الخطوط أنواع ..وأشكال .. فى الكتابة عندك خط الرقعة وخط النسخ وبقية الخطوط . وفى الكوره عند خط ستة وخط طمنطاشر وخط التماس وفى الجغرافية عندك كمان خط الإستواء وخط قرينتش وخط الطول وخط العرض وبرضو عمدك خطوط تانية زى خط المواصلات وخط الموبايل وخط الفقر وخط المشاة وخط الطيران!
جميع هذه الخطوط عزيزى القارئ تشترك فى خاصية واحده رغم تباينها .. هل تدري ما هى هذه الخاصية ! وما الذى يجمع بين خط طمنطاشر وخط الإستواء وخط قرينتش ؟ سوف تشحذ ذهنك عزيزى القارئ ولو أديتك ستين سنة عشان تفكر أنا متأكد تماما أنك سوف تفشل فى إيجاد هذا الشئ المشترك بين كل هذه الخطوط !
طيب أنا أوفر عليك الستين سنة وأقول ليك الإجابة وهى أن جميع هذه الخطوط لا يمكن أن تسرق !! يعنى حصل يوم شفتوا ليكم (خط قرينتش إتسرق) وللا (خط مشاة إتسرق) وللا أى واحد من الخطوط دى زول (نشلو ونام بيهو) !
لكن طبعن لأنو نحنا عندنا ناس يسرقو (الكحل من العين) ويسرقو ليك خط سته ذاااتو لحدت ما (الحكم) يودوهو الإنعاش من المفاجأة فقد تمت سرقة خط (جوى) !! قامت جهه ما بسرقة خط (الخرطوم – هيثرو) الجوى وباعته (كسر) لأحد الجهات التى تتعامل في المال المسروق !!
فجأتن اكتشف أحد المسئولين إختفاء أحد أهم خطوط الطيران لديه فصاح بأعلى صوته :
– خط (الخرطوم – هيثرو) إتسرق يا رجاااالة !!
هنا تجمع الجيران وبعض المارة (بتاعين الشمارات) وأخذوا يهدأون من روع المسئول
– صوت 1 : يا سعادتك كدى فتش براااحه بررراحه إحتمال تلاقيهو !
– رد : ألاقيهو دى شنو؟ الخط ده أنا مفقود وأنا ما شايفو ليهو تلاته أربعه سنين !
– صوت 2 : وإنتو يا سعادتك نايمين التلاته أربعه سنين دى وجايين تسألو عنو هسه ؟
– رد : هى لاكن نحنا قايلين فى زول ممكن يسرق ليهو خط طيران ويبيعو؟
– صوت 4 : والله يا سعادتك عندنا ناس يسرقو ليك الجنريتر والحفلة شغالة !
– صوت 5 : مش إحتمال يعنى يمكن تكونو إتزنقتو كده مرة لى قروش وقمتو مشيتو بعتوهو ؟
– رد : إتزنقنا وبعناهو دى شنو؟ مش كان على الأقل تكون فى مبايعة موجودة عندنا مثلاً
– صوت 6: أها يعنى يكون الخط ده مشى وين يعنى؟
للإجابة على تساؤل (الصوت 6) نقول ليهو إنو (أمنا الحكومة) ما سكتت على (السرقة العارفاها ليها تلاته سنين وشوية) وقامت طواااالى شكلت لجنة تحقيق عشان تحدد الجهات المتورطة وأعطت اللجنة دى الحق فى إنها تتعاقد ليها مع (متحري إنجليزى خاص) عشان يتابع الموضوع في بريطانيا ولمن يعرف الناس (السرقوا الخط) يقوم
يفتح ليهم بلاغ فى (القسم الجنوبى الإنجليزى) ويختو الخط (معروضات) !
عليكم الله دى مش حاجه تحير؟ لجنة شنو؟ وتحريات أيه؟ وبتاع مين؟ هسه الموضوع ده عاوز ليهو لجنة؟ هو فى (كم زول) فى السودان ممكن يبيعوا ليهم (خط طيران) ؟ وكم زول ممكن يكون عندو أوراق ومستندات (تقنع المشترى) بإنو هو شخص مخول ليهو يبيع الخط ؟
وبعدين المشكلة وين؟ هى كيمياء .. الحكومة (إتنشلت) ووجدت الحاجه النشلوها منها (قاشر بيها زول تانى) .. خلاس تخاطب (الزول التانى) ده بصورة رسمية وقانونية وتطلب منو إنو يوريها (الخط المسروق) ده جابو ليهو (ياتو حرامى) !!
