الأستاذ/ الفاتح جبرا المحترم
السلام عليكم ورحمة الله وبركاته
وبعد
اولا اعرفك علي نفسي .. انا (سيف النصر صديق) من خريجي كلية الهندسة عطبرة وحاصل علي ماجستير BuildingTechnology
من جامعة الخرطوم – معهد بحوث البناء والطرق وأعمل محاضر بكلية الهندسة والتقنية جامعة وادي النيل بعطبرة (يعني زميلك في مهنة التدريس) ارسل لك ملخص مشكلة حصلت معي اعيش حزنها هذه الأيام فانظر فيها إن كانت تصلح مادة للتناول والنشر عسي أن يكون في نشرها باسلوبك المميز حل للمشكلة ورفع للقيود التي قد تواجه الباحثين من خريجي معهد بحوث البناء والطرق والطالبين العلم ولو في الصين.
أنها تصلح أن تكون مسلسل استهتار ولا مبالاة بطولته بعض دكاترة جامعة الخرطوم وتحديداً الدكتور (ح. أ) والدكتور (أ.أ) التي ضيعت مني فرصة منحة دراسية للدكتوراة بأحد الجامعات الصينية (قدمت لها بطريقتي الخاصة عن طريق الانترنت وبمساعدة زملاء لي مبعوثين للدراسة هناك) وذلك بسبب عدم ارسال شهادة تفاصيل الماجستير طلبتها منهم الجامعة الصينية بعد أن طلبتها مني كشرط للموافقة النهائية. فاتصلت بجامعة الخرطوم ممثله في شخص الدكتور (ح) منسق برنامج الماجستير بالمعهد، فذكر لي أنه (غيرمسموح لحامل شهادة الماجستير الحصول علي شهادة تفاصيله لأنها سرية ولا يجب اطلاعه عليها حسب لوائح الجامعة!!!!!!!!!!!!) وبعدمحاولات عدة وافق المعهد – علي مضض – علي ارسالها مباشرة للجامعة الصينية إذاخاطبتهم!!! (يعني إذا اسلمت وحسن اسلامك فإن شئنا زوجناك يونس الدكيم .. إذا قبل)
عليه فقد أرسلت للجامعة الصينية وشرحت لهم الموقف وأعطيتهم عنوان الدكتور )ح .أ) فخاطبوه رسمياً وطلبوا منه التفاصيل ، الدكتور (ح.أ) أرسل للجامعة الصينية من ايميله الشخصي (الجامعة ليس لديها ايميل رسمي) أرسل فقط اسماء المقررات التي درستها ولم يكلف نفسه طباعة شهادة التفاصيل وعليها الختم الرسمي ليدخلها بالاسكانر ويرسلها للجامعةالصينية التي خاطبته من (ايميل رسمي ) ، والكلام ده يا أستاذ الفاتح طبعا ممكن يعملوا أي واحد أو انا بنفسي من ايميل تاني لاني عارف اسماءالكورسات دي..
فكان من الطبيعي ان تعتذر الجامعة الصينية ، ولمااعدت ارسال ايميل اعتذار الجامعة الصينية لـ لدكتور (ح.أ) بدون ما اضيف أي تعليق مني احتراما له فهو أستاذي، رد علي وقال: انا أرسلت ما أرسلته بعد أن ناقشته مع مدير المعهد الدكتور (أ.أ) “يعني هو براءة!!” أو “انا واخوي الكاشف”.
فإني أسألك يا أستاذي الفاتح ..
هل يعقل أن يكون هذا هو مستوي البعض من علمائنا وأساتذنا وهل يعقل أن يكون هذا هو مستوي هرم مؤسساتنا العلمية جامعة الخرطوم لكن السؤال الذي يطرح نفسه .. هل هذه سذاجة دكاترة أم سذاجة الجامعة أم سذاجة التعليم العالي .. ولا في شئ تاني ؟
ملحوظة :
مرفق أدناه المخاطبات أصل الرواية ، وحسبي الله ونعم الوكيل
الرد :
الإبن العزيز نصرالدين .. كل شئ في هذا الزمان الأغبر أصبح وارد ! لا تحزن خيرا في غيرا
كسرة ثابتة :
أخبار ملف خط هيثرو العند النائب العام شنو(ووو و ووو)؟
الفاتح جبرا 
bir
كملها يا ابو الشوش الجماعة لسة نايمين
اخونا ابو الشوش مبروكة عليك ال bir , بس ناقصة ليه؟ عشان رمضان ياترى و الصيام و كدة !!
