أجب مستعيناً بالله تعالى على جميع الأسئلة:
السؤال الأول: (10 درجات)
علل ما يلى مع الشرح الوافي:
1- موت ملفات الفساد بالسكته الدماغية
2- إتجاه الرأسمالية الطفيليه للفن والرياضة
3- الدعوة للحوار الوطني في هذا الوقت بالذات
4- إنتشار المخدرات بين طلاب الجامعات
5- عدم تقديم الوالغين في بيع خط هيثرو للمحاكمة حتى الآن
السؤال الثانى : (15 درجة)
أكتب فيما لا يقل عن عشرة أسطر فى واحد من الموضوعات التالية:
1- الإستعدادات التى بذلتها ولاية الخرطوم إستعداداً لخريف هذه العام
2- التعدي على الميادين العامة وتحويلها لأغراض خاصة
3- ارتفاع نسبة المتسولين بالعاصمة ووجود الباعة عند كل إشارة
4- إخفاء مواد الإغاثة حتى تفقد الصلاحية ثم بيعها في الأسواق
5-حصول المسؤولين للماجستير والدكتوراة أثناء توليهم لمهامهم .
السؤال الثالث : (25 درجة) : أقرا ما قاله الشاعر نورالدين المنان فى قصيدته اليخت الرئاسى ثم أجب على الأسئلة:
ايها اليخت الرئاسى قد أتيت اليوم من أقصى بلاد الله تسعى
من سلوفانيا البعيدة كاسراً كل الحواجز .. سابقاً كل التكاسى
والبكاسى عند شط النيل خيمت كبط النيل .. ضمخت الاماسى
والملايين التى جاعت ..تكابس كى تراك جاثماً قرب المراسى
علها تحظى بكحلة.. علها تنسى المآسى
الأسئلة:
1- من أين جاء اليخت المذكور؟
2- ما هى سرعته مقارنة بالتكاسى والبكاسى؟
3- بماذا شبه الشاعر اليخت وما هو نوع التشبيه المستخدم؟
4- ما هو سبب مجىء الملايين؟
5- ما هى تكلفة اليخت المذكور وأين هو الآن؟
السؤال الرابع : (10 درجة)
اقرأ النص التالى ثم أجب على الأسئلة:
إن حرية التنظيمات والأحزاب السياسية في إقامة الأنشطة السياسية والفكرية حق مكفول ويمارس وفقا لأحكام الدستور والقانون، مع معاملة الأحزاب السياسية على قدم المساواة وبحياد تام وبما يضمن تكافؤ الفرص بينها، واحترام القانون والمحافظة على الأمن والسلامة والطمأنينة العامة واجب على الكافة ويكون للأحزاب السياسية الحق في عقد وتنظيم الندوات واللقاءات الجماهيرية في الميادين والأماكن العامة كما يجب الحصول على الموافقة من السلطة المختصة قبل وقت كاف لا يقل عن 48 ساعة
1- أيه يعني دستور؟ وأيه يعني قانون ؟
2- لماذا لم تكن حرية التنظيمات والأحزاب السياسية في إقامة الأنشطة السياسية والفكرية حق مكفول (من زماااان)؟
3- هل يمكن معاملة الأحزاب السياسية على قدم المساواة (ومنو البعامل ده) ؟
4- هل (قدم المساواة) أكثر مساواة من (يد المساواة) ؟
5- هل يمكن للأحزاب السياسية الحق في عقد وتنظيم الندوات واللقاءات الجماهيرية في الميادين والأماكن العامة (نحيا ونشوف) !
السؤال الخامس : (15 درجة):
صرح أحد المسؤولين مؤخراً ان السودان يصنع صاروخا يصل مداه لـ 200 كلم .
1- كم متر في الكيلومتر؟
2- كم جراماً في الرغيفة؟
3- كم مريضاً في المستشفي؟
4- كم طفلاً جائع؟
5- كم (صامولة في الصاروخ)
السؤال السادس : (5 درجات) صحح الخطأ في كتابة الأعداد الواردة في كل جملة مما يلي:
1- وقعت فى إثنتى عشرة حفرة بالسوق العربى.
2- إنقطعت المياه عن الحي ثلاث ليال وخمس ساعات.