غايتو على الشعب السودانى الفضل أن يمتثل إلى الحكمة الصينية القديمة التى تقول : (يهاو فينج زهاو ينج بينج) وترجمتها الحرفية (الجاتك فى خطك سامحتك) !
كسرة :
لولا أن (التومة الوداعية) الشافت شركات الحكومة (الرايحة) فى العمرة ولسه ما جات .. كان ختينا ليها (النية) عشان تشوف لينا الخط ده (النشلو) منو؟ .. بعدين يا جماعة مع (رايحاتكم الكتيرة دى) حقو (التومة) دى تشغلوها معاكم إن شاء الله (مستشار لمعرفة الرايحة) !!
الفاتح جبرا 
بسم الله
والله أنا اتخلعت خلعة، ولو أديتني قدر التلاتة سنين دي ما أفهم ليك الكلام ده حصل كيف!!!!!!!
إنت عارف أنا كنت حالف طلاق ما أكتب تعليق تاني في زاويتك المشاترة دي، لأني زعلان منك وإنت بتساعد الأمة دي تفش مغصتها، وتاني ما ح نلاقي لينا زول ممغوص يقلب لينا الحكومة دي!!
لكن الأجاويد أقنعوني إنو حليفة الطلاق في الحاجات دي ما ماشة، وتحت تحت كده قالوا لي إنت أساساً ما معرس!!!؟؟؟
والله السودانيين بقوا شفوت، يا الحكومة هبلة.
دى قوووويه يابروف ,معقوله نحن فى بلدنا الطاهره دى يحصل كدا ياجبرا ماتصعب الموضوع
نحن شعب وحكومه ومواطنين نضاااااااااااااااااااااااااااف
بعدين شكلو البيع والسرقه الفى الارض ما كفت قاموا الحراميه يسرقو فى السماء
ان شاء الله لو الموضوع دا صاح الحرامى دا يلاقيهو صاروخ طاير ويفرتقو حته حته وزنقه زنقه وشيك شيك
عزيزي الفاتح
ياخى عزبتهم لو سمحت ريحهم شوية
يا استاذ انا حلمت لي بي عرض على الخط الانسرق مساحة 500 متر ناصية بي مبلغ محترم لو عندك مشتري اديني رنه ولو قالوا ليك بكرة قسموه حي دبلوماسي ما تتخلع
قالوا سيد الرايحة بيفتش خشم البقرة ..
أوع يكون الخط دا راح فى خشم واحدة من البقر الإتبرع بيهو الرئيس لإخواننا المصريين..فاكرين كان كم بقرة ؟
معقول الخطوط الجوية السودانية كانت بتوصل لحد هيثرو ؟ أول مرة أعرف المعلومة دى .. تلاقيها يوم تكون عندها رحلة لمطار هيثرو تلخبط عليهم الجدول كله..
أخونا نبيل منصور .. سؤال سغيروووونى كدا ..وإنتا ما كنت عارف روحك إنك ما معرس؟ ..القومة ليك..
يابروف عليك الله ما تجننا … خط هيثرو !! خط هيثرو!!
هسي ((سودا……)) كان رجعوا ليها الخط بتقدر عليهو؟!!!
هن كلهن كم طيارة؟
عد غنمك ياجحا !!!!
البرووف جبرا . والسمار
سلامات .
هو السودانيين لودايرين يسافرو الجزائر إلا عن طريق مصر يكون خط هيثرو دة بتاع المسافرين الصين .ولافى ناس بتمشى هيثرو راسم عديل .يكونو شافوهو خط ميت وماجايب حقو زى خط بحرى – عمر المختار وماعندو ركاب والطيارة دايرا ليها شهر عشان تتملى.
يازول الناس ديل حاجة فيها فايده ماببيعوها إلا لوكانو دايرين يشتروها لى شركاتم الخاصة زى صاحبك عباس .
الحبيب جبرا..سلامات..
وطيب ناس الجمارك وين!؟؟ بس فالحين يمسكوا عربية ابتسام!
