عنترة ينتحر

مشهد (1) :
في إحدي خيام (بني عبس) عنترة يرقد مسجياً على فراش من وبر الإبل مرتدياً حلة سوداء وحوله أخوه (شيبوب) وزوجته (عبلة) وعمه (مالك) وبعض الجيران ، عبلة متجهمة الوجد تمسك (بهبابة) تحركها يمنة ويسري أمام وجه (عنترة) مغمض العينين
شيبوب: منذ متى وهو على هذه الحال؟
عبلة: والله ليهو أسبوع بي جنس الحالة دي

مالك : وهال أخذتيه إلى دار (الشفاء)؟
عبلة: ما خلينا لينا حته ما وديناهو .. مشينا بيهو دار الشفاء ودار (الزيتون) وتستشفون وكووولهم يقولو ليك كان ما دفعتا أمنية كم مليون ما بندخلو !
شيبوب: ولماذا لم تأخذيه إلى دار الشفاء الحكومية !
عبلة : قالو أن (أسرتهم) مكعكعة ولا تحتمل وزن عنترة غير أن أحد الأطباء أرقده على الأرض وفحصه وقال أنه مصاب بصدمة عصبية شديدة !
مالك : مسكين عنترة فقد إنهارت أعصابه على الرغم من أنه كان يعلم نتيجة الإنتخابات سلفاً
شيبوب : أعصابو براهو ؟ بنو عبس كووولهم أعصابهم إنهارت
– (عنترة بين الحين والحين يفيق من غيبوبته ويرفع سبابته هامساً … تااااني خمسة سنين … تاني خمسة سنين)
مالك : والله يا شيبوب إنها كارثة لقد كنا ندخر (عنترة) لليوم الأسود !
شيبوب : لماذا لم تجرب معه (طب الأعشاب) عبس كووولها إتملت (عشابين)
عبلة: والله حاجه خليناها ليهو مافي .. للرقية الشرعية عملناها !
أحد الجيران : الله يقومك بالسلامة يا عنترة فأنت أمل بني عبس

مشهد (2) :
عبلة تدخل إلى خيمة ( عنترة ) صباحا وهي تحمل (كوب حليب) فتجد فراشه خاليا ، تنظر إلى موضع سيفه ورمحه وخوذته فلا تجدهم ، تخرج مهروله خارج الخيمة حيث مكان فرس عنترة (الأبجر) فلا تجده ، اخذت (عبلة) في الصراخ فتجمع الجيران :
جار (1) : عنترة ليس في إستطاعته الخروج وهو في هذه الحالة الصحية
جار (2) : أكيد ديل (الجماعة) جو ساقوهو !
جار (3) : لا أظن ذلك يا أخا العرب ففرسه غير موجود !
جار(1) : هل أبلغتي يا عبلة (السلطات) ؟
عبلة : أبلغهم كيف؟ الشبكة طاشة من الصباح
مشهد (3) :
بينما (العربات) تسير في (شارع المورده) سيرا حثيثاً تتجه نحو (كبري أم درمان) يفاجأ الجميع بفارس متقلدا سيفه يحمل رمحه بيمينه ويمسك بلجام فرسه الضخم بيسراه ويسير بين صفوف العربات المتراصة ، ألجمت الدهشة السائقين والراجلين ورجال المرور، أخذوا يتتبعونه بأعينهم حتى وصل غلى مدخل الكبري فترجل من راحلته وقام بربضها ثم أعتلى (رأس الكبري) في رشاقة ، لحظتها كانت الحركة قد توقفت تماما عند مدخل الكبري ، خرج الجميع من مركباتهم وهم ينظرون محدقين إلى ذلك الفارس فارع الطول ذو الوجه صارم القسمات المهيب ، أطبق الصمت على المكان ، ومن على قمة الكوبري أشار الفارس للجميع بالسكوت :
– أيها الشعب الفضل .. يا بني (عبس) … أنا عنترة .. أنا القائل :
لي سيف حـده يـزچي آلمنآيآ**ورمح صدره آلحتف آلمميت
خلقت من آلحديد أشد قلپ**و قـد پـلـي آلحــــــــديد ومآپليت
وإني قد شرپت دم آلأعآدي**پأقـحـآف آلـر وؤ س ومآرويت
وفي آلحرپ آلعوآن ولدت طفلآ**و من لپن آلمعآمع قـدسقيت
فمآ للرمح في چسمي نصيپ**ولآ للسيف في أعضآي قــوت
ولـي پـيـت علآ فلگ آلـثـريآ**تـخـر لـــــعظـم هـيپته آلپيوت

ياااا بني عبس .. إنها والله الفجيعة … إنها والله الكارثة أن نعيش في ظل هذا الهوان خمس سنوات أخرى !
– (صوت 1) : لقد هرمنا يا عنترة … لقد هرمنا
– (صوت 2) : يا عنترة ياخ أنزل نحنا محتاجين ليك !
– (صوت 3) : يا عنترة ياااخ خليك عاقل ما كلنا عين أبو أهلنا طلعت
– (مسؤول) : ياخ أنزل بنديك بيت في الإسكان الشعبي !
– (عنترة) : الكلام ده قولو لي زول تاني .. عنترة يرفض التسويات ..
– (صوت 4) : أنزل يا عنترة دوام الحال من المحال وكل أول يهو آخر
– (عنترة) : أسالو عني جميع القبائل والشعوب إن كنت أرضى الذل والهوان .. والله إن باطن الأرض خير لي من ظهرها !
– ( وهو يلقي بجسده الضخم في النهر صائحاً) : تحيا عبس … تحيا عبس
من وسط الجموع المندهشة ينسل (شيبوب) متجها نحو فرس عنترة (الأبجر) يمتطيه متجها عكس أتجاه الجموع التي إتجهت صوب شاطئ النهر (أكيد بيكون متابعو بوكسي) !
مشهد (4) :
الجموع تجلس على حافة النهر .. بينما (لنشات) الإنقاذ النهري تجوب النهر عرضاً وطولاً بحثاً عن جثة (عنترة) الذي لم يظهر له أثر ، مواطن يهمس في اذن آخر :
– الزول الزي عنترة ده ما بموت منتحر … يكون عاملا (تمثيلية) عشان يقلع ليهم بعد شهر شهرين يجيب أجلهم !!