مبروك لكن شايفاك بديته فى السحور وداير تكمله بعد الفطور
رمضان كريم
تصور كيف يكون الحال لو كنت إسمك سيف النصر نافع علي نافع؟
رمضان كريم و كل عام و أنتم بخير.
لو كان اسمو سيف نافع ما كان بحتاج يمشي الصين
كان الصين هي الجاتو واتحلت المشكله
يا اخوانا الفنان القال كيف كان يكون الحال لو ما كنت سوداني؟
اردليهو اكيد اكيد اكيد احسن بي مليون الف مرة و العندو شك يعاين في و اقعنا وو اقع الدول الحولنا هم تتطور ملحوظ و نحن تخلف و تراجع حثيث.
نفس الموضوع حصل معاي و انا خريج من جامعة امدرمان الاهلية و الي كان المنسق فيها من المفترض انها تكون رائدة تغيير باعتبارها من كوادر حزب الامة المشار اليهم بالبنان و القصة انو و نحن خريجين و احد من خريجين الدفع القديمة كان عايز عشرة مننا عشان يشتغلو في مجموعة دال و لانو حصلت مشكلة في مشاريع التخرج و الدفعة اعتصمت و لما الناس ناقشت تاني و اجيزت النتيجة النهائية الاستاذة الجليلة ابت نفسها تتطلع الشهادات او التفاصيا و زولنا كول يوم و التاني يسال عن شهادات الناس او حتى شهادة اكمال من الجامعة و الجماعة يرفضو لمن زولنا جاو عقدعمل برة و فاتنا القطار يعني لو كان اتعاونو معانا مش كان غيرو مصير عشرة لي الاحسن!!!!!!!!!!!؟
الاخ العزيز سيف النصر … نصرك الله وابدلك خير منها .
اصل المشكلة هو فتور الهمة واللمبالاة … رفع الجميع شعار وانا مالي الا من القلة القليلة ممن رحم ربي … وصارت المسئولية مثل كرة من النار يتقاذفها الجميع ولا يود احدهم ان يمارس اي دور من ادوار وظيفته دعك من ان يبادر لما فوق ذلك مع ان من اخذ الاجر حاسبه الله بالعمل … والحجة بان العمل قدر الاجر مردودة لان واجبات الوظيفة محددة سلفا فان كنت تري الاجر لا يناسب الوظيفة فاتركها واستقيل … استعجب والله من موظفي الحكومة : يخرج الواحد منهم من منزله ليذهب لمكتبه ويتقاضي الاجر على ذلك ، ولو جئته باي طلب يخرجه عن روتينه اليومي فلك الويل والثبور … وانظر كم اضاعوا على البلاد من الفرص والاموال المبددة بسبب عدم الاهتمام وفي بالي ذلك العقد الملياري لتوريد مادة ما تستخدم لتنقية مياه الشرب … عفا الله عنكم وعنا .
بالله يا اخوانا كل واحد منكم يذكرنا بفرصة ضاعت على السودان او عقود مضروبة تحملتها الخزينة العامة بسبب اللامبالاة والاهمال .
كسرة : البروف جبرا جاهو الضغط بسبب عدم اللامبالاه … فاحسن لا تبالو … البالو مرضو .