ما يمسكوا الخط دا !!؟
سلامات ..
اها – باعوهو بالكيلو ولا مقطعيه ساكت – باعوهو ماشي وجاي ولا فرده
يعني ممكن الواحد يكون مسافر لندن .. يلقى نفسو في تندلتي ولا كيف ؟؟؟
هوي يا يس .. اللخبته شنو ؟
جدو سلاوي – بالراحه على الراجل .. هو يلقاها منك ولا من الجرتق
سهيل بن سهيلة السهلى .. حمدن لله على السلامة ..
السلام عليكم ، البرف و الاخوان ، هم باعوا الخطوط كلها تجى تقول لى هيثرو ، طيب ما ننزل فى بارى ونركب قطر تحت المويه ، اهى تجربه ، سؤال خبيث طيب لكن باعوا الخطوط كلها عارف ما عارف انو اللعبه حتكون فى ياتو خطوط ………… عجبى
والله لو فهمت حاجة أتنطر .. !! باعو الخط كيف يعني؟ داير لي فهامة .. يعني كان عندنا في السما شارع حقنا قام جا واحد (قوي أمين)باعو؟ .. وباعو لمنو .. خطوط تانية ولا سااااي كدا عشان يقولو العريس عندو خط الخرطوم هيثرو .. يا جماعة الخير واحد ناصح كدا يوقعا لي .. والله الناس ديل حيرونا عديل كدا .. زمان كا لما الواحد يبالغ يقول ليك باع ليهو الترماي .. ديل باعو شارع النص في السما .. الله يورينا فيهم يوم ..
أنا أقترح نجيب خبير خطوط عشان يشوف لينا الخط دا مين باعو ..
مرسى الزناتى .. إتهزم يا رجالة ..
الأحباء الأعزاء :
تعليقاتكم بقت (بى كرتين) .. !!
أقترح هذا الأقتراح الخطير و ادعو المجلس الوطنى لمناقشته و تمريره وهو أنشاء نقاط بسط أمن جوى وذلك لفرض هيبتنا التى تبعثرت وتطايرت فى الأجواء ولقطع الطريق لكل من تسول له نفسه لسرقه خطوطنا الجويه مع الحرص على المراقبه الأرضيه لأنو بالطريقه دى يوم نصبح نلقى مطار الخرطوم بقدر قادر بقى مطار أنجمينا أو مطار جيبوتى…. وبمناسبه الخطوط عندى سؤال ممكن أسأل؟؟… انتو خطوط السكه حديد بتاعه مشروع الجزيره مشت وين؟؟؟
تحياتى
البروف وضيوفه الكرام … ألف تحية وسلام
يا بروف تجي آخر زمن وتكتب عن طيران الشمس المحرقة – آسف المشرقة
كنت وين ايام كانو يتكلموا عن فضائح سودانير في رحلات الحج وفي تفويج المعلمين آيام الإجازات وفي الطيارات التي تسقط كل شويتين وتكتل الناس بسبب الإهمال وعدم الصيانة؟ مثالب سودانير أكبر من سرقة خط لا يعلم أحد بوجوده ولكن كيف نهتم بسرقة خط وهمي وقد سرقت مننا مليون ميل مربع… هل تشعر وأنت في الشارع بأنك في وطنك وأن أي واحد في الحلة يعرفك؟ هل تعرف معظم من تتعامل معهم في الشارع؟ اقد سرقوا وانت تتكلم عن سرقة خط وهمي فهل هذا صرف نظر أم ماذا؟
هوي يا حاج أحمد، أنا أساساً عارف الحاكمني منو؟ ولا أنا سوداني ولا بنغالي؟ ولا حتى الزكاة والضرائب والجماااارك ورسوم طريق الإنقاذ الغربي وإيجار عدادات الدفع المقدم ( الأنا أصلاً مشتريه ) ولا دعم صندوق دعم الجريح ولا دعم صندوق دعم جامعة المغتربين ولا بدل الدمغات ولا بدل نفقة خبراء اليوناميد ولا بدل ما نشحد ولا عوائد البيت ولا رسوم اللجان الشعبية ولا رسوم مجلس الآباء ولا رسوم يوم الأحد (طبعاً كانت السبت) ولا بدل ما نشحد ولا نفرة مسجد الشهيد ولا رسوم دعم عمال البلدية بحارة العباسية ولا رسوم النفايات ولا رسوم التلفونات ولا نفقة التعليم والصحة والتموين ولا القيمة المضافة ولا تسديد ديون الحكومة البغشّوها ونحنا بندفع بدلها ولا … ولا … أنا الحاجات دي ما عارفها ماشة وين لا ليه أنا أساساً بدفعها، لما أعرفها بعداك التسألني أنا معرس ولا لأ.
سلام يا شمباتي
ناس الجمارك طلعوا بيان ( زي بيانات همت ) إنو الخط ده كان خاشي إفراج مؤقت، واتزورت أوراقو واتباع لي سودانير الغبيانة، ولما طالبوا سودا-طير بدفع الجمارك، مديرها قال: لك لك لك؛ إنتو قايلني إبتسام؟!! نحنا دافنينو سوا..
أها الجماعة رجعوا الميناء وحلفوا ما يخلوا يبيت ليه يوم في مطار الخرطوم وقفلوا في حاوية لامن صدأ..
بعداك الخواجات عايزين قروشهم، وما شايفين حشرات سودا-طير بتجي عندهم، ولما عملوا للجماعة زنقة زنقة، المفتحين طلعوا قصة إنو الخط إتسرق، وكده تشربها شيكان للتأمين ( مش برضو حقتهم؟ )…
اخي جبراوالاخوه الاعزاء
سلااماااااااات
(يهاو فينج زهاو ينج بينج)(هوهاينج هناج سيناو تينج )(الجاتك فى خطك سامحتك)(ونحن السرقناهو عشان راقدين لينا فوق راى)طيب رئسكم دى نرجعوا ليكم كيييييييف مابلخط المسروق دى
نيهاو نيهاوما شي ست يسي لو جيما جان جاو لونغ جي يوكي او شاو كيو لي لونج شان جان شي سي بي تو اونكيان لارون بي هاو تو الما جي اشو شا شيو شينج كيو او ان لونج تاوني ليتو ايس هاو جونج كيم ايل سونج جاينمن هو جنتاو ما سي تونغ جاكي شان نيهاو يه ابو.
دا الكلام الكنت عايز أقول يا أخونا عمرابي .. خاصة الختة بتاعة: (الما جي اشو شا شيو شينج كيو) إتخيل بالله الحال وصل بيهم لياتو درجة .. ويا ريتهم يقيفو لينا في الـ شيو شنج الخوف من الـ هاو زونغ تيا .. غايتو البعين الله .. وشكرين ليك يا أخ عمرابي .. جي هاو .. !!
سهيل..سلام..
اللخابت انحنا اهلها,وبنستاهلها ! كع..
منصور..سلام..
قلت لى ما عارف؟؟ولا زايغ من العرس دا سااااااااى؟؟
اما عن ابتسام فكلنا ابستام,,اسما ومعنى وتجنى!
عمرابى وطارق..سلام..
تطلعوا براكم ولا اجيكم بى كراكتى!؟؟
خلاس ركبتوا خط اليروح ما يرجعش؟كع
أخونا ياسين طارق أب أحمد بريء براءة الذئب من دم إبن يعقوب .. أنا إبن يعقوب أب أحمد .. فما تهجم الزول ساي .. اللوم علي براي.
الاخ أب أحمد””
و الله انت عقبت على كلامي بصورة خلتي انا الكاتبو ذاااااتي ارجع اقراه مرة ثانية يمكن افهم قدر الفهمتو انت لدرجة انو انا قاعد اقرا و اضحك بصورة هستيرية لا يمكن ان تتصورها. عموما انا حاليا في زيارة عمل للصين وصلت السبت وبرجع السبت باذن الله تعالى و لغاية يوم الرجوع ح اقعد اراقب اي صينيين بتكلمو و اتخيلك بتحلل في كلامهم بس انا خايف من يضربوني كونغ فو من كثرة الضحك.
أستاذ جبرا،
لك التحية و بعتذر عن كلامي الجانبي مع اخونا اب احمد بس لانو ما عندي عناوين الاخوان الخاصة للمراسلة.
السمار الاعزاء،
لكم العتبى حتى ترضوا.
الاخ ياسين،،
خط اليروح ما يرجعش اوعى يكون خط الصين……. الـلـــــــــــه يســـــــــــــــــــــتر…..