3- سرقت من منزل المسؤول مبالغ بتسعة عملات مختلفة يساوي مجموعها ثلاثمائه ستة وتسعين مليونا من الجنيهات
4- بلغت فاتورة هاتف مستشار والي الجزيره للتطوير والجودة لشهر مارس 2014 م عشر مليون وخمسمائه سبعة وتسعون جنيهاً
5 بلغت (واوات الكسرة الثابتة) إثنين وأربعون واواً
السؤال السابع (20 درجة) : مثل – إن إستطعت – لما يأتي في جمل تامة:
1- مسئول إبنه يبحث عن وظيفة.
2- عربة مسؤول غير مظللة
3- مطعم شعبي لا يوجد به ذباب
4- مباراة كرة قدم لا تسمع فيها عبارة (التحكيم فاشل)
5. شرطي مرور يرشدك ويعفيك من المخالفة
كسرة :
عاين في ورقتك .. من غشنا ليس منا ؟ ههههههه
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟
الفاتح جبرا 
برنجية الخميس طعمها غير !!!
خمسة وخميسة وخسمتك تخمسه لي خمسة
مبروك يا شيوعي ..
الشيوعي انتهازي ؟؟؟!!!!
مبروك وغفلتها منها بس
برنجيه
برنجيه تخميسه خميسيه
برنجيييييييييية بطعم ال ……….. ان شاء الله ما تنفعكم
انا زاتى برنجية .
أها…
الصاروخ فيه مسامير ما صواميل
ويا ربي راسنا فضلت فيهو صامولة؟؟
والله يابروف الليله دى قوية .
دوشتنا وماعارفين نعلق على شنو ولا شنو .
غايتو الواحد يقرا والعبرا خانقاهو ومرات يضحك ويلقى دمعتو نزلت .
إحساس بالقهر….
الله فى …
والله يا استاذ الفاتح – بعد القراءة المتأنية – عرفت كمية الجهد المبذول في ورقة الإمتحان – وعرفت لم تردد عبارة (هات الحبوب ياولد)، وعرفت بأن الأمتحان (سهل ممتنع)، وعرفت انك لتنجح في لابد لك من الغش، وعرفت اننا شعب لايعي ولايحمي دستوره، وعلمت بأن فينا من السفاهة حد الصفاقة، وعللمت بأنك من شدة غضبك صرت تلخص المقرر في إمتحان مكشوف للتلامذة الذين يظنون انهم (ملاك المدرسة)، ونصيحتي ان لا ينفع الا (العصا)، وان كان الضرب على الميت حرام.
االتحايا العطرة للكل
الليلة يا بروف لخصتهم لينا كلهم خليتنا زي المشي لبتاع العرضحالات بتاع المحكمة عشان يرفع دعوي ولمن اداه العريضة الماخمج وقراها انقع بالبكا وقالوليهوا مالك قال ليهم والله ما كنت قايل نفسي مظلوم قدر ده , اسي البقرا امتحانك ده تاني بكون عندوا عشم في البلد دي الله اعلم بس يا المطار جاك زول
نحنا لما لقينا المطار جاك زول زاتا صعبة علينا قدينا السلك (ليبيا) وعاوزين نخوج البحر (اوروبا) شفت كيف
شكراً ليك يا بروف على موضوع الليلة الحساس جداً ودا بالضبط الحاصل عندنا في البلد الما عندها وجيع دي .،
وكمان في موضوع تاني ما إتطرقت ليهو أبداً قبل كده وهو ظاهرة جديدة تهدد أمن وسلامة وصحة البيئة للمجتمع والناس (الفضلو) !! ألا وهو ظاهرة توافد ونزوح كميات كبيييرة من الجنوبيين بسبب الحروب العندهم وإستيلائهم على أي حتة فاضية بين مساكن المواطنين، وعمل (عشة) يسكنوا فيها مع نسوانم وشفعم وطبعاً ما عندهم لا مويه ولا نور ولا (حمامات) الله يكرمكم ويقضوا حاجتهم في العراء !!! مما يسبب تهديد صحي بنقل الذباب لأمراضهم الجابوها معاهم ، وجنب بيتي (وسط الخرطوم) في مجموعة منهم كنت أتعاطف معهم من ناحية إنسانية وفتحت لهم بيتي (فاضي) خليت واحد منهم غفير وأديتو مفتاح (الحمام) وأصبحوا كووولهم يستخدمونه وأساءوا إستخدامه بل إشتريت خرطوش 50 متر كنت أوصل لهم الماء حتى (عششهم)، وجاني واحد منهم يعمل في الطلمبة قال لي: (يا مولانا كيف تديهم مويه تساعدم بيها على عمل العرقي) !!! إذا أختلف اللصان ظهر المسروق !! وبلغت عنهم شرطة النظام العام دون فااائدة فبالله يا بروف أطرح لينا الموضوع الخطير دا من ضمن مواضيعك وجزاك الله خير .. سلاااام ..
