حقيقة لم أجد في هذا اليوم أهم من فوضى وإرتفاع أسعار السلع الضرورية موضوعاً يستحق الحديث عنه، فالمسألة أصبحت غير محتملة وتجاوزت المنطق والمقبول ، ما هذا الإرتفاع الغريب في أسعار اللحوم والخضروات وبقية السلع الضرورية من زيت وحليب وخلافه هذا الغلاء المضطرد الذى تشهده السلع الغذائية من أسبوع إلى أسبوع.. وربما من يوم إلى آخر فقد أصبح معدل أسعار المواد الغذائية والسلع في أسواقنا في تصاعد مستمر.. وبمعدلات غير مسبوقة أصابت المواطن بإندهاش ممزوج بالقلق وهو يرى بأن دخله قد أصبح غير قادر على مجابهة هذه الزيادات في الأسعار وأنه لم يعد قادراً علي توفير أبسط متطلبات الحياة التي يحتاجها الإنسان له ولأفراد أسرته في ظل هذا الجشع وهذا السعار في الأسعار إذ أن اسعار الكثير من السلع الرئيسية في الأسواق قد تجاوزت حدود المعقول.. إذ وصلت نسبة الزيادة في بعضها إلى أكثر من الضعف (100%)
لقد كان الفقراء في بلادى ومحدودو الدخل يعتمدون في وجبتهم الاساسية على (سلطة الطماطم) بالبصل الأخضر والعجور والليمون والجرجير (مع شوية زيت سمسم) ! الآن أصبح الحصول على هذه الوجبة لأفراد أسرة متوسطة يكلف فوق الثلاثين (ألف) من الجنيهات … (بدون العيش والدكوة) !!
أغرب ما في الأمر أن ولاة الأمر والأمر هكذا والقصة (وصلت العضم) نجدهم سادين دى بي طينة ودي بي عجينة علي الرغم من إن لقمة العيش و(قفة الملاح) هي الأساس فى حياة المواطن وهي المؤشر الحقيقي في النهاية لنجاح أى سياسات بغض النظر عن أي اعتبار، وقد قلنا مراراً وتكراراً بأن الأمور حين تصل إلى صعوبة توفير (هذه القفة) سوف تبزغ مقولة (الجوع كافر)، وبالتأكيد لا تخفى عليكم دلالات هذه المقولة..
من الغريب والمدهش ألا أحد من المسئولين قد خرج إلى الجمهور عبر أى من الوسائط الإعلامية ليبرر لنا هذه (الزيادات الفاحشة) فى أسعار السلع الضرورية .. وصل سعر كيلو اللحم الضأن إلى قرابة الأربعين ألف جنيه وتعدى كيلو اللحم البقرى الثلاثين .. كما وصل كيلو الطماطم إلى العشرين (ألف) جنيه وقد طال هذا الغلاء الفاحش أسعار بقية أنواع الخضر في بلد شعار قادته (نأكل مما نزرع) !
كل الأشياء التى ترتفع هنالك (نقطة تدخل) يتم فيها التدخل لإعادة الأمر إلى الحد الطبيعي حتى لا تحدث كارثة .. فمثلاً إذا تجاوزت حرارة جسمك الحد الطبيعي (36.8 مئوية) بدرجة أو درجتين فلا مشكلة إلى إنها إذا وصلت إلى حد أعلى غير طبيعي (تعدت الأربعين مثلاً) فهنا لابد من معرفة السبب وإعادتها إلى طبيعتها حتى لا تحدث كارثة .
وكذلك إن زادت سرعتك وأن تقود سيارتك وتجاوزت الحد المسموح به فلابد من وجود (نقطة تدخل) يتم فيها التدخل من قبل (شرطة المرور) لإلزامك بالقيادة وفق السرعة المسموح بها !
فى معظم الأشياء القابلة للإرتفاع نجد أن هنالك (نقطة) يتم فيها التدخل من أجل إعادة الأمور إلى نصابها الطبيعي .. والعبد لله يتساءل متى تقوم (الحكومة) بالتدخل لإعادة أسعار هذه السلع إلى وضعها الطبيعي،
يعنى مثلاً (لمن كيلو اللحم يبقى بي كم يعنى؟) ! أو لمن (الطماطماية تحصل كم؟) !!
إن هذه الموجة من الغلاء وإرتفاع أسعار السلع الضرورية سوف يؤدي بالقطع إلى تراجع الطبقة الوسطى (لو كانت لى هسه قاعدة) في المجتمع وزيادة نسبة شرائح محدودي الدخل الذين يشكلون حالياً معظم (الشعب السوداني الفضل) هذا غير إزدياد شريحة (معدومى الدخل) مما يساهم في زيادة معدلات الجريمة بأنواعها وتمزق النسيج الإجتماعي (اللحق الصح) !
