شباب شارع الحوادث

في ندوة عن (مستقبل التدوين في السودان) عقدت في الأسبوع الماضي وبعد أن فرغت من تقديم ورقتي تقدم شابان في مقتبل العمر نحوي وبعد إلقاء التحية وتقديم نفسيهما قالا لي : يا أستاذ والله نحنا عندنا مشكلة ومحتاجين ليك نقعد معاك وين ومتين؟ أجبتهما بإنو مافي مشكلة ويمكنهما أن يسجلا لي زيارة بالمنزل في اليوم التالي.
جلسا لي في اليوم التالي في منزلنا المتواضع ، إ بتدر أحدهما الحديث قائلاً .. نحنا يا استاذ (شباب شارع الحوادث) ، وقبل أن تكتمل دهشتي أكمل لي الشاب الآخر القصة التي سوف أرويها لكم :
بدأت القصة قبل خمسة ستة أعوام .. لا أحد بالضبط يعلم متي بدأت بالتحديد ومن قام بها .. مجموعة من الشباب من الجنسين تشمل مختلف الشرائح طلبة ، عواطلية ،عمال وموظفين ياناوبون الحضور والجلوس في شارع حوادث مستشفي الأطفال على مدار 24 ساعة يقسمونها فيما بينهم مهمتم إستقبال الأطفال المرضى وذويهم وتقديم المساعدة لهم بتوفير الأدوية والفحوصات والأشعة وخلافه .
كيف يتم ذلك ومن أين التمويل .. أقول ليكم :
هؤلاء الشباب أنشأوا لهم صفحة على موقع التواصل الإجتماعي (الفيسبوك) أسموها (شارع الحوادث) وضعوا عليها أرقام هواتفهم تقوم الصفحة بإستقبال الحالات التي تحتاج إلى مساعدة فيقوم قراء الصفحة بالتكفل بنفقات الحالة المعينة بعد تحديدها بالإسم والذهاب لمقابلة هؤلاء الشباب في موقعهم أمام المستشفي لمعاينة الحالة وعمل اللازم .
لهولاء المجموعة من الشباب حسابات (جرورة) بعدد من الصيدليات قاموا بفتحها حتى لا يتعطل الأطفال المرضى (كما قالوا لي) ، وقد علمت منهم أنهم لا يمسكون قرش احمر (في ايدهم) إذ على المتبرع التعامل مباشرة مع المريض الذي يود مساعدته
وعلى من يود دعم عملهم أن يقوم بتسديد جزء من حساب الصيدليات والمعامل وقد علمت منهم أن هنالك الكثير من المواطنين يذهب جزء من مرتبهم شهرياً إلى حساب هذه الصيدليات كما أن هنالك عدداً مقدراً من أرباب المعاشات ميسوري الحال تذهب معاشاتهم شهرياً لنفس الجهات ولك ان تعلم عزيزي القارئ أن منصرفات الشهر الماضي من دواء وفحوصات وصور مقطعية وخلافه بلغت 300 مليون جنيه (بالقديم) !!
لله دركم أيها الشباب .. لله دركم .. كم أنقذتم من أرواح وكم أزلتم لوعة أباء وأمهات يعانون الفقر والمسغبة والهوان وهم يرون فلذات أكبادهم يإنون من وطأة المرض والألم … لله دركم .. ماذا يمكنني أن أقدم لكم ؟
الحقيقة يا استاذ نحنا جينك عشان قبل كم يوم كده جانا زول معاهو طفلو عمرو زي 9 سنوات عيان ومفروض يرقد في العناية المكثفة عشان يدوهو أوكسجين .. المستوصفات والمستشفيات الخاصة الزول لو ما دفع أمنية 15 ما بدخلوهو وبعد داك اليوم الواحد في العناية المكثفة بي حوالي مليون إلى مليون ونص .. ومستشقى جعفر بن عوف للأطفال فيهو غرفه عناية مركزة واحده وتعبانة وفيها جهاز واحد وبتاع (دم) .. أها ما عرفنا نعمل شنو .. عملنا إتصالات وحاولنا نجمع قروش من بعض لكن يا استاذ المرض ما بينتظر .. والولد مات قدام عيونا !
جيناك يا أستاذ عشان عاوزنك تقيف معانا عشان الناس القاعدة تقرأ ليك كتيرين ولو كل واحد فيهم ساهم معانا بي اقل حاجه ممكن نعمل لينا غرفة عناية مكثفة للأطفال (مكتملة الأجهزة) ونحنا سألنا لقيناها بتكلف حوالى 260 ألف (مليون بالقديم) .
الشعب السوداني شعب عظيم .. العبد لله متأكد إنو ممكن نجمع لينا حق عشرة غرف عناية مكثفة في يومين .. بس المشكلة في كيفية جمع التبرعات .. والشراء (يعني في التنفيذ) … أولادي ديل قالوا ليا نخلي الناس ترسل لحساب المستشفي .. قلتا ليهم كده القروش دي ممكن تروح (مكاتب وستائر وموكيت) عشان كده أدوني فرصة نسأل القراء عشان نشوف إقتراحاتهم شنو؟ فيا أعزائي ورونا أنا والشباب ديل نعمل شنووووو؟

كسرة :
لنقف جميعاً تجلة وإحتراماً لشباب شارع الحوادث .. الذين بدلاً أن تقوم الحكومة بتشغيلهم .. إشتغلوا بدلاً عن (الحكومة)
كسرة ثابتة :
أخبار ملف خط هيثرو العند النائب العام شنو(وووو وووو وووو)+(وو)

70 تعليق

  1. البرنجيه الساته

    1. مع الاعتذار للأخ اب احمد

    2. يسدوك فى حراسة انت !