لا اقول لك الا كما وردما من ديننا (مش دين الجماعة ديل) في كل كبد رطبة اجر دي واحدة وتبليغك للنظام العام ما بفيدك النظام العام دا شغال على كيفه مش على كيفك انت (انت ما سوداني والا شنو) واديهم موية وكان سوووووووووووو بيها العرقي ما مسؤوليتك وسودانا دا لو تمعنت فيهو بتشوف العجب شرق عيد ست مريم وغرب شغلك دا حقارة والا عرم وجنوب (الامر عادي) والقالب بتاع الجماعة ديل ما بركب معانا يعني هم شغالين فيهو غصب عشان كدي حكم ضميرك بس لانه الدين حاجتين يا مظهر يا سلوك وربي قال الدين المعاملة وانت براك شايف المظاهر ولو فتشت بتلقى برضه السلوك وكان لاقتك سلوكي يااااااااااااااخ لمها لي لانه فضل لي سلك واحد
ايوااااااااااا في كل كبدٍ رطبة اجر , من الصباح بفتش ليها واتذكرت القصة الحكاها لينا الاستاذ كووولها من رأي كلب يلهث وياكل الطين اللين من العطش ونزل البير وملا مركوبه موية وزقي الكلب الا كبد رطبة دي اصلها ابت تجيني !!
وبعدين الجنوبيين ديل ما عايشين وسطنا من سنة أسكت حصل لينا منهم شنو ؟
وكونهم جوا وسط المدينة ده من تعنّت حكومتنا ونفختا الكضابه ! قال شنو ؟ الجنوبيين عندنا معاهم اتفاقية الحريات الاربعه وهم مواطنين وليسوا لاجئين والحكومة ابت للمنظمات تعمل معسكرات ليهم !
بعدين ربنا عارف نيتك شنو لمن اديتم بيتك , كان عشان تأويهم ليك الاجر كاااامل وكان عشان تأويهم ومنها يحرسولك بيتك ! ليك حبة إجير كدي والخرطوش كان لماء يشربونه امانه ماك خميت اجر وان لعرقي يصنعونه بعدين ننطط سوا في القلاية حبيبي ,,
هسي انت قعد تنزل لينا دروس دينية في اليوتيوب وغيرك بنزل دروس دنيئة , مش كل واحد وعمله ..
الجاك وبلغك انهم بيعملوا عرقي ده اكييييد مؤتمر وطني جنوبي شان حب الاذية من طباع المؤتمر الوطني ..
نظام عام شنو البلغتو يا نانو انت ماك عارف في اموالهم حق معلوم للنظام العام والشرطيون ! أجي يا ود أمي !!
سلمت اخي جنوبي (كان جنوبيا هواها) ويا خوي ان كنت جنوبي او اي حته من السودان الكبير والذي هو في القلب عدم تحديدنا لهويتنا هو سبب المشكلة من البداية من 1965 والدين بيقول الناس سواسية كاسنان المشط اما الهرج والمرج العاملينو الجماعة ديل ما ليهو علاقة بالدين والمهم قاموا فصلوا وقبضوا شكيناهم على الله الشي الثاني ودي ما قلت فيها الا الحق هم لا بيسرقوا لا بينطوا بالحيطة (تقاليد كدي) يعني من غير دين ولا يحزنون وكان لي العرقي والمريسه فدي في عرفهم وهو مصدر من مصادر التشريع ظنيتو او شي بالدستور (دستور يا اولاد ماما) ففي عرف كثير من القبايل عاااااااااااادي زي عيد ست مريم عند المسلمين وما يحصل فيهو يعني انت عارف وفي اماكن اخرى كثيرة ومسلمين وحفظة لكتابه برضه في اشياء عادية لانه دا السودان ما قالب الجماعة الحاشرننا فيهو بالغصب دا اامل ان ياتي وقت ويفهم الناس السودان صاح والسودان يا خوي ماهو شكرية وبطاحين وجعليين ورباطاب وبصورة اخرى القبائل الماعندها رطانة بس ديل لو كانوا كثار ما بيحصلوا ليهم 20% من سكان السودان الحالي (حلوة الحالي) قبل الانفصال يعني كده كده لينا هوية بتختلف عن الكل يجب ان نتعامل وفقها وشوووووووووووووووف يا خي بشه اخيرا قال كدي عجايب لو ما كان عسكري وجال في البلد قبل ما يكون متحكر (فوقنا) باسم الما عارف ايه لك تحيتي جنوبي ان كنت جنوبيا او لا واول حب ( ملكال )
1- موت ملفات الفساد بالسكتة الدماغية عشان كل من يستلمها قعد يسكت ويعرقل ويوقف تدفق النذاهة والشفافية التي تغذي الملف ويحرم ملف الفساد من الاكسجين الضروري لانقاذه الله لا غذ فيهم بركة !