البروف وسيف النصر والسمار …. تحيات كيمان كيمان
صراحة كنت متوقع …. بداية القصة و…….نهاية القصة …. غير شكل
لكن طلعت الحكاية ومافيها روتينية وبتحصل كل يوم مئات المرات …. وفي كل الوزارات والجامعات والإتجاهات …. عارفين ليه ؟؟ لأن كل من تولى عندنا أمراً من مصالح الناس بداية من الخفير وحتى أكبر وزير في الغالب تكون فيه خصلة من الآتي :-
الأولى هي ( الفساد ) والثانية (الإهمال وعدم المبالاة) والصفة الثالثة هي ( الحسد ) وتخيلوا كيف يتم قضاء حوائج الناس إذا كان يتطلب مرور هذه المعاملة بيد واحد من هؤلاء أو قد تجتمع فيه الثلاث خصال هذه دفعة وااااااااحدة وللأسف هذا ما نشاهده في كل مرفق من مرافق دولة أمازونيا ….و .. يا حليلك يابلد
واخطر شئ علي معاملتك الحكومية اذا انت ما فهمت الدور ومشيت حالك مع الموظف … كنا تلاته مغتربين غشيمين قامت السفارة حقتنا باعت لينا اراضي سكنية ونحنا اشتريناها – ما غشيمين – لما جينا السودان عشان نسجلها قامو ناس الاراضي هنا قالو لينا وي وي غشوكم قلنا ليهم والعمل قالوا تدفعو حاجة تاني وعشان انتو مساكين نديكم ارض غيرها … قمنا دفعنا تاني – ما غشيمين – قامو ادونا اراضي سكنية في ام سقطه ومعاها رشيش … قمنا انا وغشيم تاني بعناها تحت شعار تلتو ولا سجم خشمك … الغشيم التالت لما فيهو قريبو مفتح ومشو لي موظف الاراضي ذاتو الكان بدودر فينا ونحنا ما ناقشين حاجة قام زهج مننا وودانا الحته ديك … مشو ليهو ورقعوهو وما قصر معاهم : بدل ليهو قطعتو ديك بقطعة تانية خالص في دنيا حلوه خالص .
ههههههههههههههههههههههههههههههههه,,,ضحكتنى وانا حزنان يا حبيب , عليك الله زى ديل ما بفطروا ؟؟
ههههه .. متييييييين بدينا وبقيت تكوس لك في السبب مع رمضان ده !!
مدراء وعمدا ورؤسا كلهم من تلك الشجرة الخبيثة فلا نرجو منهم طيبا .
ما فعله هذا السرطان الوطني في الوطن احسب انه تعدي كل مراحل العلاج حتي الكي ..
إنت عارف يا ود مدني .. الطلع غشيم من الحكاية دي كووولها منو ؟؟؟ أسأل المفتش كرومبو وحا يقول ليك الغشيم قريب الغشيم التالت ( القلت عليهو مفتح ) لأنو لو كان تفتيحة صحي كان أخد منو قطعة الواطة بتراب الفلوس ومشى ظبطها لي روحو !!
عادي يا ود الصديق ,,,خليها الصين دي أنا كنت ماشي ألمانيا ،كان حسي بتونس مع فيليب لام في محل الشيشه،،قصتي في كلية التقانه اتخرجت وبامتياز وبقيت محتاج ورقه اني درست باللغه الانجليزيه ،مشيت للدكتور الذي هو عميد القسم رفض بحجة الدراسه معربه في السودان قلت ليهو انت المواد الدرستنا ليها كانت باللغه الانجليزيه ،،فعشان يزوغ قام قال لي امشي لي عميد الجامعه ولو رفض ليك تعال لي وأتاريهو دافنها لي العميد،،،مشيت لي العميد ورفض فجيته جاري جري فبعد ماحكيت ليهو قصتي مع العميد ،فطلبت منه ورقه اني قريت بعض المواد باللغه الانجليزيه مدام حكاية كل المواد دي صعبه برضه رفض ،،لولا اني احترمت نفسي ومكانته في الجامعه وانه درسني كان اتصرفته معاه تصرف تاني لانه خلاني امشي لعميد الكليه واطلب منه ولو كان وافق كان مسكها عليه وطيره من منصبه لانه ماعندها معنى اني امشي لي العميد ولو رفض اجي لي دكتور القسم وابلغه بقرار عميد الكليه
بقى رافض بحجة الورقه لو وقعت في يد زول ممكن تجيب ليهو مشكله ، طلبت منه يرسل الخطاب هو من ايميله الشخصي وبدل كل المواد يكتب بعض المواد ،،،في النهايه شريت فيليب لام