كسرة :
سيداتي سادتي .. يرى المسؤولون أن عنترة قد إنتحر يأساً بينما يرى المواطنون أنه عائد بلا أدني شك لتغيير واقعهم المرير … الفاتح جبرا .. صحيفة التيار .. من أمام كوبري التيل الأبيض بأمدرمان ..!!

– كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و+و

22 تعليق

  1. المقال ده مالو زي مقال زول قنع و عاوز يحصل عنتر كده … ؟!!!!! … الشر بره وبعيد ‘ن شاء الله

  2. برنجية تانية

  3. المرحوم غلطان !! حسي ناس هناي يرفعوا عليهو قضية و يقولوا شوسرة من بني شيوع (مش يا جنوبي) و إثارة للفتنة و الطائفية!!

    1. طائفية شنو كمان !!؟
      عنترة ده مش افريقي عربي ؟ ونحنا مش عرب ممزوجه بي دم الزنوج الحاره ؟
      ممزوجه بي دم الزنوج الحاره !!! سمح مااالنا بقينا باردييييييييييين كدي !؟

  4. طيب ما كان يصبر شوية،، يمكن (يتحلا زى بلة) !!

  5. في واحد من الكانو في لنشات ( الانقاذ ) قال لي بيني بينك واحد فينا لقي عنترة وجراه من يده , وعنترة لمن مرق سألو قال ليهو من انت يا اخاه ؟
    قام داك قال ليهو : نحنا ناس الانقاذ
    قال عنترة نتق يده منه وقال ليهو : أفو !! انت داير الناس يقولوا عنترة مرقوه ناس الانقاذ ؟ خسئت !
    وغطس تااااني .

  6. هو عنتر دا قاعد وين , ما سمع بـ (بلة الغايب) ولا شنو ………. وتاني خمسة سنين وكم شهر و25 يوم وكم ساعة وكم دقيقة وكم ثانية ……. وتالت كمان يا عنتر ………. ولا هنتر

  7. هو يا بروف عنترة دا مالو الأيام دي مهيمن عليك ؟؟ وما بتخاف من كلاب لهب بعدما إنتحر صاحبك ؟؟ الله يستر عليك .. سلاااام ..

  8. اكيد الريس يكون خطب عبلة

  9. و قام فلان عرس عبلة

  10. يا بروف ناس كتيرة احبطت بانتحار عنترة كدي عليك النبي شوفولو مخارجه ! يمكن لقاه حواتي وشالو معاه في المركب بس عنترة فاقد الزاكرة هسي !

  11. يا جنوبي شكلك طاشي شبكة !! ولا إمكن يا ربي جاك زهايمر ؟؟ نسيت إنو الزول دا ماااات وشبع موووت من زماااان وجنازتو طلعت عندكم في دنقلا ؟؟؟ .. سلااااام ..

  12. هسة يقوموا ناس الأمن يفتحو فيهو بلاغ أثارة الشائعات وأقلاق وتأليب الرأي العام على السلطة.

    هو عنتر أحسن ولا أرجل من ساندرا ؟!!!

  13. رحم الله الشعب السودانى الفضل ,,
    رحمه الله ,,,

  14. و (عنترة ينتحر) ديليه نشروها؟ ولا عشان ننتحر إحنا كمان؟ معليش ما علينا !حيرني دا
    (المرشحون المستقلون يشرعون في تسجيل حزب المؤتمر الوطني (الأصل))!!!!!!!!!!!!!!!! يعني يستقلوا ، نصوت ننتخبهم ، يفوزوا ، يعملوا وؤتمر وطني تااااااااني!!! دا كلام شنو دا؟ دا حلال ولا حرام؟ أصواتنا يانااس هووووووي؟ و الله جد أفضل وصف للوضع الراهن هو ما كتبه الصحفي التونسي (محمد خريشان) :الشعب السوداني رهينة!!!!

    1. يا بت هييييييي ما ترمي بلاك علي الناس ساكت !
      المرشحين ديل عندك دليل علي واحد فيهم كتب مستقلين دي كتابة ؟ كلللللهم نطقوها ايوا صاح لاكين ما كتبوها لينا كتابة شان نعرف هم قاصدين مستقلين بالقاف الفهمناها نحنا ولا بالغين القصدوها هم

  15. يومتا شفت صورة احتفال لواحد نازل مستقل فاز في الدائرة حقتو وفي الاحتفال لابس هلال ورابط حريرة في يده ! يعني عريس مش ؟ سمح العروس منو !!؟ أنحنا ؟!! وووب علينا .

    1. جنوبي , قول بسم الله ,,,, بعد 25 سنة برضو ( وووب علينا ) ؟؟؟؟؟؟؟!!!!!!!!!!!

      1. ما لو العريس القديم ما مشكلة ! إلا عريس جديد ده ماااااااا الجديد شديد يا ركس ! زي ده لحدي ما يصل مرحلة ( اللالوب ) ما بشهينا النومه !!

      2. ههههههههههههههههه , النوم بجيب اللوم ,,
        وامس الفيك اتعرفت !

  16. أها عنتر قالوا مرقا فى جده و هسى شغال راعى إبل

    1. جنب قليلو !!؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: