا في مرات كثيرة و كثيرة جدا ليكمل كشف المرضي اللي عنده و سبحان الله بعدما اكمل فيلته 3 طوابق بالمعمورة مرض هو نفسه و ضربوا السكر
و بخت و حظ ولد عمي سامر و اخواته الصغار بيها .
و الله يرحم الحاج احمد والد جارنا ابراهيم الذي مات باحدي مستشفيات الولايات بسبب الاهمال الطبي و كان عندو فقط ملاريا – و الدكتور بتاع النبتشية مافي بعياته الخاصة و الممرض بيقول ليه ادفع تاخد دواء و ما تدفع ما عندنا ليك حل و الحل جاء من رب العباد بانه خلصه من ويلاتهم و مغصهم .
و سبحان الله عمتي سعاد المقيمة بالخليج هي و زوجها لمدة 26 سنة باشرت في بناء مستشفي خاص
شراكة مع بعض زملائها و زميلاتها
اسمه مستشفي ……………. التجاري للبقالة و العطور و مواد التجميل
و شرط المقبلوين للعمل به هو ان يكون تخصص طب و تجارة النيلين معا و الاولوية لحملة شهادات
التجارة و من ثم الطب .
و ده كلام شنو يا عمتي ؟_ سؤال صريح من واحد ساذج ؟؟؟
ردت بسرعة . الطب شطارة اقصد التجارة شطارة و لازم نركب مع الحكومة الحمارة
و قلت : لا حول و لا قوة الا بالله
و مرة ذهبت الي زيارة صديقي و زميلي باحدي الولايات و كنت مستعجل و لم اجد احد بالبيت
و سالت الجيران قالوا زوجة اخوه في حالة ولادة و كلهم بالمستشفي الان و طبعا هي مستشفي واحدة بالمدينة و هو مستشفي كان عام و تعليمي و الان اصبح خاص و تعلمجي – فعلا ذهبت اليهم و علي طول
الي قسم النساء و الولادة و فجاءة اسمع صراخ و كورارييك و سكلي و بعد شوية من غير ما اميز صديقي و كل اولاد حلته و اقربائه من الرجال اسمع ليك صوت الضرب و البلنجات بين الطاقم
الطبي و هم الدكتور الشاب ( خريج جديد ) و من معه و بين اهل الضحية و هي زوجة عمر شقيق
صديقي و زميلي عوض الله و بعدما نال الطبيب من الضرب المبرح هو و من معه و تدخل اهل
الخير الذين تعج بهم المستشفي اصر الطبيب علي فتح بلاغ بالشرطة و اصر اهل الضحية علي القصاص و وقتي عله يفش غلهم و خصوصا المرحومة صغيرة و هي اول ولادة لها – و جاء واحد
اعقل من في الحضور و قال يا جماعة هذا شئ عادي بيحصل بالمستشفي هنا انتوا اول مرة يموت ليكم زول بالمستشفي و لا شنو ؟؟ و الغلط ما منو من اللي بيجيب خريج طب جديد اسمو ما بيعرف يكتبوا و هو تقول خريج روضة ماما بتول و بعدين يا جماعة اترحموا علي الفقيدة و احتسبوها
و المهم قابلت صديقي و بعدما هدانا النفوس و بعد واجب العزاء و الدفن ودعته و ثم اتقابلنا بعد سنة ( فترة اجازة برضو
بالسودان ) و سلمت عليه و قال لي : تتذكر زيارتك المرة الفاتت قلت :
ليهو دي تتنسي !!
قال : التعلمجي اللي دقيناه داك لليلة شغال في خمجو داك بس نقلوه الي المدينة اللي جمبنا بعد ما اتدخلوا الاجاويد و عفينا عنو
و اضاف
و تخيل لسع بيقتل في نسوان الناس دي بلد شنو يا اخ و دي واسطة شنو ؟ قلت المهم عندكم شهيدة في العائلة ( و هي في الحساب بنت عمه و زوجة شقيقه ابن عمها ) و بتنفعكم في يوم لا ظل الا ظله
يوم الحساب الجد جد .
سارة في الحارة : الطبيب اصبح غريب و الجيب اصبح حبيب و الانسانية اصبحت فقط في
السطر رقم 21 و الاخير من صفحة 576 من ميثاق الامم المتحدة من مجمل 576 صفحة
بعدما كانت في كل السطور و كل الصفحات و الشولات من دراسة الطب .
الأحباء الأعزاء :
الأخصائيين ديل هم فاضين من النقاطة ؟ الواحد من الساعة تمنية للساعة حداشر يشوف ليهو خمسين عيان ..يلا ضربوها في كم !
الأخ مبارك.. لا أريد أن أدافع عن هذا الطبيب ورحم الله الفقيدة ولكن ألا تشاركنى الرأى أن الخطأ ليست خطأ هذا الطبيب الخريج الجديد الذى وجد نفسه وحيداً أمام حالة ولادة مستعصية وكان لابد له أن بتصرف حيث أنه تعلم الطب لكى يساعد المرضى والجرحى وغيرهم .ولا يستطيع أن يتقاعس عن أداء واجبه فى ظل غياب أخصائى الولادة … الخطأ من إدارة المستشفى التى لم توفر الطبيب الأخصائى أو الإستشارى ..فهذا الطبيب الحديث التخرج بالتاكيد إجتهد فى مساعدة المرحومة ..ثم من المعلوم أنه يوجد ممرض ذا خبرة أو قابلة فى مثل هذه المواقع ..