عجبي من الدكاترة السودانين ، لكن بصراحة يا أخوان التركيبة السودانية اتغيرت في ظل حكومة الإنقاذ ، أصبح الدكتور يحسد الطالب في الفرص التعليمة ، أنا شخصيا حصل معاي موقف مشابه قدمتا لدراسة الماجستير في جامعة أمريكية وماشي على حسابي الخاص ، من شروط القبول 3 رسائل توصية من الدكاترة الذين قاموا بتدريسيك خلال مرحلة البكالريوس تخيلوا يا أخوان مافي اي دكتور راضي يعمل لي توصية و المشكلة لازم يعمل توصية أونلاين في الويب سايت حق الجامعة الشغلة ما بتكلف الدكتور أكثر من 5 دقائق الشي الطريف واحد من الدكاترة أسمو (ج. ع . ع ) بروف جامعة السودان للعلوم و التكنولوجيا كلية الهندسة قسم الهندسة المدنية ، قال الزول دا أنا اعمل ليهو توصية بعدين يبقى مدير مشروع و يختلس الشركة وانا اكون السبب (((((((((عــجــبــي))))))))
اخنا سيف النصر ربنا يخلف عليك باحسن منها انشاالله وبالنسبة ليك دة امتحان انا مريت بشبيه بس بالنسبة لعلمائنا المزعومين فبعض منهم يخجل الواحد من ذكر افعالهم حتي اطفال مابعملوها بالجد قمة في رداءت المستوي
الاخ سيف النصر, ربنا يجعلك (بتار) فى سبيل احقاق الحق, بس العملية كانت محتاجة منك شوية (شاى بالياسمين) مع الدكتورين اعلاهما و الا على الاقل واحد منهم, و صدقنى كنت استخرجت ليك شهادة دكتوراة عديييل من الصين حتى قبل ما تمشيها !!!
اخونا فلاديمير .. تحايا غوالي .. بس لو كنت لميت فيك و وريتني حكاية الشاي بالياسمين قبل الفاس ما تقع في الرأس كنت وكلتك بالموضوع ده .. شكلك خبييييييييييييييييييييييير
هههههههههه ديل كلهم بشربو شاي بالياسمين ي باشا
الاخ او الابن سيف ،
اقول ليك الخير ه في غيرها،. وعلي حسب علمي قصه الدكتوراه دي ح تخليك زول أكاديمي بحت وعلي حسب علمي من ولدي وهو برضو مهندس زيك وفعلا بدا في الدكتوراه والتي أعطيت له بعد حصوله مرتبه الشرف الأولي وشايفو عاوز يغير رأيو ولانو سوق العمل ما عايز ناس اكاديمين،،، اقتنعت بكلامو و كلام السوق وحتي هذه اللحظه ما عارفو ح يقرر شنو واهو لسه مواصل في بريطانيا
جبرا والسمار . سلامات .
زميلنا سيف النصر . لك التحية وأنت تفوض أمرك الى الله وتحتسب .
لكن ياجماعه داير أسأل سؤال .التصرق بتاع الدكاترة دة علاقة الحكومة بيهو شنو يعنى هل حكومة المؤتمر الوطنى سبب فى سياسة الجامعه الحارجية . بمعنى آخر يجب أن يكون هناك مكتب علاقات خارجية فى الجامعه (وخصوصا جامعه الخرطوم ) بأعتبارها أعرق جامعه سودانية ولها إسمها عالميا تتعامل من خلالة مع سائر جامعات العالم ومن خلالة يحدث التطور العلمى وتحديث المناهج ومواكبتها لكافة العلوم المستمرة فى التطور .
والله يا حنين كلامك دا حيرني عدييييييييييييل علاقة الحكومه بيهو شنو؟؟؟؟؟؟؟ ومال ثورة التعليم العالى عمله الشعب
دي سياسة الحكومه والحكومه موتمر وطني وبالواضح كده ياخوي حنين ديل ما دايرين اى زول غيروم يمشي لي قدام
لذلك فهي علاقه طرديه
معليش يا بت وراق .. الما بعرف يشيلك بجلبغك
هي جنس جلبقه ما فضلو فينا شي
سلام ياقبيلة،،،
تعرفي يا بت وراق زمان زمن الدنيا طناش والناس طشاش تأتي الأمطار وتلخبط الدنيا ولا تستطيع التفريق بين الأرض وشارع الظلط وكووولها طين في طين تقوم جموع الطلاب المناوئة للأتحاد نهتف بسقوط الأتحاد ويقولون بالله ده أتحاد ده!!!!