      1. آآآآمييييييييين

      2. ابيييت ما ح أزعل

      3. يا حاسدين يا المندهش و الشنباتى ,, اّهو ما زعل منكم !!!

    3. هههههههه مبروكه عليك اصلو حراستا بتوديك لي حراصتا

    4. مبروكة,, و عقبال ال 4 الباقيات ,, بس اوعا تقد سدرك !!!

  2. أخي الفاتح
    أرجو إرسال أرقام الحسابات مع الشكر واتمني لو في بنك في بريطانيا ويمكننا التحويل له،، هنالك خيرين كثر ،، لك تقديري ومحبتي
    أخوك د……..عبيد

  3. يا سلام علي شبابنا ويا سلام عليك الجبتا لينا كلام
    زي ده يرجعنا للايمان بالسودانيين والله من كثرة ما
    نري ونسمع قربنا نكفر بي جنسيتنا .
    شوف ديل بيسوو شنو ويجي مدير المستشفي مع نائبه
    والمحاسبين يتقسموا فائض الصندوق !!
    انا اقترح نعمل صندوق دعم شباب الحوادث والتواصل
    معهم عن طريق البروف وبعض الاعضاء من القمردينة.

  4. افتراحي : لو اتلم مبلغ زي ده أفتكر انو نعمل صيدليه عديييييييل و بالتالي نخفف عن الاطفال توفير الادويه كخطوه أولى و العافيه درجات
    و الخطوه التانيه لو المشروع مشى تمام ممكن تكون عنايه مكثفه لانه الاطفال ديل دخلوا العنايه لعدم وجود وقايه و أدويه في الاساس —
    تعرف يا دكتور كنا في ليبيا و قت الغزو الامريكي — و فتها تعجب الليبيون كيف صمد الشعب العراقي امام الطلعات الجويه لحلف الاطلسي و التي بلغت في يوم واحد اكثر من ألف طلعه ( ضربه طبعا) و في احد المؤتمرات الشعبيه تقدم احد الشباب بافتراح أن تقوم الحكومه بتجهيز الجيش للرد على الصلف الامريكي فما كان من احد كبار السن الا ان قام شاخطا في ذلك الشاب : شن بتقول يا غبي انت ما ريت كيف دارو في العراق ؟؟ يا راجل جوه ملجأ العامريه المحصن لحقوهم – تحسب نفسك ازكى منهم و لا شنى ؟؟ اني راجل شيباني و اسمعوا نصيحتي : أني نقترح نبني قبورنا و بس

    انا متفائل اخي البروف و ما بقول نبني قبورنا و بس لكن نبدأ خطوه خطوه و الباقي على الله
    مع تحياتي للدكتور عبيد

    1. من هنا كذلك أناشد زملائي في بريطانيا ، ودول الخليج، وايد علي ايد تجدع بعيد
      وكل سوداني في كل مكان

  5. السلام عليكم ياستاذ اود ان اقترح عليكم يمكن تحويل المبلغ الي اي شخص في كل ولائيه يعني ولايه الخرطوم 10 اشخاص يتم التواصل معهم عن طريق ارقام الهاتف
    النيل الابيض 3 اشخاص
    عطبرة 3 اشخاص وكذلك ولايات السودان الباقيه

  6. سلام للبروف والاحباب المتفاعلين مع الحدث ,,,
    ربما كان اول من بدأ هذا العمل الطوعى الميدانى جماعة (سوا مع المرضى) منذا اعوام بعيدة لكن للاسف ذهبت وذابت مع الريح !
    والان توجد العديد من المنظامت الشبابية (صدقات-ديل اهلى-احسان….) تقوم بنفس العمل ,,,
    فلنكن معهم ولهم عونا وسندا ,,
    وممكن اوصلكم لى مناديبهم او رؤساءهم لمن اراد ان يزكى او خاف من ربه يوما عبوسا قمطريرا ,,
    كل الود والمحبة ,,
    009666555040149
    lordysn_79@hotmail.com

  7. لاحول ولا قوة الا بالله
    تدمع العين ويحزن القلب وسودانى شامخ ان شاء الله
    نحن معكم ان شاء الله انا اعمل بالمملكة وهنا ما شاء الله السودانين كتار
    اعملو رقم حساب فى السودان وان شاء الله كل واحد يرسل فية حسب استطاعتو
    بس رقم الحساب يجب ان يكون موثوق مثلا عن طريق الاخ الفاتح جبرة

  8. الرجاء موافاتنا على التفاصيل لتقديم العون

  9. الاخ الفاتح و السمار
    هي شعاع من نور وسط ظلمة كالحة تعيد غي النفس بعض بوارق ايمان قد فقد و لكن المشكلة المطروحة ليست و قفا فقط على و لاية الخرطوم و لكن على جميع اصقاع هذا الوطن المريض الذي نسأل الله ان يعافينا منهو نقترح ان يكون هنالك ارقام هواتف لتحويل الرصيد من كل مكان تنشر عبرك انت فقط تفاديا لاي احتيال متوقع من بعض ضعاف النفوس لسهولة تسييله في اي وقت و اي مكان و دام شباب شارع الحوادث و هم يعيدون فينا الامل.
    كسرة:
    وزير الصحة و الرئيس و كل فرد في الحكومة الهزيلة دي ما يخجل من نفسو و لا يستحي هسي الاولى مجمعات ضباط الشرطة في الخرطوم و بحي بي مليارات الجنيهات و لا الاطفال ديل ملعون ابوهوم حرااااااااااااااااااااااااااااااااااااااااااامية.