2- اتجاه الراسمالية الطفيلية للفن والرياضة عشان يبقي انفاقهم هباءاً منثورا .
3- الدعوه للحوار الوطني في هذا الوقت لتأكيد نفاق الداعي .
4- انتشار المخدرات في الجامعات عشان الجامعات بقت مجرد حوش بقر لا انشطة فنية ولا ثقافية ولا اركان نقاش ولا أي انشطة ترفيهية , الله يرحم حلمنتيش والجو الرطب .
5- عدم تقديم الوالغين في بيع خط هيثرو للمحاكمة عشان البقدموا الناس للمحاكمة ذاااااتم والغين .
السؤال الثاني :
الاستعدادت للخريف كثيرة وعلي سبيل المثال لا الحصر
سطر 1 – تحديد المبلغ المرصود للحفر
سطر2 – اختيار الشركة الحتشيل المبلغ المرصود للحفر بدون ما تحفر
سط 3 – تحديد نسبة كل مسئول كبير من المبلغ المرصود للحفر
سطر 4 – اختيار الشركة الحتمسك الحفر من الباطن بدون ما تحفر من الشركة الاولي الماسكة بدون ما تحفر
سطر 5 – الشركة الماسكة من الباطن تتفق مع مقاول انفار لحفر شارع نموزجي في كل حاره
سطر 6 – مقاول الحفر يتفق مع انفار الحفر لحفر شارع وااحد نموزجي في كل كم حاره
سطر 7 – رصد مبلغ الدعاية الاعلامية للحفر
سطر 8 – تحديد المنظمات التي ستتولي استلام و توزيع الاغاثة الخارجية للمتضررين من الخريف
سطر9 – تجهيز المخازن لتخزين الاغاثة الخارجية حتي تنتهي صلاحيتها ومن ثم يتم بيعها
سطر 10 – تحديد الممثلين الحايظهروا في التلفزيون علي انهم متضررين ويستلموا الاغاثة الخارجية ويشكروا الحكومة عملا بالمثل الاجانب يجقلبوا والشكر للرماد .
2/ التعدي علي الميادين العامة وتحويلها لاغراض خاصة هي تأويل لرؤيا الصالح وكان تحته كنز فاردنا ان يبلغا اشدهم ويستخرجا كنزهم ! مثش بلغوا اشدهم ؟ وتيّييب . علي الطلاق بيوتنا ذااتا يشيلوها !!
ممكن امشي الحمام واجي ؟ وعليك النبي يا بروف كان ما اديتني باقيها اخش بيها الحمام , بتجيبو من وين انت ياخ ؟ وانا الغبيان قايلو بره السودان ومرقا افتشو !!
آآآآآآآآآآآآآآآجنوبي بتحل في الامتحان ما انتهى الوقت من زماااااااااااااااااااااااااااااااااااااااااان
هههههههههههههههههه,,اجابة صحيحة يا غلباااااااااااان
مبروك عليكم يا ود بوتن وود العبيد الببرنجيه التخميسه الخميسيه.. ووين الواتس بتاعك يا جنوبي القلتا ليك أديني ليهو؟؟.. سلاااام ..
والله يا نانو واتسابي ماني مابي ليك بيهو , وانا عااارفك انت داير تجاهد فيني وتهديني وماني مابي الهداية إلا خايف عليك بدل تهديني يحصل العكس وانا ماااا ناقص ذنوب ياخوي , ,, صداقتك لي شفاعة وصداقتي ليك وجاعه …
إذا وقعت في الذنب فأنت من العاصين، وإذا إستغفرت منه صرت من المطيعين، وإذا أحسنت بعد ذلك كنت في زمرة الصالحين ..
قال تعالي: ” إلَّا مَنْ تَابَ وَآمَنَ وَعَمِلَ عَمَلًا صَالِحًا فَأُوْلَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَحِيمًا “. [الفرقان:70]
( الله يصلحني وأياك يا أخوي حنوبي )
ما علقت لي على موضوع ( أهلك الجنوبيين) الكتبتو للبروف مالك؟؟ لا أسكت الله لك صوتا !!!
ههههه جنوبي أدي هو ليهو واعمل واحد تاني عشان خاطر الحبايب
يا شباب المعلم دا بتاع بينسون بس أي والله 100 مرة ذكرنا الكلام دا *_^
اووول حاجة بتاع البينسون ما بقولوا ليهو المعلم ! اها شفت ؟
كتمت كتمت كتمت كتمت
الحمدلله انا من ( اندينا) ، يعني ما شايله عربي! لكن مرضت بس!
ممكن السؤال السادس (١)
التصحيح: وقعت في السوق العربي ( حذفت الرقام لكثرة العلل)
وبرضو تصحيح امتجان الي امتحان
امتحان زى دا اصلو ما شفنا !!
حاجزين برنجي مع الكتمة دي
والي الجزيرة مُش حتقدر تغمّض عينيك ..
دفعت الولاية لشركة 13 مليار لتنفيذ طُّرق قبل 4 سنوات , استلمت الشركة المبلغ كااااش ونامت علي كده , قلاب تراب واااحد ما كبتو في الطرق ! والمراجع العام ( جزاه الله خير) قال للوالي انا لو رفعت تقرير في الموضوع ده بتبقي فيهو مسئولية جنائية ( مش قت ليكم جزاه الله خير !؟ ) قام الوالي عمل تسوية مع الشركة لارجاع ال 13 مليار حقتنا , اها الشركة قالت ما عندها كاش لاكين حتدينا 70 قطعة واطه تمن القطعة 200 مليون , وادتنا ال 70 قطعة وكدي تبقي الشركة دايرة مننا 14 مليار ونحنا قبييييل دايرين منها 13 مليار , معاناها الشركة الشايلا قروشنا 4 سنة دي طالبانا مليار فرق السعر , واحقاقا للحق ادوها شيك تاااني بمليار جنيه وكده نبقي حبايب !!
اها الناس اللا بيعجبا العجب ولا الصيام في رجب لمن سألوا عن القطع دي لقوا القطعة ما بتساوي اكتر من 50 مليون يعني ال 70 قطعة بي 3 مليار ونص ! ونحنا دافعين فيهن 14 مليار !! وده كله بسبب العندو اثبات يجيبو وعليكم النبي تاني أي زول عنده اثبات يقرّض عليهو ما ناقصين خسائر جديدة ! بالقانون سارقننا بدون قانون برضو سارقننا ,
ده كله كوم والجودية حقت شركة الاقطان كوم براااااهو !!!
والله يا جنوبي انا ما حرقني شي الا فرق السعر دا!!!!! بعد دا كللللللو و طلعوا دائرين مننا؟ اها و المراجع العام سكت؟ أريت وكان سكت من الاول، على الأقل ما كان خسرنا مليار تااااااني!! و الواطة اصلها حقتنا! مش قلت ليك، مش حتئدر تغمض عينيك؟ بلد سممممممحة خلاص! حقو نعمل ليها دعاية يا بروف في البوروشور بتاع السياحة ( دا لو عندنا واحد يعني
) على الأقل بدل صوره البنات لازالت ناس أنصار السنه و قالوا دي سياحة دع…….، و نقول فيها السودان. ( سوليوووود ، على وزن هوليوود و بوليوود) ، والله افلامنا دي تنافس بررررراحة ، وكان مافي زول جانبا ، ما مشكله يأنا نحن الفرّاجة قاعد ييين هملة.
ههههههه آآآآآآآآآآآآآآآجنوبي يعني الشركة عملت معاهم حسبة برما وحاسبتهم حساب ابو الكجك
في الزمن الشالو فيهو القروش دي كان قيمتها الحقيقية كم؟
وهل شالوها عن قصد ودراية بمآل الإقتصاد؟ (عن قصد)
وهل “استولوا على الاراضي المذكورة” بعد ان عرفوا المخططات السكنية والامتدادات والمناطق الهامة والاراضي التابعة لسلطة الدولة؟
وهل، وهل، وهل………
وكلها اسئلة مدار حالها ان الانقاذ اتت “بالمتفوقين دراسيا” ولكن “الفاشلين اخلاقيا” “منحطين احلى من فاشلين”
والله انا متحسر على الاجيال الجاية اللي حتجي وتلقى انو السودان بقى امارات مملوكة لأسماء بعينها
والمشكلة الكبرى التي تواجه المواطن البسيط هي بيع المعلومات الحكومية ليستفيد منها الرأسمالية ثراءا على ثراء.