الحبيب عمرابى..سلام..
ما عليك يا طيب,وهنا محل الونسة واللخبتة وكلو,اصلا حوش البروف دا عملو لى كدة,,ولا مو هيك يا بروف؟؟
وخليك قريب..
اب احمد..سلام..
امانة ما اتلومت ورقدتنى سلطة! اسه نفرزكم كيفن!؟؟ وانتوز الاتنين طلعتوا لبالب فى الصينى ! ابرا منكم..
ياالبروف خلعتنا باعو الخط وهيلمانه انت نسيت انك فى بلد الانجليز ولا شنو اليشوف الخلعه الفى كتابتك يقول الحرامى اتقبض فى بلد الانجليز
البروف ثرو ألشنباتى و اب أحمد التايوانى
苏丹航运公司Sudanlaenz友好Ibkron问他们（在世界上最高效的航运守和承诺方面公司）现在有轮船朱迪保留Alihamn司法机关，以满足工人的权利后，他们的船只数十
هاك الخطوط دى
الخطوط البحريه السودانيه سودانلاينز ودى أسألوا منها أبكرون (من أكفأ شركات النقل البحرى فى العالم من حيث الدقه فى المواعيد و الإلتزام ) الآن تملك الباخره الجودى المحجوز عليهامن القضاء للإيفاء بحقوق العاملين بعد أن كانت تملك عشرات السفن
سكك حديد السودان (الدوله تملك الخط الحديدى بينما الشركات تملك الخطوط الناقله)
موبيتل خطوط و شرايح بيعت لزين و ما تبقى لسوداتل بيع أيضا بيعه مدغمسه
يأخ طارق والله دخل علينا واحد بيشبهك ولخبت أخونا شمباتى وقعد يرطن مع عمرابى نامن حيرونا ليك لكن أخونا شمباتى كان داير يلاقطن لكن الله ستر وحجزوهم وفى النهاية نرحب بالاخوان عمرابى وأب أحمد وإنشاءالله القمردينه تعجبم ويزورونا فى الحوش البى غادى (سوداننا).
قلت لى ياعمرابى أبأحمد ده أقنعك؟؟؟…
الحمد لله طارق أب أحمد (المستورد) جا .. والله يا طارق إسمك لحق عربية إبتسام .. الله يستر عليك من ناس الجمارك .. وتقبل سلامي
يا زول من الآخر كدا .. خطوط الطول والعرض حقت السودان كلو كانت كيف لما إستلموها … شوفا
هسة إتبوجنت كيفن؟؟ والله ديل حيروا إبليس ذاتو !!
حنين وحياتك أنا ما (واحد) دخل عليكم .. أنا من زمن كانت المدونة أبيض وأسود .. لكن ليك حق تقول (عدس)
أنا افتكر دا كلام بوبار وفشخرة من ناس سودا طير قال أيه دايرين يورورنا انهم بمشوا هيثرو هم قايلين القصة فوضى كده سااااااااااااااكت – مطار هيثرو البقدرهم عليه شنو كفاهم يقطعوا البحر الأحمر دا ويجوا راجعين وكفانا فضائح – قالوا مرة فى واحد فى مطار القاهرة سأل من مواعيد الطائرة السودانية ح تجى متين رد عليهو الموظف المصرى ( دى ستهم تروح على كيفها وتجى على كيفها) قال هيثرو قال
اب احمد..سلامات..
لكن اختفيت كدة مالك؟؟ عليك الله خليك قريب..
السلام عليكم صراحه يا استاز ساخر سبيل لي زمن بسال نفسي قصدك بي خط هيثرو دا شنو عشان تعرف انو في الكثيرين من امثالي ماعندهم خبر بالخط وبعدين بالامانه الجماعه ديل خط الاستواء بكونو سمسرو فيهو ولا اكونو باعوهو زاتو
والله محن ومحاين
نعم انا كنت حزين جدا ولكن الان شكرا على الابتسامه الحزينه التى تركتها لى قسم لم اضحك على نفسى منذ عام كما ضحكت اليوم
ايه رايك اسرق خط جبرا ؟؟!! وتثبت لي عمود وكسرات انا ناوي اسرق عمودك واريحك واريح ناس التوجه الحضاري ذاتم
ابو مازن
سلام عليكم
والله الاتسرق من البلد ما شويه خط هيثرو وسودان لاين كان تمتلك اسطول بحرى لايقل عن 24 باخره اليوم لا تمتلك غير واحد ومحجوزه كمان .. باقى البواخر وين؟؟؟ وهو النائب العائم يحقق فى شنو ويخلى شنو وغريبه انو ماعندو ولا مساعد زى جامعه كده من كتره المساعدين مابقعو فى الحفر
عندي استفسار !!