أعذرني أيها القارئ الكريم إن لم تجد في هذا المقال اليوم مبتغاك من الفكاهة و(السخرية) فالصمت لم يعد مقبولاً ،إذ إن الغلاء الفاحش ينهش المجتمع، ويفتك بدخول المواطنين الذين يلهثون وتكاد أنفاسهم تنقطع دون أن يستطيعوا ملاحقته وما يزيد من هذه المعاناة أن التوقعات تنبئ عن مزيد من (الإرتفاع) في الأسعار وأن تكلفة المعيشة ستكون أعلى وأصعب فيما هو قادم من شهور, وهذا ليس له إلا معنى واحد هو أننا مقبلون على (معيشة ضنكاً) !
كسرة :
القصة ماشة بايظه .. ربنا يجيب العواقب سليمة !!
الفاتح جبرا 
يا الفاتح الطماطم في السودان بقت رفاهية
شوف عيني الطماطم جايا من مصر بالطيارة الكيلو *1.5 قالوا لسيدا ورقك ناقص ، وعفصوها ليه في الحاويات بتاعت النفايات ، وعمك راح يدعو عليهم واحد واحد .
الشعب السوداني جزء من هذه الماساة لايعرف حقوقه ولايطالب بشئ ولاندري الي متي……………………؟
ولسوف نخرج للشوارع شاهرين هتافنا .. ولسوف تلقانا الشواراع بالهتافات المضادة لعساكر .. والمساخر .. والخنوع … هذا هو التدخل الوحيد الذي سوف يجعل الحكام ينتبهون إلى أن هنالك حنكاً مشقوق قد ضاع .. أحسن نقولها واضحة وما نلف وندور ولا شنو يا بروف ؟ ما أخذ بالقوة لا يسترد إلا بالقوة .. وما ربيع الثورات العربية علينا بجديد .. فينبغي أن نكون نحن الشعب المعلم .. فلنقوم من سباتنا لهذا المعلم ونوفه التبجيلا ..
سلام ياقبيلة،،
أنت لسه يابروف حا تقول مقبلون علي معيشة ضنكا، ده نحن بقينا في لب المعيشة الضنكا ولسه كمان سيكون هنالك معاها حشر يوم القيامة عميانا” كما قال ربنا سبحانه وتعالي لمن فك الدرب وسك الدنيا، ومافيش بوظان أكتر من كدا، فلا حكومة ولا جنس مخلوق يستطيع تبديل هذه المعيشة الضنكا ألا بتبديل وتغيير المواقف والأحوال التي بالنفوس، والعودة بالأنابة والتوبة للرب الغفور، (ان الله لا يغير ما بقوم حتى يغيروا ما بانفسهم واذا اراد الله بقوم سوءا فلا مرد له وما لهم من دونه من وال ) سورة الرعد آية (11)، فالذي تعيشه الأمة ياصديقي هو نتاج ضرب أيديهم من الفساد والأفساد، وهو جزء يسير بما كسبت أيديهم من جنس فعائلهم وظلمهم لأنفسهم بتركهم طريق الحق المستقيم وأتخاذهم السُبل الأخري التي ذهبت بهم الي ماهم فيه الآن….
قال تعالي في محكم التنزيل الآية (124) من سورة طه (وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَى (124)…
والطامة الكبري هي تلك التي ستصيب الناس كافة ولا تستثني منهم أحدا” لأن الناس أصبحوا كبني أسرائيل لا يتناهون عن منكرٍٍ فعلوه والعياذ بالله، كما قال الحق جلا وعلا في شأنهم في سورة المائدة الآيات 78-79 (لُعِنَ الَّذِينَ كَفَرُواْ مِن بَنِي إِسْرَائِيلَ عَلَى لِسَانِ دَاوُودَ وَعِيسَى ابْنِ مَرْيَمَ ذَلِكَ بِمَا عَصَوا وَّكَانُواْ يَعْتَدُونَ (78) كَانُواْ لاَ يَتَنَاهَوْنَ عَن مُّنكَرٍ فَعَلُوهُ لَبِئْسَ مَا كَانُواْ يَفْعَلُونَ (79) )
وفي سورة الأعراف الآية (155) علي لسان موسي عليه السلام يقول الحق تبارك وتعالي (وَاخْتَارَ مُوسَى قَوْمَهُ سَبْعِينَ رَجُلاً لِّمِيقَاتِنَا فَلَمَّا أَخَذَتْهُمُ الرَّجْفَةُ قَالَ رَبِّ لَوْ شِئْتَ أَهْلَكْتَهُم مِّن قَبْلُ وَإِيَّايَ أَتُهْلِكُنَا بِمَا فَعَلَ السُّفَهَاء مِنَّا إِنْ هِيَ إِلاَّ فِتْنَتُكَ تُضِلُّ بِهَا مَن تَشَاء وَتَهْدِي مَن تَشَاء أَنتَ وَلِيُّنَا فَاغْفِرْ لَنَا وَارْحَمْنَا وَأَنتَ خَيْرُ الْغَافِرِينَ (155)
اللهم أنت ولينا فاغفر لنا وارحمنا وانت خير الغافرين..