شفتة يا حنين العلاقة الطردية دي كيف بين الجامعة والحكومة !!!!
ناس زي الداترة ديل دايرين ليهم حكومة من نفس المنوال…
كسرة:
سأل أحد الخوارج سيدنا علي بن أبي طالب كرم الله وجهة لماذا خرج الناس عليه ولم يخرجوا علي الخلفاء الذين سبقوه أبوبكر وعمر رضي الله عنهما وما هو السبب في ذلك؟؟
فرد سيدنا علي رضي الله عنه بأن أبوبكر وعمر كان يسوسون مثلي، أما أنا فأسوس مثلك!!!
هسع كلامك دا يا ود الخلاء الجماعه ديل بسوسونا نحن ولا الدكاتره المنهم ذاتو كدي وضح لي النقطه دي ما فهمتها
والله يا بت وراق النقطة زواضحة بس داير ليك مشاكل ساي!!
هههه
ياخي رمضان كريم عليك والله الحوار معكم ممتع جدا ياود الخلاء
وزي ما بقول اخونا جبرا ترانا بنتنفس شويه عشان ما نطق
ياود الخلا انت زاتك جلبغت بت وراق وجلبغتنا معاها
وكيفن الاتحاد ماعندو دخل في طين المطره ؟ ليه ما خاطب
ادارة الجامعة انها تستعد لفصل الخريف بفتح المصارف
وعمل الردميات !!
وكيفن مافي علاقة بين الحكومة ودكاترة الجامعه !! مش
مدراء الجامعات بقوا تعيين سياسي ؟
بعدين الكلام المنسوب لسيدنا علي اول خفت ارد عليهو
لاكين اتذكرت انو ماحديث شريف وحتي انو منسوب لسيدنا
علي , يعني يمكن يكون قالو ويمكن ما قالو !
طيب وكت ابوبكر وعمر ( رضي الله عنهم ) كانوا
حاكمين والشعب كله كان زي سيدنا علي ( كرم الله وجهه )
الشعب قلب ليه اول ما سيدنا علي استلم ؟
لكل شئ سبب سيدنا علي تأخر في حسم امر قتلة سيدنا
عثمان , وحكومة المؤتمر الوطني تأخرت في حسم امر الفساد
والمفسدين من الموالين لها وتاخرت في حسم امر التمكين رغم
ظهور اثاره السالبة منذ بداية التنفيذ ونحنا ذاااتنا
اتأخرنا في امرالطلوع الي الشارع
بس ياهو ذاتو الكلام البفتش عنو
آآآآآآآآآآآآي الحمدلله الدنيا صيام ما عندك طريقه تخت لينا جك المويه وتزوق وتعاين لينا بالرقراق
ههههههه علاقة الموتمر الوطني بجامعة الخرطوم ان اصبح بكلاريوس طبها دبلوما عجبي الموتمر الوطني علاقته بكل شي مش هي لله والله عارف وانت عارف وانا عارف يا ناس العقرب الوطني في كل شي وبقى كل شئ انجدنا يا الله مش هم قالوا ندعو الله انجدنا يا الله انجدنا يا الله
المؤتمر الوطني بعد ان احتكر اقتصاد واموال البلد يحاول احتكار العلم والتعليم العالي بوضع كل العراقيل امام من لا ينتمي له ويعطي الفرص والتساهيل والمنح لمن ينتمي فمقبول + انتماء = امتياز والعكس ليس صحيح لأن امتياز ــ انتماء = غير مقبول …
مطلوب فهامة حجم عائلي جدا .. لاستيعاب سبب اعفاء المهندس ابوستة مدير مصنع سكر النيل الابيض لأن سبب الاعفاء هو ان م.ابوستة شهاداته العلمية وخبراته اكبر من ان يكون مدير لهذا المصنع !!!!!!!!!!!!!!!!!!!!!!