بعد ما اتباع الخط الخرطوم هيثرو بقي بقي شنو ؟! ؤلا اتباع و خلاص ولا الفهم شنو ما قادىه اركزها كويس القصه دي !!
إتشابكة الخطوط بالرقم من معرفة الثابت فيها والمتغير ومن الملاحظ خط احمر متحرك وخط مؤتمر وطني شبهة ثابت حمرة عين وخط فاسد وخط نافع وهنالك خطوط في الداخل متباعدة نعمل رسم كركي لكي تتقارب ودي خطوط وهنة (ضعيفة)بالرسم كيف تقويتها نطلب كل واحد منا ان يرتبط بخط لكي تقوي هذا الخطوط لإبعاد خط المؤتمر الوطني اولآ ومن ثم المحاسبه من المسؤل عن بيع هذة الخطوط وهم كثر
عووووك حرامي
وكل يوم يطلع البغل علينا ويقول البلد مفلسه في زول عارف علي محمود دا داير مننا شنو
انا طبعا الكضب حرام والقلب قدام لكن جانى صوت فى المنام امبارح بعد مقريت عمودك ونمت قالى السرقوهو اتنين ودكتورين واسماهم بتبدأ بالعين يعنى ممكن يكونو عبالله وعبدالحليم !!!!!
السلااام عليكم جميعا
الاخ جبرا والاخوه الكرااام
فعلا احنا مسوقين ومنهوبين لكين احنا كمان بنستاااهل كنتو وين عند توقيع اتفاقية السلام وبند تحديد المصير
كنتو وين لمن مات الزبير كنتو وين وكنتو وين ياااادوب فهمتو ووعيتو وبقيتو من اصحااب العقول النيره والسياسيه
الموضووع ما موضووع خط ولا غيرو الموضوع اكبر من دا كلو احنا شعب بنحب الكلام والنظريات والوقت المفروووض نتكلم فيهو بنعمل نايمين ونجي ندندن بعد فوات الاوان دي حقيقة الشعب السوداني للاسف شعب الكل فيهو مدير وسياسي وفاااهم وعااارف كل شي
وما تنسوا انو الجزاء من جنس العمل
عادى خط خطين تلاته اصلأ نحن عندنا طياره تصل هنالك وحاتك حدها شلال السبلوقه وبردلب تقع خلي يبيعو اى حاجه ولكم الصبر وحسن العزاء
ديل سرقو امة باكملها غالبن يسرقو ولا يبيعو خط !!!
والله ده كلام عجييييب هثرو مره واحدة ما لقو غير خط هثرو ده يسرقو (والله يالسودانين وريتونا)
عظيم وودتي وإحترامي لك
سلام الله عليك
حدث لي موقف مع عسكري مرور حيث كنت في سيارة يقودها أحد أصدقائي
.الموقف :
في احدى الاماكن بالخرطوم دلف صديقي بأحدى الشوارع الفرعية بسيارته
فإذا بصافرة شرطى المرور تدوي من تحت شجرة ظليلة إستطاعت أن توظف كل إمكاناتها لحماية العابرين من البشر من ليهب الشمس الحارقه .