توبوا الي بارئكم يرحمني ويرحمكم الله
تحاسبوا مين ولا مين ولا مين عقار فلل عمارات مرتشي ما سقط القناع أصبح هزيل …. أقولكم ما تحاسبوا نافع ولا لسه برده نافع ما ما أصبح عقار ….. ما خلاص الحرام أصبح حلال والغلط أصبح صحيح واللبن أصبح شحيح والرغيف أغلا من البلح و البلح أصبح مفيش والعرس دا مستحيل لأن السكن أصبح مفيش ، السكر في مصر شواله بيمية جنية .. طماطمم بفرد جنيه .. قاموا ثورة واحنا شوالانا بألف آلاف الجنيه والطماطم كيلو لحمة أوجداد زى فول مصلح كهرباء وموية طين أو بالعدم ننتظر لتنين صباحاً في أو لتاني يوم نصبح عطاشا وحيرانين ومغبرين ، إحنا ما بنطلب من جنابوا الريس بشير طلباً كتير أو مستحيل بس دخل المستثمر خواجة كان أو سعودي أو حتى صيني تشجعوهم ما تطردوهم ، والجمارك اعفي لينا الأدويا والأكل خلي شعبك يربا يسمن يمكن يوم يدعوليك ما عليك ، ورجع لشعبك كرامتو نحنا والله بنشوف العسكري ذي شيطان معاه داك الموظف نفايات ، أوضرايب ، أوعوايد زكاة أو دمغة جريح رسوم زراعة ، رسوم عتب محلية ترخيص بالغصب وأصلو لوما دفع ما بيرجع لرزقة تاني المغترب وتصدرير تراب ، أو تسالي ، أو خرد أوتصدير دمانا في علب ما مهم يا ريس بشير ما قلنا حاجة بس دايرين نعيش .. ممكن نعيش ؟ ثورتنا يا سائل هده هادي ثورتنا بس ثورة نفوس ماكترو لسه اتكتلوا ، وبشيرنا ناسى يوم آخرتوا بس يوم بتقوم ثورتو ……………. بس إنتو كيف تغضبوا كلكم أو تزعلوا .. أنا فرد ثائر براي .. بدورلي كم واحد معاي .. أصلوا البقت بقت ما بنخاف من عنصري ….. يركب محل الشجرة دي ….. لأني خلاص وعيت فهمت القصة دي .. لأني شاب .. مع احترامي لي شيخ القبيلة والعم والكبار بس بردو هم ما عرسو وجابونا نحنا ولعبو بالمال واتريسوا ، بتقول شنو ؟ اخوان مسلمين .. بتقول شريعة أصول ودين .. بس بس متقولش دين .. ودى مش شريعة دي زريعة نحن ما بنتخم نحن برده مسلمين .. قرينا دين .. بس دينكوا ده ما اسمه دين .. قرينا فقه قرينا قرءآن وسنة مندوب وواجب حرام بنهي مباح كمان ده كله دين .. ربنا كمان ما ربكم ربكم ما عرفناه مين يا مسلمين ……………….. بس حلكم ثورة يناير .. متكبرين … حتقول صلي واصبر وصوم والتزم .. حاقولك وقول لكل سني و متعصب لفكره ما بتفهمني إلا تتحك تكبر في الكتب والغبارات والعتالة والعرب الرعاة فالبطانة فهمك ضعيف ما مكتمل إكبر ما قلتوا منكر متزلوه .. نحن كفرة ما بنصوم .. ما بنصلي .. لأ إحنا صح أسأل عموم المسلمين ما تسأل حجازي ملان قروش سيارته بتطير بدون تروس ..
نهار سعيد (طبعاً دي مجرد أمنية لأني ما أظنه يكون سعيد)
زمان قال د. بشرى الفاضل على لسان المعلم مصطفى سيد أحمد:
الحزن غطى المسالك والدروب
مافي غير تلكع تسافر
شيل حقايبك وأمشي بينات الشعوب
فما من مخرج غير الرحيل من هذا البلد وتركه لهم يجوثوا ويعوسوا فيه
وما تقولوا لي بلدنا وثورة ومظاهرة وتغيير وتكفير وتفجير ،،، لأن الشعب السوداني أصبح أجبن من أن يغيير محطة بالتلفاز، ناهيك عن حكومة تحكرت على قلب البلد ونهبوها واتقسموا الحدود،،
وتقولون أنكم لا تسجدون لغير الله؟
بالمناسبة : أمريكا لسع ما دنا عذابها؟؟!!
أب أحمد: أصحى من النوم قد ولى زمن الإنتفاضات والإنقلابات والهتافات والشعارات
ود الخلا: أبنت فأفصحت ووفيت فكفيت وشخصّت الداء وداويت
أبوي الفاتح: كتلتنا بالمغصة
البروف والسمار .
سلانات.
يا أب أحمد .قول كلام غير دة . سقوط الحكومة مابرخى الاسعر .
والله ياجماعه بالجد الغلاء بقى طاحن ولو إستمر الحال بالطريقة دى لفترة حانجوع عديل …
ود الخلاء . المصيبة فى ناس بيفهمو الاية (أن الله لايغير مابقوم حتى يغيروا ما بأنفسهم ). بأنها الخروج للشارع وإسقاط النظام .
يا جماعة انا الشعب السوداني دا قنعان من خير فيهو و ما بطلع ثورة لو حتا كيلو اللحمة بقا بي مليون و الطماطماية بقت بي 100 الف يعني كل يوم نقول الحكومة سوت و عملت و المواطن يجي يقرا و يضحك و يمشي كانو الكلام دا ما بخصو
و اهلنا زمان قالو السواي ماحداث عشان كدا طالما نحن بنتكلم و ما بنوسي حاجة الحكومة دي حتكون فوق راسنا و حتعمل اكتر من كدا بي كتير ولمن يجي البشير يخاطب الشعب تلقاهم يهللو يكبرو وفرحانين ….
عليكم الله دي بلد يرفعو ليها علم
اخي جبرا والاخوه الاعزاء
المشكله والمصيبه الكبيره انو ناس الحكومه ديل ماحسين بالحاصل ده كله والزول نامن يكون ماحاسي مهما تقول وتكورك عوووووووووووك زول بسمعك مافى وماعليكم الا الدعاء وامنو معي (اللهم اغننا بفضلك عمن سواك -اللهم كل من كان له يد فى هذا الغلا ان ترده ردا وان تصده صدا وتجعله في اغلال لا تنفكه — امين )
جبرا : الليله نشفت الحكى عشان النشاف الحاصل فينا بوركت
كيف راجين من زول بوكسى المشاوير بيجيب ليه خدار الاسبوع بدون ما يعرف بى كم ؟؟
وكيف راجين من زول مدير المكتب بيدفع ليهو الكهرباء والمويه بدون ما يعرف الكيلو بى كم ؟
وكيف راجيبن من زول الوزارة بتدفع ليهو حق مدارس الشفع الخاصه يعرف السنه بى كم ؟
وكيف راجين من زول عمرو من استوزر ما وقف فى صف ولا جرى ورا حافله يعرف حالكم شنو ؟؟
وختاما انتو لسه راجين ؟؟ ياخى قومو لفو كده ولا كده ده شنو الشعب الصبووووووووووووور ده والله الصبر ذاتو بقى يضرب بيكم المثل .. سجم خشمكم ..
سلامات ..
زمااااااان قلتا ليكم عايز ابيع نصيبي في البلد دي – قلتو عيب … طيب هسي عليكم الله واحد يتفضل و ياخد نصيبي هديه .. عليييييييكم الله
الحبيب جبرا..سلام…
غلاء فاحش ! وهم الفحش والعهر والسُكر…
قالوا المسطول مشى للدكان يشترى طحنية,,بتا الدكان عايز يلفها ليهو فى جريدة,المسطول عاين للجريدجة لقى صورة المتعافى,,قال ليهو: عليك الله ادينى ليها فى يدى,,زولك دا بسفها ! وى
أخونا ود الخلا … نفسي يوم واحد تقول الحكومة دى غلتانة … إنتا طوالي محمل الشعب أوزار الحكومة … ياخى حرام عليك .. قصة ظلم الناس (الشعب) لأنفسهم وتركهم طريق الحق دى خليها يوم واحد قول إنو الحكومة هى التى تركت طريق الحق .. عليك الله يا باشمهندس يوم واحد خليك واضح يا جميل
حبك حبك يا جميل,ساهر بى والليل طوييييييل..
الأخ الفاتح..المشكلة كمان مش فى إرتفاع الأسعار ..المشكلة فى تفاوت الأسعار من بقالة لبقالة. أمس عواطف قالت لى جيب معاك حليب بدرة ..لامن رجعت وعرفت السعر الجبتو بيهو قالت لى غشوك ودفعوك 15 جنيه زيادة..قلت بينى وبين نفسى حسبى الله ونعم الوكيل لأنو المسافة بين البقالتين كانت أقل من خمسين متر …
أخونا ودالخلا .. يعنى تفتكر لو الشعب السودانى الفضل كووووولو بقا أخوان مسلمين وصامو الستوت وسبحو بالليل والنهار هل ستعود الأمور إلى نصابها والأسعار تنزل الواطة..ونرجع زى زمان ؟ وهل الفساد الحاصل دا سببه هو الشعب المغلوب على أمره ؟؟ المساجد والحمد لله مليانة بالمصلين والركع السجود..ولسه الفساد موجود وزايد كلو يوم..ووصل حد المناقشة على القنوات الفضائية وصفحات الجرايد..يبقا الشعب ذنبو شنو ؟
هبشة سغيروووونة ..الآيات المذكورة أعلاه دى قاصد بيها الشعب ..ولا ولاة الأمور؟؟؟؟
ثورة الانقاذ الجات عشان الدولار مايحصل 20جنيه يعنى عشرين قرش بالجديد
وعشانا امريكا اختينا دقيقنا كتير بكفينا
اقول ليكم حاجة اريتم كان خلونا نغرق على الاقل كان غرق الشعب كامل بى كرامتو مش قطعو ورمو يغرق مجزاء
السلاوى :
بالله الرسيل لى لبن البودره ده احكى لينا عنو بتوسع شوية لانو انا حارقانى الخمستاشراية لكن ما بنفس القدر بتاع المرسال هههههههههههههه نتلاقى السبت كان الله هون .
العزيز جبرا :
من مصلحة اى نظام فاسد ان يبتعد الشعب عن الله مسافة كافية كى يبتعد الله عنه كدى بالله شوف اى شعب قرب من الله الحصل لى حكامو شنو ؟؟ ما نحن فيه عملية مشتركة اسهم فيها الحاكم بابعادنا عن الله فى معاملاتنا التى اصبحت كلها كذب وربا ونصب واسهمنا نحن فى التغاضى عن حقوقنا لعدم قيامنا بواجباتنا كاملة . الحبيب ود الخلا خايف يقول الحكومه غلطانه ويدعو عليها يقوم ربنا يستجيب ليهو وهو رجل مستجاب الدعاء بحلال ماكله ومشربه يقوم الملمح الاسلامى الفضل يروح الحبيب ود الخلا يحتاج لجهه ثانيه تبث فيه الثقه ان الاسلام لن يزول بزوال الانقاذ .
اخى ود الخلا سلامات
عايزه اقول ليك خلى واحد من ولاة امرنا ينوم تحت ضل شجره وشوووووووف براك البيحصل ليهو شنو وحدد الشعب البعيد عن الله ولا الحكومه الظالمه
كسره
الشجره المقصوده ما الشجره الغشونا بيها انا قصدى شجرة عمر بن الخطاب رضى الله عنه
أسدقائي الأعزاء شكرا”، ماكان لي أن ابوح بغلط الحكومة، فهي غلتانة وغرقانة في الغلط، ولكن الغلط الأكبر والخطأ الجسيم يعود علي الرعية أو الشعب كما تحلو التسميه، لأنهم همن السبب في وجود هذا الفساد وهمن الأصل في ذلك، وفي ذلك اليكم هذه الأدلة والبراهين بأن أوزار الشعوب وآثامهم هي التي تؤدي بهم الي تلك المهالك والمزالق وبالتالي يتولي أمرهم من يسومهم سوء العذاب بفعائلهم وكيفما تكونوا يولي عليكم..
قال تعالي : (إِنَّ اللهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ)، وكذلك يقول وهو أصدق القائلين (وَكَذَلِكَ نُوَلِّي بَعْضَ الظَّالِمِينَ بَعْضًا بِمَا كَانُواْ يَكْسِبُونَ)…
وفي الحديث النبوي عن الصادق المصدوق عليه من الله أفضل الصلاة واتم التسليم أنه قال في الحديث الذي يرويه عبد الله بن عمر رضي الله عنهما أنه قال: “أقبل علينا رسول الله صلى الله عليه وسلم، فقال: يا معشر المهاجرين! خمس إذا ابتليتم بهن، وأعوذ بالله أن تدركوهن، لم تظهر الفاحشة في قوم قط حتى يعلنوا بها إلا فشا فيهم الطاعون والأوجاع التي لم تكن مضت في أسلافهم الذين مضوا، ولم ينقصوا المكيال والميزان إلا أخذوا بالسنين وشدة المؤونة وجور السلطان عليهم، ولم يمنعوا زكاة أموالهم إلا منعوا القطر من السماء، ولولا البهائم لم يمطروا، ولم ينقضوا عهد الله وعهد رسوله إلا سلط عليهم عدواً من غيرهم، فأخذوا بعض ما في أيديهم..”.
أظن المعاني واضحة ولا تحتاج لتفسير ياشيخ أحمد السلاوي؟؟
نعوذ بالله من غضبه وشر عقابه
أخونا فى الله ودالخلا : بس خلينا في الحكومة غلتانه دى .. الباقى هين !!
أخونا الفاتح عليك الله ما فترت من قولة الحكومة غلطانة ؟
أخونا في الله جبرا، الباقي القلته ليّا عليهو هين ده يا هو دا زاتو جبل الجليد البيغرق السفن العملاقة، وياهو المغتس حجرنا!!!!!!!
بسمك اللهم
إنتوا مش ملاحظين أنو في كمية مستحيلات بتواجه المواطن أولها أنو العيشة الرغيفة تصبح ب(10) قروش يعني 100 جـ بالقديم وأنو الكهربا تكفيك كل الشهر بالتلاجة من غير مكيف ب(20) والفول ب(500) يكفي ثلاثة فِرد أصحاب يعني أما العلاج والتعليم فديل ما مستحيلات ديل معضلات .. وما من حقنا نحلم بالمطالب البسيطة دي يعني بصريح العبارة كده – حرااااااام – نفتح سيرة رخسة الأسعار دى .. ولو زول فتح خشموا يقولوا ليه انت معارضة أو يقولوا ليه إنوا الحكومة دي أحسن من القبالة .. طبعاً القبالة دى كانت فى القرن الماضى يعنى الكسرة والويكة أكلنا والحمير مواصلاتنا وربنا يهون؟؟؟؟؟؟؟؟؟؟؟؟؟؟؟؟؟؟؟!!!!!!!!!!!!!!!!!!!!!!!!!!!!!
أخونا وسديقى العزيز ودالفلاة ( مقصودة ..ودالخلا ..وودالفلاة وجهان لعملة وااااحدة ..)
نحن ياعزيزى الفاضل تكمن فى عدم تفعيل وتطبيق القوانين الألهية القالوا عاوزين يطبقوها والقوانين الوضعية الرافضين يطبقوها ..فنحن أقوام إذا سرق فيهم الشريف تركوه وإذا سرق فيهم الضعيف أقاموا عليه الحد..والسرقة دى خشم بيوت ممكن تتم بعدة طرق ..وبطريقة مقننة جدن بحيث إنت زاااااتك تشعر إنو الزول البيسرق دا على حق..وما شال حق زول أبدن ..وما بالضرورة الزول ياخد حقك عينك عينك..
وبالله يا ودالخلا حسه لوعاينت فى بلاد الخواجات الما بيعرفوا الله بتلقا المشاكل الحاصلة عندنا دى ولا الفساد الحاصل عندنا دامع إنهم لا بيصلو ..ولا بيصومو ..ولا بيصوموا الستوت.. ليه أمورهم ( الدنيوية .. خلينا من الدينية لأنهم ما شغالين بيها ) ماشة صاح وكلو زول عارف حقوقه وواجباته ..وما سمعت بحكاية عمدة كوبنهاجن فى الدنمارك القامت ودفعت حق البنزين فى مشوارها الخاص من كوبونات الحكومة وقامت الدنيا عليها لحد ما قدمت إستقالتها ومشت قعدت فى بيتها … دى حسه يقولوا عليها شنو ؟ مع إنها ما ركعت لله من يوم ما ولدوها ..
وما حكاية الزول العينو الوالى بالمخصصات العجيبة وما راتب ومخصصات السيد رئيس المجلس الوطنى ببعيد عن الأذهان..وربنا يزيدهم كمان وكمان ..بس ما بنقبل زول يستغل عواطف( اقصد مشاعرهم الدينية…مش عواطف التانية ..) الناس بالدين ويوظف الدين لتحقيق مآربه ومصالحه الشخصية ..ولكن عليهم أن يعلموا أن الله يمهل ..ولا يهمل وكلو أول ليهو آخر ..وكان فاتك الربيع العربى المار فلن يفوتك الربيع الإلهى الدائم..
وختاماً ننادى بتفعيل وتطبيق القانون من القمة من الكبار نزولاً إلى الصغار .. حينها سينعدل الحال ويتبدل حينما يتساوى الجميع أمام القانون..ولا نريد أكثر من ذلك..وصدقنى يا ود الخلا لو إعتكف كل أهل السودان داخل المساجد لن ينصلح الحال مادام هناك تفرقة أمام القانون..ناس عايشة وناس دايشة..وناس ركبت الصوانى..
العزيز جدن أبو الأفاليق ..
أظنو مرسال اللبن دا عجبك بالحيل ..
ونحنا يا خوى لامن نجى أرض الميعاد دى بندخل السوق ونشوف بعيوننا الحاصل شنو وبرسلونا نجيب الخدار ومقاضى البيت مع إنو وضاح ما مقصر تب.. أها اليوم داك قالوا لى وإنت راجع جيب معاك لبن..وأخوك الفقير إليه تعالى ما قايل إنو المسألة وفوارق الأسعار حصلت المحصول دا ..مشيت ودخلت أقرب بقالة واشتريت اللبن ورجعت غانماً سالماً.. أم وضاح سألتنى عن السعر .. وهى بالمناسبة ( وما كسير تلج..) مدبرة وحريصة جدن وحقانية .. قالت لى دفعوك 15 جنيه زيادة عن السعرالبنشترى بيهو كل مرة..
المهم دى يوريك إنو ما فى رقابة على الأسواق و الأسعار وكلو زول شغال يبيع على كيفه لأنو المسئولين ( هداهم الله .. ياودالخلا ) ما قاعدين يدخلوا السوق وما عارفين الحاصل شنو على الشعب المسكين الفضل وتسمع الإذاعة وتشوف التليفزيون تفتكر إنك عايش فى بلد تانية غير السودان..
وقول … يا باسط
سلام ياقبيلة،،،
صديقي ودالمدن الدارس الكتاب، اتفق معك في كثير من الذي ذهبت أليه، وأننا كمسلمين لم نلتزم بتطبيق قواعد ديينا الحنيف كما يجب، وأننا نحيف في التطبيق المتوازن للقوانين والحدود، يتم تطبيق الحدود والعقوبات علي الوضيع المذنب والتشهير به، وفي نفس الوقت يتم التستر علي الشريف المذنب والتعتيم والتستر عليه بفقه السترة!!!
وهذا مما يعجل بهلاك الأمة وذهاب ريحها كما جاء في الحديث النبوي الشريف (إنما أهلك الذين من قبلكم أنهم كانوا
إذا سرق فيهم الشريف تركوه، وإذا سرق فيهم الضعيف أقاموا عليه الحد، والله لو أن فاطمة بنت محمد سرقت لقطعت يدها)، وأما ما تقوله عن الغربيين وأمانتهم وتعاملهم فيما بينهم فأنهم انما يفعلون ذلك خوف القانون الوضعي الذي يلتزمون به وليس نتيجة لوازع من ضمير أو أخلاق وبرغم ذلك فهي محمدة أن يلتزم الناس بما تعاهدوا عليه، ولذلك حياتهم سلسة ومنسابة بعكس منا نحن المسلمون، الذين لم نلتزم بمنهج سماوي ولا قانون وضعي أو أرضي فأصبحنا كما تري نهيم في البرية بلا دليل!!!!
فالدين يا صديقي العزيز هو الصل في الحياة وأنزله الحق جلا وعلا وبه الشعائر التعاملية (كتلك التي بين الناس) والتعبدية (كتلك التي بين الناس وربهم) ولا تُقبل الثانية (التعبدية) من الله سبحانه وتعالي الا بصلاح الأولي (التعاملية)، والذين ذكرتهم من الغربيين يتعاملون بالتعاملية ولا حظ لهم في التعبُدية لانهم لا يؤمنون بما نؤمن به نحن، والحديث الصحيح عن صيام رمضان يقول ( من لم يدع قول الزور والعمل به فليس لله حاجة في أن يدع طعامه وشرابه). رواه البخاري.
فقول الزور والعمل به ياصديقي واضح وتشهده في كثير من مناشط حياتنا اليومية، والناس يفعلونه ويفعلون أكثر من ذلك من تطفيف المكيال والميزان في القول والفعل، وهكذا حياتنا أصبحت كذلك والناس في ضنك من الحياة وفي سعير تتقلي وهم لا يحسبون لذلك حسابا” ولا يعتقدون أن هذا البلاء والشقاء نتيجة لكثرة معاصيهم وبعدهم عن ربهم ويستنكرون الحديث علي هذا المنوال والحديث يقول في ما معناه مانزل بلاء ألا بمعصية ولا يرفع ألا بتوبة، وعندما نقول بأن الأمة قد سلكت طريق الهلاك وعليهم الأنابة والتوبة تقولون بأن الحكومة هي التي تفعل وهي التي دفعت بالناس لذلك علما” بأن الحكومة هي من جنس الناس وهي من أصلهم وهي فرعهم فالناس أصلها وهي فرعهم النامي بغذاءهم ومتي كان سيستقيم الظل أذا كان العود أعوج يا سديقي!!!!!!!!!!!!!!