  10. البروف العزيز والسمار الكرام
    تحية إحترام وتقدير لهؤلاء الشباب الذين يرفعون الرأس عالياً
    رأيت في صفحتهم أن هنالك ادويه يحتاجها الاطفال وخاصة طريحى الفراش بمستشفى جعفر بن عوف للاطفال باستمرار منها مايسمى MORPONEM 500MG اوMORPONEM 1G …ونستفسر من أطباءنا د. شمباتي ود.عبيد وبقية الأطباء الأكارم في القمردينة عن هذا الدواء وإمكانية المساهمة من الأعضاء لتوفيرة على وجه السرعة و المواصلة بنفس الوقت في جمع المبلغ الخاص بغرفة العناية المكثفة وإقترح أن يتم إختيار إحدى الجمعيات الخيرية المحايدة والمشهود لها بالكفاءة والنزاهة في تنفيذ هذا المشروع ،،،، وحفظ الله أطفال بلادي من كل مكروه

    1. افتكر يكونوا قاصدين
      Meropenem
      وهو مضاد حيوي يعطي بالحقن

  11. والله الشباب ديل جديرين بالتحية وكم تأثرت لقصة الطفل الذي مات لعدم دفع الامنية … ولم يعده “عمرنا” بغلة عثرت ولم يمهد لها الطريق.
    بالنسبة لاقتراح الشباب بإنشاء غرفة عناية مكثفة … لا أريد ان أضع عراقيل لكن يجب ان نسأل في الاول … اين ستنشأ؟ سنستأجر او نشتري او ستكون داخل مستشفى قائم؟ تحتاج العناية المركزة لأطباء على مدار الساعة بالإضافة الي تمريض ، والقصة أخشى انها ما تقيف في تكلفة المعدات بس. لكن المبلغ مقدور عليه وهو ٤٠ الف دولار تقريبا لكن هل التقدير دا واضع كل الاعتبارات السابقة؟ حاضرين للمساهمة بكل ما نستطيع بس ادونا رقم حساب.

  12. التحيه لشباب شارع الحوادث …وبرضو بنقول الدنيا لسه بخير وايد ع ايد تبني
    واقترح فتح حساب ف بنك معين وبي اسم الجمعيه واستلام التبرعات عن طريق الحساب المصرفي ووضع رقم الحساب ع المدونه والفيس بوك

  13. نزار عبد الماجد | رد

    الأستاذ / الفاتح جبرا ،،،
    الله المعين ،، الشيطان يكمن في التفاصيل ،، وعشان تسد بابه وسريييع كمان خصص رقم موبايل يحول عليه رصيد لهذه المهمة السامية والأجر والثواب لهولاء الشباب ولك من الله عز وجل ولكل من إقتنع بالفكرة وأسهم فيها … بس الأهم من كده نشر الرقم والترويج له ودي مهمتك يا أستاذ .. ده للمحلي والمحليين ناقش بروقة موضوع المساهمين بالنقد الأجنبي ..

  14. الاستاذ الفاضل الفاتح جبرا…..
    شكرا لك وشكرا لشباب شارع الحوادث والحمد لله ان الدنيا لسه فيها خير
    اوافق علي مقترح الرقم لتحويل الرصيد تحت اشرفك فانت اهل لذلك
    بالمناسبه اذا تم فتح حساب في بنك ناس الرعايه الاجتماعيه عندهم فيه نسبه

  15. سلام للبروف والاحباب المتفاعلين مع الحدث ,,,
    ربما كان اول من بدأ هذا العمل الطوعى الميدانى جماعة (سوا مع المرضى) منذا اعوام بعيدة لكن للاسف ذهبت وذابت مع الريح !
    والان توجد العديد من المنظامت الشبابية (صدقات-ديل اهلى-احسان….) تقوم بنفس العمل ,,,
    فلنكن معهم ولهم عونا وسندا ,,
    وممكن اوصلكم لى مناديبهم او رؤساءهم لمن اراد ان يزكى او خاف من ربه يوما عبوسا قمطريرا ,,
    كل الود والمحبة ,,
    009666555040149

    1. وانا من جانبي ربنا يقدرنا وموبايلي
      00447868640540

      1. ودا موبايلى وربنا يقدرنا ( لكن الاول معرفة مكان الغرفة والتصاديق ( دى المشكلة) محل اللقف ) 00249111302276

  16. التحية للشباب الناجح الامر يحتاج لوقفة ونفرة في كل ربوع البلاد

    هذا الوضع المأساوي بالمستشفيات سببه ايلولة المستشفيات الاتحادية لولاية الخرطوم

    الحال لم يكن جيدا من قبل ولكنه ازداد سوءً من قبل

  17. استاذنا الموقر سلامي لك ومن عبرك لشباب شارع الحوادث
    لك التحية والاحترام ولهؤلاء الاشاوس كل الود والاجلال والتقدير على مايقومون به من عمل نبيل جزاهم الله خير الجزاء
    يقول رسول الله صلى الله عليه وسلم ((من فرج عن مسلم كربة فرج الله عنه كربة من كرب يوم القيامة ومن نفس عن مسلم عن مسلم نفس الله عنه يوم القيامة )) او كما قال وانشاء الله هذه الزمرة منهم وفقكم الله لما فيه الخير .
    اقترح فتح حساب باسم ثلاث اشخاص (انت واثنين من هؤلاء الشباب ) في احد البنوك لايمكن السحب منه الا بثلاث تواقيع في اقرب وقت ثم انشر رقم الحساب واسم البنك بجانب الكسرة وسترى الخير باذن الله ونحن على استعداد انشاء الله .
    وفقكم الله لما فيه الخير