إلا أنه أى شرطي المرور فقد كان يستغلها أسوأ إستغلال , ليصطاد فرائسه بعد التخفي تحتها
المهم .. وبعد ان أمرنا بالتوقف
: الشرطى
إنت ما عارف ده إتجاه واحد
: الصديق
أبداً والله يا جنابو أنا أول مره أجي الحته دي . لم تشفع توسلات صديقي للشرطي الذي كان منتشياً بالمخالفة
……و بنظره خاطفة تفحصت الشارع و تأكد لي بما لايدع مجالاً للشك بأننا أمام عملية نصب حكومي منظم
و بدأ يعد لتحرير مخالفة مرورية
( بادرته بالسؤال عما ينوي فعله . اجابني بأنه سيحرر غرامة فورية واجبة السداد و إلا……… ( طبعا معروفة المرمطة
قلت له بأنه لن يدفع وإذا أراد ذلك فسأمنعه من أن يدفع مليماً أحمر لان صديقي مواطن صالح و يحترم القانون
و انا محامي أيضاً و التزم بالقانون
لم تتغير لهجته وحدته و طلب مني ألا أتدخل لأنني لست معنياً بالأمر
فطلبت منه ان ياخذنا لقسم الشرطة
فرفض بحجة انه مكلف بمهام أخرى …
و لا ادرى ماهيته هذه المهام و لكن كانت على ما يبدو الوقوف تحت الشجرة واصطياد الفرائس
و أمام إلحاحي .. سألني لماذا ترفض الغرامة . قلت له : ولأنك أيضاً تعرف الإجابه …
فهذا الشارع ليس فيه أى لافته تبين أنه لإتجاه واحد .. و أنا على إستعداد للذهاب معك مش للقسم وبس …دي بصل بيها معاك للمحمكة العليا .
طبعاً أخونا للملم أطرافه وهدأت ثورته , … و أدار لنا ظهره …..قائلاً ..المره دي عفيتك , لكن برضو أعرف إنو ده إتجاه واحد …
كسره : يا شرطة المرور ….قروش الغرامات دي بتمشي وين ؟ ” طيب ما تعملوا بيها لافتات .
أشرف أبوعكر المحامي / لندن
عظيم وودتي وإحترامي لك
سلام الله عليك
حدث لي موقف مع عسكري مرور حيث كنت في سيارة يقودها أحد أصدقائي
.الموقف :
في احدى الاماكن بالخرطوم دلف صديقي بأحدى الشوارع الفرعية بسيارته
فإذا بصافرة شرطى المرور تدوي من تحت شجرة ظليلة إستطاعت أن توظف كل إمكاناتها لحماية العابرين من البشر من ليهب الشمس الحارقه .
إلا أنه أى شرطي المرور فقد كان يستغلها أسوأ إستغلال , ليصطاد فرائسه بعد التخفي تحتها
المهم .. وبعد ان أمرنا بالتوقف
: الشرطى
إنت ما عارف ده إتجاه واحد
: الصديق
أبداً والله يا جنابو أنا أول مره أجي الحته دي . لم تشفع توسلات صديقي للشرطي الذي كان منتشياً بالمخالفة
……و بنظره خاطفة تفحصت الشارع و تأكد لي بما لايدع مجالاً للشك بأننا أمام عملية نصب حكومي منظم
و بدأ يعد لتحرير مخالفة مرورية
( بادرته بالسؤال عما ينوي فعله . اجابني بأنه سيحرر غرامة فورية واجبة السداد و إلا……… ( طبعا معروفة المرمطة
قلت له بأنه لن يدفع وإذا أراد ذلك فسأمنعه من أن يدفع مليماً أحمر لان صديقي مواطن صالح و يحترم القانون
و انا محامي أيضاً و التزم بالقانون
لم تتغير لهجته وحدته و طلب مني ألا أتدخل لأنني لست معنياً بالأمر
فطلبت منه ان ياخذنا لقسم الشرطة
فرفض بحجة انه مكلف بمهام أخرى …
و لا ادرى ماهية هذه المهام و لكن كانت على ما يبدو الوقوف تحت الشجرة واصطياد الفرائس
و أمام إلحاحي .. سألني لماذا ترفض الغرامة . قلت له : ولأنك أيضاً تعرف الإجابه …
فهذا الشارع ليس فيه أى لافته تبين أنه لإتجاه واحد .. و أنا على إستعداد للذهاب معك مش للقسم وبس …دي بصل بيها معاك للمحمكة العليا .
طبعاً أخونا للملم أطرافه وهدأت ثورته , … و أدار لنا ظهره …..قائلاً ..المره دي عفيتك , لكن برضو أعرف إنو ده إتجاه واحد …
كسره : يا شرطة المرور ….قروش الغرامات دي بتمشي وين ؟ ” طيب ما تعملوا بيها لافتات .
أشرف أبوعكر المحامي / لندن