هل تتذكرون عندما تتأففون من أبائنا في المستشفيات عند حضورهم مرضى من الاقاليم ؟ هل تذكرون عندما تتركون المرضى يئنون من الالام ونجدكم أنتم تتجاذبون اطراف الحديث مع زملائكم وتتناولون العشاء,والبارد وتسمعوننا ذاك الحديث الماسخ لأن أهلنا الطيبون قد قطعوا عليكم حديثكم المنمق ؟ هل تذكرون أيها الاطباء أخطاءكم لذلك المهندس الذي أجريت له عملية وهو لم يفق بعد من البنج ولم يخرج غرفة العمليات,فتأتي الدكتورة ورفيقها ويعطونه البنج ؟ فلولا ستر الله لترملت إنتصار..وتيتم محمد وعبد العظيم وآلوية فاكهة حلتنا ..؟ هل تذكروووون ..والامثلة كثيرة ..وشِن طعمكم ؟ يقصد بها طعم السكر ؟ لكن برضو شِن طعمكم بطعم الملح ؟ ولا اجد تبرير حول منهجية التعليم وغيرها والحكومة ..وغيرها ..أنا أؤمن بقول الرسول صلى الله عليه وسلم ( …..عملاً ان يتقنه) من تعلم فليجود تعليمه وليطور نفسه وإمكانياته ..لأنها في الاصل امانة ومسئولية وبرضو زعلانة من شن طعمكم ..؟؟!! سجمة أم السودان …والله لو كان الاخصائيين زي زمان كانت الكفوف إطاقشت .لأي خطأ يحدث من الطبيب … ياااااااا سبحان الله .
يلا يلا كملوا الرهيفة دى قبال تنقد !
البروف والزوار الكرام
التحية والاحترام
يا سادة يا كرام ………… كانت لدينا مدارس ثانوية يتخرج منها شباب متعلمون تعليما أساسيا متينا يخرجهم من زمرة غير المتعلمين ويجعلهم ممن ينشرون العلم في المجتمع ، والذين لا يتخرجون يواصلون دراستهم في جامعتين (أو ثلاث؟) كانت تعدهم بخير ما تعد به الجامعات طلابها وتجعلهم قادرين على الظهور بمظهر المثقف في أرقى المجتمعات…. وجاء نميري … ومحي الدين صابر … ويشهد الله أنهم لم يغيروا من مستوى وهيكلية التعليم الكثير – وإن كانا قد غيرا بعض الشكليات – وجاء هؤلاء…. حولوا كل مدرسة متوسطة إلى ثانوية … وكل ثانوية إلى جامعة ، وجمعوا تلاميذ الإبتدائية والمتوسطة في حظائر يصل فيها الطفل إلى الصف الثامن وهو لا يعرف كيف وصل (قالوا ليهو نجحت … هو يعرف أحسن منهم عشان يقول أنا نجحت كيف؟)، وإذا وجد بعض المساعدة في الصف الثامن إنتقل إلى الثانوية (متوسطة زمان)… ثم وجد نفسه في الجامعة (يا ليتها كانت مثل ثانوية زمان) … في كلية الطب … المعجم بيد وال text book بيد، والصابونة والبشكير بيد، والسماعة بيد.. وفتيل الريحة بيد ( هو عندو كم يد؟) فهل لديه وقت ليتدرب حتى كما كان يتدرب المساعدون الطبيون زمان؟ …انتهى عندنا التعليم كما انتهت الخدمة المدنية … وكل الخريجين عندنا غير مؤهلين إطلاقا لأننا دمرنا أساس التعليم … ولكن مشكلة خريجي الطب هي أنهم يجرون تجاربهم علينا مباشرة .. لديهم الشجاعة لبقر البطون وجدع الأنوف متسلحين بشهادة ورقية لا بتدريب أو تعليم أما غيرهم من الخريجين فيجرون تجاربهم على مواد (مثا المهندسين الذين نرى نتائج تجاربهم في العمارات المنهارة والطرق التي تنتهي حين تبدأ) دمرنا التعليم فتدمرت الصحة والشخصية والأخلاق وكل شيء ….. تزداد الجامعات عددا … ويزداد الجهل والفقر والمرض تفشيا …. ويبدو أن أهل الانقاذ ولوا أمر التعليم لجاهلٍ اقسم أن يحول السودان كله إلى أشباه له … وقد نجح
نسيت …
خط هيثرو …. ما يكونوا نسوه جوه بطن مريض؟ ؟
ما تقوم تصدق وتنبش مقابر فاروق
ما عندى كلام ….. غير أقول الجزاء من جنس العمل … والتسوى كريت فى القرض … تلقى فى جلدها.
فهمتو .. نقطة سطر جديدز
عشان كداا ! الدكتور دايما مكشر ورابط وشو للعيان ؟؟! يزيد هم العيان زاتو
والله والعيان يكون شديد وماعندو حاجه بس الدكتور( حركه خبير ومافاضي ابتسم ذاتو )
ود الزبير..سلام..
عاد لقيت سوقك !!