    1. اقتراح جميل وان يكون الهدف لكل أطفال السودان وان يكون العلاج مجاني لأي طفل في السودان يتلقي علاجه في المستشفيات الحكومية

    2. و ايضا اويد اقتراح الاخ حمد احمد و الدكتور عبيد (برنجية) …

  18. سلام ياقبيلة،،،
    وألف مليون سلام لهؤلاء الثوار (شباب الحوادث)، أقف وقفة تجلي وإحترام وتقديرلهؤلاء الشباب المثابر الثائر الذين يضربون أروع الأمثال لكل أولئك المُتخَّمين الخانعين، ولأولئك المناضلين خلف الستائر والحُجُب.. ولكل اللصوص سارقي مقدرات الشعب الفضيل!!
    فكيف يقاومُ مُتْخًمْ؟! وكيف يناضلُ من لا يفهم ؟! و كيف يُصادِم من لا يعشقُ طعم الدم؟!
    فهذه الإقتراحات جميلة وعملية وممكن تنفذ علي جناح السرعة وأشير هنا للإخوة والأخوات عن (جمعية زاد المسير) وهي جمعية خيرية طوعية خاصة بمدوني القمردينة وسوداننا، ولها مجلس إداري برئاسة الدكتور عزت ولها حساب جاري مفتوح ببنك السلام علي ما أظن وهي بدأت نشاطها قبل عامين أو ثلاثة بدعم الشرائح الفقيرة، ولكن ككل عمل جميل ورائع في بلادي يُقتل بليل ويدفن من دون أن نعرف قاتله ومن قام بدفنه، فأرجو من الإخوة إنعاشها وتسخير هذه الإمكانيات المتاحة للمساهمة مع هؤلاء الشباب دون أن يُغمط حقهم فكله عمل للخير يُبتغي به وجه الله..
    فماهو رأيكم فأشيروا علينا أيها الناس ونحن جاهزون للدفع بكل مانملك إن شاء الله..

    1. وعليكم السلام يا باشمهندس ,,
      صدقت ونبهت ووعيت , زاد المسر قد وئدت فى مهدها ,
      فلتكن هى ماعونا ومعينا ,,
      وغيرها من المنظمات والجماعات الخيرية لا غنى لنا عنها ,,,

      1. وعليكم السلام يادوك شمباتي، يلا همتك معانا وإستنفر معي بقية الإخوة والأصدقاء القادمين والقدامي، فهذا ماعون جاهز كما قلت فلنبدأ به أو معه ولتكن هنالك مواعين أخري فزيادة الخير خيرين، ولحين ظهورها فلنبدأ من هنا!!!
        فالخير في بلادنا كثير وفيكم أنتم أيُها المهمومون بهموم أمتكم ووطنكم أكثر ولتكن هذه البداية وسأتحصل لكم علي رقم الحساب من الباشمهندز سهيل فهو أول من قام (بتأسيسه) علشان الكلام ما يودينا لبعيد لأنو في ناس هناك لا بدة للكلام الأشتر..
        بالمناسبة يادوك شمباتي صاحبك المهندش أدي رقم غلط لجنوبي بإعتباره رقمي، وحاولت أصحح الرقم للمندهش عبر تلفونه طرفي ولكن عمل فيها رايح ورفض يرد عليا البتة، فواحد من إتنين يا إمتن ترسل لي رقم جنوبي في رسالة علي جوالي أو ترسل لجنوبي رقمي الصحيح علي جواله وينالك ثواب وأجر و(عروسة) علشان يتبقي ليك أربع عيون وتحصل أقرانك الدكترجية يا صديق!!

      2. ههههههههههههههههههههههههههههههههه,,دعوة العروسة دى طفشت منك الحسنيين !
        وى وى وى ,
        باذن الله اقوم بالاتنين عشان خاطر عيون حلوين ,,

      3. إنت يا ودالخلا الود ده اخصائي نساء وولادة ولاشنو !
        مالو نفسو طامه كدي من تالا العرس ؟

  19. يتم فورا فتح حساب باسم واحد من الشباب ديل وينز ولو هنا ولكم على بحول الله نملا تب لمن يكفي كمان للإموات علينا حق وهم في نفس الشارع يلا شباب

    كسره
    شكرًا بروف

  20. يعني وزير الصحة ده لو نفذ سياستو بتاعت نقل المستشفيات للضواحي بحجة معاناة المواطنين في الوصول اليها , كم طفل حيموت بسبب معاناة اهاليهم في الوصول الي امثال شباب شارع الحوادث ؟
    وبعد ده يجي الاعلام يقول ليك عاد المسئول الفلاني من الخارج بعد تلقيه العلاج ويمشوا يستقبلوهو ويهللوا الله اكبر الله اكبر وعاد الوسخ الفلتكاني من الخارج بعد عمل فحوصات للاطمئنان علي صحته ! طيب هم ما سافروا بقروش الغلابه البموتوا جوه البلد عشان ما عندهم قروش العلاج ديل ياخ !
    هو وزير الصحة ده بدل يقعد يعمل برنامجه الفي التلفزيون ده , الو معاي منو ؟ اهلن يسعاااد ! مشكلتك شنو ؟ سعاد مشكلتا انها دايره تمشي مستشفي حكومي تتعالج مجان , هو زاتو في وزير بيجي يقدم برنامج ؟ هسه تلقي بشيل قروش تقديم من التلفزيون !

    1. انت البوديك تشاهد قنوات السودان شنو

      1. مرة يوم العيد الصباح كنت فاتح التلفزيون و الكابلى بيغنى, اتصلت اسلم اعيد على الاهل بالسودان فسمعوا صوت التلفزيون, فقال لى اخوى: انتا البخليك تفتح تلفزيونا دة شنو؟ نحنا هنا ما بنفتحو ,, و وكتين انتا مشتاق ليو كدة مسافر منو ليه !!!!

  21. ما زالت امة محمد بخير- والله عمل مثل هذا لا يقوم به الا من رحم ربي في ظل هذه الظروف العصيبة – لله درهم –
    خلونا نهتم بجمع المساهمات فورا وفي نفس الوقت ندرس كيفية التنفيذ – واقترح ان يقوم الاستاذ الفاتح جبرا واخرين من الشباب بمقابلة الدكتور ابن عوف – وهو من اهل الخير – وطرح الفكرة علية ويمكن ان يساعد بما له من خبرة في مجال طب الاطفال بلاضافة الي استجلاب المعونة من الخارج والداخل – ممكن كمان الاستاذ الفاتح يناشد شركات الاتصال والبنوك والشركات الكبيرة زي LGودال والنفيدي والمصادر الاخري في الداخل والخارج للتبرع بعمل المنشاءت الاضافية للغرفة – وممكن تسمي باسماء الشركات – مثل التكييف والبرندات والكهرباء والفرش والاثاث و…. وفي المستقبل ممكن انشاء مستشفي بكل ملحقاتة خاص بالاطفال – عنابر وصيدلية و …. واول الغيث قطرة –

  22. تلفون واحد من الناس ديييييييييييل

  23. عايز اتبرع بقدر ما استطيع…………ادوني خبر انتو وين 0122413456

  24. الشباب ديل فعلا يستحقو الوقفة والمساعدة فى مشاريعهم والغريبة انهم مابقيفو فى مساعدة المرضى وبس قبل مدة قصيرة قامو بزيارة لمدينة الفتح وقدمو مساعدات لمرحلي سوبا عبارة عن أغذية وبطاطين (ضمن مجموعات اسفيرية أخرى) ,,,, جعلها الله لكم فى ميزان حسناتكم ,,,,

  25. إيدي في إيدين شباب شارع الحوادث أنا وجميع من هم حولي في إمارة دبي الرجاء وضع رقم الحساب …إيدينا يا ولد …..إيدينا ياولد إيدينا للمواطن المسكين البهدلته حكومة البلد ….مش للبلد

  26. رايكم شنو نعمل غرفة عناية مكثفة وصيدلية ووزارة دفاع كمان ونعمل نفسنا حكومة

  27. الفكرة بمجملها رائعة ولكن:
    1. اما ناس الحكومة بكرة حا يدخلوهم الحراسة لأنهم يعملون ضد سياسات الدولة!!!!!
    2. أو ناس الحكومة بكرة يستلمو الشغلانة بعد ما تفرهد ويقولوا تحول كل هذه (الصدقات) الي ديوان الزكاة أو لجهة ديوان الما عارف شنو داك عشان يستقطعو الVAT
    3. أو يطفرو فيها الجماعة اياهم ويقولوا دي من المؤسسات (الحكومية) الخاسرة ويتم (تصفيتها) للقطاع (الخاص)
    تحياتي يا أستاذ ولكن أصابنا الرعب حتي من تقديم يد المساعدة للاخرين في زمن الخلافات الاسلاموية

  28. السلام عليكم ورحمة الله
    وربنا يوفق الجميع لما فيهو الخير
    الفكرة رائعة جدا ولكن الملاحظ انو المطلوب غرفة عناية مكثفة مكتملة الاجهزة كلام حلو بس : الغرفة تركبوها وين ؟؟؟؟؟
    في المستشفي (يبقي قابلوني) ولو في الشارع يا حليلكم — ولو في البيت تبقي مشكلة
    اولا لابد من التفكير في الموقع وكيفية ايجاده ….. الا واحد من الدكاتره ينبرع ليكم بعيادة وبعد شوية ناس المواصفات. يا اخوانا دا ما تعجيز ولكن للتفكير السليم لتاسيس هذا العمل الخيري _–صدقة جارية__
    ثانيا بالنسبة للمساهمات انا بقترح انشاء جمعية خيرية من الشباب اياهم والاستاذ جبرا وباقي رواد القمردينة وتسجيلها حتي تتمكن من فتح حساب باسمها وبالتالي يسهل عمليات الدعم والصرف وغيرها وعملية التسجيل بسيطة ولا تتعدي شهر واحد .
    علي ربنا يوفقنا جميعا — احنا في السعودية غايتو جاهزين.
    والرهيفة التنقد وانشاء ما تتلتك
    كع يا العبيد برنجياتك كترت (فيها ريحة مؤامرة)

  29. واحد من البلد ديييييك | رد

    يا استاذ انت أكيد بتهظر … احنا ما وصلنا للدرجة دى …و لو وصلنا للدرجة دى أكيد ما فى ناس زي ديل…..