أقول قولي هذا وأستغفر الله العظيم لي ولكم، وسبْحانَك اللَّهُمّ وبحَمْدكَ أشْهدُ أنْ لا إله إلا أنْت أسْتغْفِركَ وَأتَوبُ إليْك..
ولن أعود للخوض في هذا مجددا”
طول بالك ياود الخلاء فأنت على حق ولكنك فى زمن القابض فية على دينة كالقابض على الجمر .
ولدنا حنين .. يعنى نحنا لامن نادينا بتطبيق القانون على الجميع حكاماً ومحكومين لم نكن على حق ؟ لأنو بتطبيق القانون يرتدع الجميع ولكن عندما يسرق الكبير ويعلم تمام العلم انه لن يناله عقاب بل من الممكن ان ينقل مترقياً من موقعه الحالى إلى موقع آخر أعلى فسيعمل ما يحلو له دون خوف أو وجل ..
قبل سنوات قليلة سمعنا من مدير البنك المركزى موضوع إختلاسات المال العام والقروض والمليارات التى ذهبت أدراج الرياح.. هل تمت سمعتم أن أحداً قد تمت محاكمته أو اعاد المال إلى خزينة الدولة .. مالكم كيف تحكمون ؟؟؟
نحن ندعو الجميع إلى الإلتزام بالقانون الإلهى والقانون الوضعى حتى تستقيم الأمور .. لا نستعدى احداً على احد ولكننا لا نريد تحميل الشعب كل المسئولية والمقولة المشهورة الناس على دين ملوكهم..والمال السايب يعلم السرقة.. لماذا عينكم فى الفيل وتطعنوا فى ضله..كل فاسد ومفسد يجب أن ينال جزاءه العادل دون محاباة او مداراة ..أو حماية ..
أخونا ود الخلا .. لسنا ضد العودة إلى الدين وإلى الله .ولكن لماذا نطالب فقط الشعب الفضل بالعودة إلى الله .. أليس ولاة أمورنا بمسلمين؟؟ويجب علينا مناصحتهم ودعوتهم إلى العدل بين العباد وهم مسئولون امام الله يوم لا ينفع مال ولا بنون..لم نطالب بالمستحيل ..
يا غلطانين !
الله يجزى الجميع خير وبصراحه اول مرة احس انو النقاش مجدى ونافع لانو بى عقلانيه
وود الخلا فعلا قال الحق نحن لو ما استعدلنا دا حالنا وحايكون حالنا
رايكم شنو كل واحد فينا يبدا من نفسو يلتزم بى صلاتو ويغض بصرو بس ما تكون عاده لازم نحس بالعبادة
ونتحرى رزقنا حلال ولا فيه شبهه ونشوف اولادنا واخوانا وننهاهم عن المنكر ونأمر اولادنا بالصلاه
ونمتنع عن المحرمات من ظلم وخمر وزنا ومخدرات
وعينا ما تشوف الا النور بعد داك
اللهم اهدنا فيمن هديت وتوفنا بالاسلام واجعل الجنه هى الختام
ويا ناس الانقاذ اتقو الله فى الشعب لو غلبكم خلوها لى غيركم
عليك الله جاوبني إنت ود الخلا ولي ود بن لادن ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
عزيزنا الاخ الكريم
اولا كل عام وانت بالف خير
لأسباب عدة لم أتمكن من المشاركة منها هذا الغلا الفاحش حيث وظفنا مصاريف الانترنت (الرفاهية) للحاجات الغير رفاهية يعني مامعقول تكون عاوز تجدد اشتراك الانترنت وتشتري جرايد وتكوي هدومك ده لو اساسا غسلتها كدة و….. و……….. و … وأخري وانت اساسا مادفعت مصاريف ابنك في المدرسة .
ثانيا انت ماسمعت المسؤول اياه لمن قال قاطعوا اللحمة وهو لايعلم طبعا انو الشعب السوداني زي ماقلت الفضل انو أساساً هو قاطعها اجباري لكن الماعارفو السيد المسؤول انو الحكاية وصلت الطماطم والدكوة
الحمد لله