اقترح علي الحكومة عمل اعلان : مطلوب مدير مصنع سكر لا يحمل شهادات عليا والخبرة غير مطلوبه لادارة مصنع صغير تكلفته مليار دولار فقط !!!
بالله يا جنوبي أبو ستة أعفوه، ده فعلا” ظلم وظلم كبير جدا” لأن مثل أبو ستة مهندس يندر وجوده في صناعة السكر بالسودان فهو من المهندسين الأوائل في سكر كنانة الذين تدربوا علي يد (غارسية)، ويُعتبر واحد من ستة مهدسين فقط في العالم قاطبة في مجاله..
بالله يا جنوبي يا هندسة ده أتحاد ده!!!
ياجنوبي اقرا الرد في التهنيه
وكتين إنتو ما ديرين الجلبغة ليش ما عملتو فواصل علشان نواصل؟؟
تعرف يا جنوبي ردك الفوق ده عجبني بلحيل لكن نقول شنو مع الناس الغشيمين ديل؟؟
ما تسأليني يا بت وراق منن ديل؟؟
كويس ما ح سالك بس انت رد
انتو يا جماعه ابو الشوش الخطف البرنجيه ما عرف ليها ولا شنو
بلد بترقص علي انقام الحماسه تفاصيل شنو البدوها ليك وحات الله يكون فايلك كان قريب اسي قدام بتاع التسالي الجتب الجامعه وا اسفاي عليك بلد
ياود الخلاء ويا بت وراق كيف حالكم .
معليش أنا كلامكم دة ماوقع لى . كدى نبتدى من الاول .
أنا زول مدير جامعه الخرطوم (نفرض إنو جابتنى الانقاذ ) بعمل على تطويرا وربطها بما يدور فى الساحة (المحلية والعالمية ) وأضع برنامج وميزانية لعدد 200 رساله ماجستير و100 دكتوراة بعناوين أختارها مع مجلس الجامعه على حسب حوجة البلد . وأربط الجامعه بكل مايستحدث فى العالم من تطور فى كافة العلوم عبر مكتب أسمية مركزالتطوير العلمى ومن خلالة أستجلب أحدث الاجهزة المتخصصة وأفضل العلماء والاساتذة على حسب المشاريع المطروحة وعمل سمنارات يشارك فيها أساتذة من شتى بقاع الارض وعبر هذا المكتب يمكن أن أتعامل مع كافة الجامعات (المحلية والعالمية ) لتبادل الخبرات ومن خلالة أعرف مستوى مؤسستى ومقارنتها بصنواتها فى الساحة .
بالحق . هى جامعه الخرطوم دى نمرة كم فى الجامعات العالمية .
الوجع راااااااااقد …
مرحبتين حنين
دا لو كنت انت دا المفروض يحصل . اما انك لست انت (عشان كده حصل القال عليهو اخونا سيف)
كدا اظن وقع ليك
نشكرك استاذنا و بروفنا العزيز, و حمد لله بالشوفة فى الساحة بعد الغيبة, بدل (المتاوقة) بالشيش…
لكم الشكر جميعا أعزائي الأكارم .. والله فشيتو لي غبينتي و عملتو لي (تنفيس) ما عادي .. كنت زعلان شديد وعايز اطرشق لكن الحمد لله علي وقفتكم معاي وفضحكم للكتير من الممارسات السالبة و مرة أخري حسبنا الله و نعم الوكيل
والله عااااااادي يا عشاري!!!
أنا مشيت لي السفارة عايز شهادة بحث جنائي قالوا لي اتصرف جيبها بي طريقتك لأنو السفارة ما عندها أرانيك ولاحبر للبصمات قلت ليهم أنا بجيب ليكم الحاجات دي وانتو أرفعو البصمات قالو برضو مشكلة لأنهم منتظرين الحقيبة الدبلوماسية ليهم تلاتة شهور وما جات حتى بالأمارة كان في جوازات جديدة مفروض تجي السفارة ألا رسلوها مع زول مسافر سااااي!!!!
بلد ولا في الأحلام!!
تحياتي يا عجيب
انت جادي في كلامك دا!!!!!!!!!!!!
مبروك رمضان كريم