  30. بلينا بقوم لا اخلاق لهم علي ظلم القوارير قد جبـــــــــلو
    ضربو رجالا ونساء لا لشئ سوي انهم بالحق قد صدحو
    أمثالها كثر.. فتاة الفيديو.. بالسياط وبغيرها كم جــــــــــــلدو
    كانت نجلاء ..وتلك هند… وهذه جليــــــــلة وما برحــــــــــو
    في دارفور , كردفان , وفي الخرطوم (صفية) التي اغتصبو
    وغيرهن كثر لربما لخوفهن من العار قد صـــــــــــــمتو
    تلك كانت شريعتهم ولكن جورا للرحمن قد نســــــــــــبو
    كم من شيخ اذلو وكم من طفل اضاعو وكم من شريفة أهانو
    شغلو البلاد حروبا من كل ناحية وعلي أطلالها كم غنو وكم رقصو
    رجرجة دهماء أخذوها حين غرة عليهم اللعنة اينما ذهبو
    بترو جنوبا عزيز علينا والباقيات تترا لطالما كانـــــــــو
    سكنو قصورا لم يحلمو برؤيتها والفارهات من الدواب قد ركبو
    نشرو الفساد برا وبحرا وجوا من خطوطها هيثرو قد باعو
    فرقو شعبا كان متحدا وبين الاضداد كما الاختين قد جمعو
    أفقرو بيوتا كانت رآسية وأغنو من رعاع القوم من كانو
    أبنائهم في نعيم العيش قد رفلو باموال الشعب ما زالو
    نهبو البلاد شرقا وغربا ودماء الابرياء كم سفكو
    لا مدنية… لا خدمة…لا عسكرية .. لا شرطه كلها دمرو
    لا تعليم ولا صحة لا جامعات ولا قفة ..كلها قبــــــــرو
    جهوية بدأت قبلية تأسست عنصرية عرفت اسلامية قالو؟؟؟؟
    ظنو بانهم كسبو ونسو انهم بهذا الكسب قد خســـرو
    لانهم فجرو ….لدينهم تركو…. في غيهم ســـــدرو
    يا كريم ارنا فيهم عظيم قدرتك بقدرما اقترفو
    …….
    ابو الزفت اخوكم قرب يبقي شاعر ….هييييع

    1. تسلم كتلوني كل كلام في حب الوطن اعلى مرتبة من الشعر تحيتي لك وكتمت كتمت كتمت

    2. انا يا دااااب عرفت اسمك ده جبتو من وين !
      لاكين كده ما بتغيظم ياخ , انت ما تموت وتريحم ..

  31. الاحباب المتداخلين والمتاوقين !
    سلام ..
    باذن الله خلال يومين ح ينزل مقال منفصل من البروف به رقم الحساب وارقام تحويل الرصيد من داخل السودان ,,
    وحتى رقم الحساب فيهو بالعملة المحلية والاجنبية ,,
    وكانت (صدقات) فكرة لتحيا ,, وديل اهلى ,,,
    شعر محبب الى النفس ,,
    دمتم ودام طيب اصلكم ,,,

    1. مشكور على التنوير…

  32. التحية والتجلة للجميع وعلى رأسهم الأستاذ الفاضل الفاتح جبرا نسأل الله أن يجعل دعوة الخير هذه فى ميزان حسناته، وعلى استعدلد للمشاركة بكل ماهو متاح.

  33. التحية والتقدير لهؤلاء الشباب .. وكنا نظن أن شباب البلد همته انتهت وفترت .. لكن يظهر لسه فى شباب عندو همة وعزيمة ، وديل ما قعدوا وقالوا ما لاقين شغل وعلقوا على الشماعة .. أهو ده الشباب السوداني همه وعزيمة لا تقهر .. غيرهم كان قال وأنا مالي الحكومة ما عملت حاجة أضيع وقتي فى شنو ،، لا قعدوا فى فيس بوك ولا تبادل نغمات الهاتف .. أتمني أن لا يكون فقط المشروع لعمل غرفة عناية مكثفة للأطفال .. بل أن يكون البذرة الصالحة لبث الروح والمعنويات فى نفوس الشباب للعمل حتى ولو بدون مقابل لان العمل ليس فقط من اجل الحصول على المال ( رغم أهميته ) بل لتحريك الدم والهمة والنشاط وصدقوني أيها الشباب حا تكون النتيجة رائعة وحا تتحقق كل أمانيكم ، العمل التطوعي حا يفتح ليكم أبواب كانت غائبه عنكم وكل يوم حا تجيكم فكرة جديدة وتتفتح أذهانكم وتوسع مدارككم .. وجميل كل الإقتراحات القدمها الأخوه فى القمردينه .. كما لا تنسوا أيها الأخوه ان كثير من الناس يخافوا من التبرع لجهة وهمية والإقتراج الأشمل والأعم كما ذكر أحد الإخوه بفتح حساب يتم تشغيله بثلاثة توقيعات ويسمي فى البنك باسم ” من أجل اطفال السودان ” فى المرحلة الأولى لحين تأسيس جمعية أو مؤسسة أو أي شيء حسب الأنظمة المتبعة فى السودان حتى تكون هناك شفافية .. لأن أولاد الحرام ما خلو لأولاد الحلال حاجة .. والمقرضين متربصين .. .. وأنا حالياً بدولة الإمارات وسأسعي بدوري فى تقديم كل مساعدة ممكنة ولي علاقات لا بأس بها مع خيرين من الإماراتيين والأجانب وهم على استعداد لتقديم أي مساعدة للسودان من خلال جهة موثوق بها ،، ودكاترة القمردينة ما بقصروا فى الإتصال بمنظمات طوعية وأطباء مشهود لهم بالكفاءة والمقدرة لتقديم الدعم بالأدوية والحضور للسودان لإجراء العمليات الضرورية وخلافه وأتمني أن يكون المشروع أكبر بكثير من أحلام هؤلاء الشباب وبسواعدنا وعزيمتنا نبني ونشيد أحدث مستشفيات للإطفال لينالوا أفضل رعاية صحية كما غيرهم من اطفال العالم .. وفى انتظار ضربة البداية

  34. السلام عليكم يا شباب ,,,,
    ادونا رقم حساب.

  35. السلام عليكم يا استاذ
    و االله حولت امنع نفسي من البكاء تأثرا ولا يمكنني غير الوقوف اجلا لما قامو به لأن الروعه لمن لايعرف حوجة المرضي في الطريقه الخليه من البروتكولات البتقتل.
    لأني من من عايشو الوضع في مستشفياتنا……..انا معاك في انه النس تجمع تبرعات بس لازم ما تصل المسؤليييييين حتي لا تضيع في بروتكولتهم المهلكه. بس الشباب زاتهم اختراعهم ايه؟هم اولي بالفكره؟
    و انشاء الله نحنا جاهزين.

  36. معكم ولو كان بشق تمرة المهم ان ترى احلامنا النور

  37. دستوري بارز ويعتبر الرجل الثاني في الولاية التابع
    لها ويحمل شهاده اكاديمية مزورة هرب بعد فضح امره !
    وشبابنا الخريجين الحقيقيين يجوبون شارع الحوادث ليس بحثا
    عن العمل ولكن لتقديم يد المساعدة للمحتاجين مؤكدين
    بذلك صدق تأهليهم اكاديميا وانسانياً.
    بمناسبة الدستوري الراسب ده واحد صاحبي من اولاد
    ريفي المناقل قال عندهم شافع بليد , يوم توزيع
    النتايج جا البيت و امو سألتو : نتيجتك وينا آآآ
    المسنوح ؟ قال : قصّرن يمه النتايج قصّرن فينا ما
    ادونا …

  38. يا لجمال الفكرة و جمال اصحابها و جمال من يتبناها حتى ترى النور قريبا جدا .. و انا و من معى ومن اعرف ولا اعرف سنكون من اول الداعمين لها ,, لانه و بفضل الله كنا ومعانا بعض الاخوة و الزملاء نقوم بعمل مماثل يتمثل معظمه فى توفير الادوية و اجرة العلاج و لكن عن طريق المعارف, يعنى تجينا الاخبار بان هناك شخص من المعارف محتاج و نهرع للمساعدة ,, اما بهذه الطريقة المبتكرة و التى تشمل انشاء غرفة للعناية المكثفة فلعمرى انها من اجمل ما عرفت من اخبار عن ابناء بلدى (الفاضلين) ,, و اقتراحى ان يكون الحساب باسم البروف يوسف جبرا حيث انه حاليا اكثر شخصية معروفة و موثوق بها ,, و يعمم هذا الرقم و باذن الله سنجد الايداعات زى المطر فيه,, و اتوقع ان يتجمع لدينا مبلغ ال 260 الف فى شهر واحد ان لم يكن اقل ,, و سوف لن نتوقف عند هذا فقط , بل ان شاء الله نصل الى حد تشييد مستشفى اطفال عديييل كدة.. لكم كل التحية و التجلة و التقدير شباب بلدى العظيم .. وربنا يوالى جميع مرضانا و مرضى المسلمين بالصحة و العافية ,, اّمييين

    1. وبان يتضمن الشعار العلاج لجميع أطفال السودان مجانا في جميع مستشفيات السودان الحكومية

  39. فكره رايعه ونحن جاهزون

  40. يا عم جبرة انا لو سمحت لي بطلب منك بعمل جمعية خيرية بأسم القمردين’ أو ما تشاء، لأنو بصراحة في ناس كتيرة بتضمنك وواثقة انو تحت اشرافك القروش المجموعة حتمشي لأصحابا.. وأنا أول المتبرعين بالوقت والجهد والمال (قدر البقدر عليهو) بشرط اشرافك او وجودك في الموضوع.

    لي باقي القراء والراغبين في عمل الخير، ده تلفوني واسمي لو ممكن نشارك/نساعد في أي عمل خير

    ابنكم شريف بشرى
    00249912152005

  41. أحبائي المدونين حال ظهور هذا المقال كان التفاكر في كيف نكمل جهود أولئك الشباب مع جهودنا التي بدأت منذ عامين عندما كونا (منظمة زاد المسير) من مدوني (ساخر سبيل) ومدونة سوداننا (http://sudanona.wordpress.com ) والتي كونا لها مجلسا وفتحنا لها حسابا مصرفي باسمها…. لكي يكون الخير خيرين
    تفاكر معي الأخوة الفاتح جبرا وود الخلا وود الزبير وسهيل والزهراء جزاهم الله خيرا بأن نبدأ معهم عملا مشتركا وكان سهيل والتركي قد تفاكروا أيضا في نفس الموضوع

    كان القرار اليوم أن أذهب وأتفقد الحساب صباح اليوم 29 يناير الى مصرف السلام بفندق السلام روتانا موقع حساب الجمعية ووجدته موجود الا وأنه يشكو من قلة الفيران فيه…. يعني الحساب فاضي وأبياض… فتفاكرنا أن نعيد له رونق الحياة

    الحساب رقمو ساهل ويدار بواسطة مجلس تنفيذي مشهود لهم بالكفاءة ورئيس المنظمة الفخري هو الأستاذ الفاتح جبرا….
    فان اتفق المدونون على ان يكون هذا الحساب نافذة لجمع التبرعات وصرفها عن طريق مجلس تنفيذي جديد يراعى فيه تمثيل شباب شارع الحوادث مع منظمة زاد المسير….. حتما سوف يكون الخير خيرين
    رأيكم دام فضلكم

  42. سلام ياقبيلة،،،
    اراكم وقد إقتربتم كثيرا” من نقطة الإنقلاب أو النقطة الحرجة، كما يقول أهل الرياضيات، وهذا في حد زاته فأل حسن إذا صدقتم النوايا وأحسنتم الظن بأنفسكم وغيرّتم ما بأنفسكم حتي يُغير الله سبحانه وتعالي ما بنا، ولنبدأ بهذا المشروع الحيوي والذي سيكون النواة الأولي لتحقيق الأماني المنشودة إن شاءالله..
    يتساءل بعض الإخوة عن رقم الحساب أو أرقام تلفونات لتحويل الرصيد وسيتم الإعلان عن كل ذلك إن شاء الله عقب الفراغ من بعض الترتيبات الجارية الآن.
    وإليكم السيرة الذاتية للمنظمة المقترحة كمظلة لهذا العمل:
    منظمة زاد المسير منظمة طوعية خيرية مسجلة بمسجل الجمعيات والمنظمات الطوعية بالسودان ولها رقم حساب وختم وورق مروس وموقع علي الشبكة العنكبوتية ومجلس إدارة علي رأسه الدكتور عزت بقاريتش، وكوكبة من رواد القمردينة، وعلي رأسهم البروف جبرا الرئيس الفخري للمنظمة وتم تأسيسها في النصف الثاني من العقد الأول للقرن الحالي (بإعتبارها ستمتد إن شاء الله لتكون نواة البلد الطيب الذي يخرج طيّبا” بإذنه تعالي)، وتضم في عضويتها كل المدونين والمدونات (القُدامي) بساخر سبيل وسوداننا الأخت الصغري لساخر سبيل، وترحب المنظمة بكل الإخوة القادمين الراغبين في الإنضمام لها، وسيتم تفعيل الأنشطة بالتضامن مع الإخوة والأبناء من شباب الحوادث وربما يتم تطعيم المنظمة بعدد مقدر من شباب الحوادث علي سُدة القيادة.
    ولا شنو يا بروف جبرا، شايفك لا بد ليك فوق راي؟؟
    وعلي العموم وكيف كانت المسارات فنحن مع عمل الخير حيثما كان وأين ما حلّ!!
    (فقليل مستمر خير” من كثير منقطع)
    الرجاء زيارة الموقع علي العنوان التالي: http://zadalmseir.wordpress.com/

  43. ابدوا بفتح حساب ثم يقوم الاستاذ الفاتح جبرا بالاشراف عليه وتنزيل رقمو فى مدوناته ويكون ثابت مثل السؤال عن خط هيثرو فى اسفل كل صفحة وانشاءالله البنقدر عليه بنسوى
    يااخونا انشاءالله عشرة جنيه حسب الاستطاعة
    عشرة وعشرة تساوى عشرتين وعشرة وعشرة بتعمل غرفة عناية مكسفة وصيدلية باذن الله
    والله انا متفائل

  44. الأحباء الأعزاء
    سلام وتحية

    أطمئتكم على أن العمل جار في المشروع .. هنالك بعض العقبات فيما يختص فنح حساب بالعملة الصعبة نسبة للعقوبات الإقتصادية المفروضة على السودان ولكن هنالك بصيص من الأمل إذ سوف أجتمع مع الإخوة في البنك المركزي يوم الأحد المقبل من أجل إيجاد حل لهذا الموضوع أما الشرائح والرصيد فقد قابلنا الإخوة في شركات الإتصالات زين- سوداني – MTN وتم منحنا لها وسوف نعلن عنها عند ضربة البداية بعد معرفة أرقام الحسابات البنكية .. كما سوف نعقد إجتماعا مشتركا بين زاد المسير وشباب الحوادث للتنسيق. ألف شكر لكل من تداخل وأدلى برأيه في هذا العمل الخيري الذي نرجو من الله أن يتم ويرى النور بإذنه تعالى

    1. العزيز بروف جبرا
      بما ان هذا المقال تفاعل معه اناس كثر فأقترح طرق
      الحديد وهو حامي , وحتي تذليل العقبات التي تواجهكم
      في فتح حساب بالعملة الصعبه اري ان تستعينوا بحساب
      اشخاص موثوقين لديكم في دول المهجر لايداع مساهماتنا
      في حسابهم ومنهم يتم تحويل المبلغ للمنظمة .
      والله من وراء القصد ..

  45. السلام عليكم أستاذ الفاتح : لنا تجربة نحن أبناء إحدي قري ولاية الجزيرة بالمهجر فقد أسسنا صندوق لدعم المرافق العامه في القرية ووضعنا له دستور من بنوده عدم تسليم إي مبلغ نقدي لأي جهة فقط أسهمنا في مشارع عديده في القرية بمساعدات عينية مثلا شراء طوب وكمر لبناء فصول دراسية ، ويتم شراء المواد عن طريق أحد المشتركين الذي يكون في إجازة ،،،،،،، هل يمكن تطبيق هذا على المشروع بتقسم العمل لمراحل مثلا بناء عظم المبنى وحصر قائمة المواد للازمة لهذه المرحلة (يعني جدول للمواد ) ثم المراحل التالية مع جدول للمواد ……. حتى مرحلة الأجهزة إعداد قائمة بها وفتح الباب للمتبرعين كل حسب مقدرته (جهاز أكسجين ، سماعة ، طن أسمنت) ،،،،،،،،،،،،،، للأسف لم تعد هناك ثقة في لجان ال….. (جزاء الله خيراً كل القائمين على أمر الغلابة )

  46. فى يوم امس تم طرح برنامج شباب شارع الحوادث عبر اذاعة طيبة
    وكان البرنامج شيق وممتع جزاك الله كل خير يا استاذنا الفاتح جبر لنشر قصة شباب شارع الحوادث ونتمى مزيد من التبرعات يا ريت اذا كل فرد سودانى قدر يرسل انشاء الله جنيه علشان غرفة العناية تقوم

اترك رداً على obeid إلغاء الرد